Navigation

Inhaltsbereich

Sessiun: 14.06.2016

En il chantun Grischun vegnan la direcziun ed il secretariat da scola pajads da las vischnancas. En il contract d'engaschament vegnan er fixads ils pensums. Las direcziuns da scola sco persunas responsablas èn cumpetentas per la direcziun operativa cun il persunal, l'organisaziun, l'administraziun, las finanzas e la pedagogia.

 

Per las vischnancas mancan directivas per pudair fixar ils pertschients da plazzas. En auters chantuns datti propostas da calculaziun, p.ex. vegnan prendids sco basa il dumber da scolaras e scolars, da classas, da lieus da scola, d'engaschaments a temp cumplain u a temp parzial da persunas d'instrucziun. En il chantun Grischun mancan models da calculaziun da quest gener. Perquai èn las autoritads d'engaschament en las vischnancas malsegiras. E tar las cundiziuns d'engaschament existan memia grondas differenzas d'ina scola a l'autra.

 

Dapi l'introducziun da la nova lescha da scola a partir dal 1. d'avust 2013 vegnan las vischnancas sustegnidas finanzialmain cun contribuziuns chantunalas da 300 francs per scolara u scolar sco indemnisaziun per la direcziun da scola. Il controlling da las direcziuns da scola è chaussa da l'uffizi per la scola populara ed il sport.

 

È la regenza pronta da laschar elavurar directivas u in instrument electronic per calcular ils pensums da la direcziun e dal secretariat da scola e da metter a disposiziun quel a las vischnancas?

 
Cuira, ils 14 da zercladur 2016

 

Föhn, Thomann-Frank, Casty, Blumenthal, Bucher-Brini, Buchli-Mannhart, Caduff, Caluori (Cuira), Casanova (Glion), Casutt-Derungs, Clalüna, Crameri, Danuser, Darms-Landolt, Dosch, Foffa, Gartmann-Albin, Geisseler, Hardegger, Koch (Tumein), Kollegger, Komminoth-Elmer, Kunfermann, Locher Benguerel, Mani-Heldstab, Märchy-Caduff, Marti, Niggli-Mathis (Grüsch), Noi-Togni, Papa, Pedrini, Sax, Schutz, Tenchio, Thöny, Widmer-Spreiter, Zanetti, Berther (Segnas), Bossi, Caluori (Zizers), Degiacomi, Gugelmann, Natter, Schmid

Resposta da la regenza

Tenor l'art. 73 da la lescha davart las scolas popularas dal chantun Grischun dals 21 da mars 2012 (lescha da scola; DG 421.000) survegnan las instituziuns ch'èn responsablas per la scola ina pauschala annuala per la direcziun da scola da 300 francs per scolara e scolar, sch'ellas adempleschan las premissas minimalas areguard l'engaschament, areguard la scolaziun ed areguard las obligaziuns. Decisivas per la dimensiun dal pensum da la direcziun da scola èn las obligaziuns che quella sto ademplir. Fixar las obligaziuns da la direcziun da scola è chaussa da l'instituziun ch'è responsabla per la scola sco patruna. Sche quella dumonda il chantun per contribuziuns a la direcziun da scola, dependan questas contribuziuns da l'adempliment da premissas minimalas tenor l'art. 15 da l'ordinaziun tar la lescha da scola dals 25 da settember 2012 (ordinaziun da scola; DG 421.010). Ulteriuras explicaziuns davart las incumbensas da la direcziun da scola chattan ins en las directivas davart il pajament da contribuziuns per las direcziuns da scolas. Las incumbensas vegnan numnadas en ils relaschs menziunads, quai però senza ulteriuras prescripziuns per exempel areguard la qualitad u areguard la quantitad. I dat perquai in spazi d'agir considerabel per las instituziuns ch'èn responsablas per la scola da fixar las prescripziuns respectivamain d'elavurar il carnet d'obligaziuns. Quel po influenzar il pensum da la direcziun da scola e chaschunar differenzas correspundentas, per part er grondas tranter las instituziuns ch'èn responsablas per la scola.

Facturs impurtants per la dimensiun dal pensum da la direcziun da scola èn oravant tut il dumber da scolaras e scolars, il dumber dals lieus da scola, la situaziun linguistica sco er la grondezza da l'intschess da l'instituziun ch'è responsabla per la scola respectiva. La repartiziun da las incumbensas sco er il sustegn tras il cussegl da scola, l'eventuala dimensiun da la distgargia administrativa tras la chanzlia communala, l'existenza u la mancanza d'in secretariat da scola sco er la cumpetenza professiunala da tut ils conturns èn ulteriurs singuls facturs che han ina influenza decisiva sin l'adempliment da las incumbensas e pia sin il pensum da la direcziun da scola. Quai vala per tut las instituziuns ch'èn responsablas per la scola. Las instituziuns pli pitschnas e mesaunas èn però pertutgadas da quai anc pli ferm che las grondas.

En auters chantuns, per exempel en il chantun Son Gagl, èn las differenzas tar las cundiziuns generalas da las instituziuns ch'èn responsablas per la scola bler pli pitschnas che tar nus. Ultra da quai èn las instituziuns ch'èn responsablas per la scola en il chantun Son Gagl obligadas tenor lescha d'installar direcziuns da scola. E tuttina na formulescha noss chantun vischin naginas ulteriuras prescripziuns u recumandaziuns per ils differents secturs da la scola populara sco per exempel per il pensum da la direcziun da scola u per il carnet d'obligaziuns. Talas vegnan consegnadas sin basa voluntara da l'associaziun da las instituziuns responsablas per la scola populara dal Son Gagl (Verband St. Galler Volksschulträger, sgv). Las instituziuns ch'èn responsablas per la scola en il Grischun èn libras da s'orientar en cas da basegn vi da questas recumandaziuns u da s'organisar correspundentamain en il pendant grischun tar il sgv, numnadamain en l'associaziun dals cussegls da scola dal Grischun.

Dapi l'introducziun da las contribuziuns chantunalas per la direcziun da scola a partir da l'onn da scola 2009/10 èn vegnidas drizzadas a l'uffizi per la scola populara ed il sport intginas dumondas areguard la calculaziun dal pensum da la direcziun da scola. Il dumber da talas dumondas è però sa reducì fermamain ils ultims onns, perquai ch'i na vegnan strusch pli installadas novas direcziuns da scola. Actualmain han gia 72 da 90 instituziuns ch'èn responsablas per la scola (onn da scola 2016/17) ina direcziun da scola renconuschida dal chantun. Nagut n'inditga pia ch'igl existia ina malsegirezza cuntinuanta tar las autoritads d'engaschament.

La regenza è da l'avis ch'i saja chaussa da las instituziuns ch'èn responsablas per la scola da fixar il pensum da la direcziun da scola. Ultra da quai possian quellas fixar sezzas il meglier il pensum e l'adattar pervia da la gronda eterogenitad a las differentas cundiziuns generalas menziunadas. Er da recumandaziuns per ulteriurs secturs sco per exempel per in secretariat da scola desista la regenza per ils motivs numnads.

24 d'avust 2016