Navigation

Inhaltsbereich

Sessiun: 14.06.2016

La taxaziun d'interpresas giuvnas ha dà da discurrer ils ultims mais. En spezial è l'uffizi da taglia dal chantun Turitg vegnì sut squitsch, perquai ch'el ha applitgà – cun sia nova pratica fiscala – ina metoda da valitaziun problematica da las valurs da facultad.

 

La nova pratica fiscala dal chantun Turitg piglia, sco basa da taxaziun, ils ultims augments dal chapital resp. las ultimas rundas da finanziaziun che represchentan dentant unicamain ina valur futura, sperada, ma betg reala. L'uffizi da taglia argumentescha ch'i al manchia, sin fundament da la circulara nr. 28 da la conferenza svizra da taglia, la libertad d'agir per in'autra interpretaziun. Quai, schebain ch'il commentari 2015 tar la circulara menziunada stipulescha che la metoda da valitaziun ch'è orientada a resultats futurs e che sa basa per gronda part sin stimaziuns subjectivas e perquai mo difficilmain controllablas, saja "nunduvrabla" per intents fiscals.

 

Il chantun Turitg emprova ussa d'intimar auters chantuns d'avair la medema tenuta. Perquai vegn la regenza supplitgada da respunder las suandantas dumondas:

 

1. Co è concepida la taglia sin la facultad dals fundaturs d'interpresas giuvnas en il chantun Grischun, e tge basa da taxaziun vegn applitgada?

 

2. È la regenza da l'avis ch'i saja bun da sa basar sin las rundas da finanziaziun resp. sin il chapital da ristga per fixar la taglia sin la facultad dals interprendiders?

 

3. Pensa la regenza grischuna da surpigliar la pratica fiscala dal chantun Turitg?

 

4. È la regenza pronta da s'engaschar tar la conferenza svizra da taglia per che las interpresas giuvnas resp. lur fundaturs vegnian taxads tenor princips gists, calculabels e persistents, sco per exempel tenor la "metoda da pratichers" ch'è sa cumprovada per las interpresas pitschnas e mesaunas?

 

Cuira, ils 14 da zercladur 2016


Kappeler
, Schneider, Baselgia-Brunner, Brandenburger, Burkhardt, Caduff, Caluori (Cuira), Casanova (Glion), Casty, Casutt-Derungs, Danuser, Dosch, Engler, Foffa, Geisseler, Hardegger, Heiz, Hitz-Rusch, Holzinger-Loretz, Joos, Kollegger, Kunfermann, Kunz (Cuira), Kuoni, Mani-Heldstab, Mathis, Michael (Donat), Müller, Nay, Papa, Paterlini, Pedrini, Peyer, Schutz, Steiger, Stiffler (Cuira), Thomann-Frank, Troncana-Sauer, Valär, von Ballmoos, Waidacher, Wieland, Zanetti, Degiacomi, Föhn

Resposta da la regenza

Davart la valitaziun d'uschenumnadas societads giuvnas (start-up), quai vul dir da persunas giuridicas fundadas da nov che han grondas aspectativas d'avair success, è resultada l'ultim temp ina discussiun animada en il chantun Turitg. Il problem da la valitaziun d'interpresas giuvnas resulta, sch'ina societad ch'empermetta d'avair success ma che na cuntanscha anc nagin gudogn e che na dispona savens anc betg d'in product che ha capacitad commerziala, chatta in investider ch'è pront da pajar in aut pretsch supplementar per ils futurs success ch'èn da spetgar da la societad. Sin fundament da questa valitaziun vegn alura eruida ina fitg auta valur da las aczias che po chaschunar autas taglias sin la facultad.

La dumonda da la valitaziun da societads giuvnas è vegnida recepida da la suprastanza da la conferenza da las directuras e dals directurs chantunals da finanzas ed assegnada a la conferenza svizra da taglia per che quella possia l'analisar e giuditgar, sch'i dat in eventual basegn d'agir.

Las dumondas concretas pon vegnir respundidas sco suonda:

1. Per mancanza da cas concrets n'exista oz nagina pratica pertutgant questa dumonda.

2. La dumonda n'è betg vegnida examinada fin ussa. Sa basar sin ina cumparegliaziun cun terzas persunas po esser ina basa da partenza per la valitaziun. En il cas concret duess ins dentant er examinar, sch'ils fundaturs da las interpresas giuvnas pon propi realisar in pretsch cumparegliabel per lur aczias, perquai che la valur da lur societad dependa centralmain dal fatg, sche las testas innovativas lavuran vinavant en l'interpresa.

3. La fixaziun da la pratica administrativa stat en ils mauns da l'autoritad executiva. La fixaziun da la pratica cun agid da las disposiziuns da la lescha da taglia è pia chaussa da l'administraziun da taglia (art. 165 da la lescha da taglia). Actualmain n’èsi betg previs da surpigliar la pratica fiscala dal chantun Turitg.

4. Dapi che la suprastanza da la conferenza da las directuras e dals directurs chantunals da finanzas ha gia incumbensà la conferenza svizra da taglia d'examinar la dumonda, e dapi ch'i n'èn betg enconuschents cas correspundents en il chantun Grischun, na pari a la regenza betg necessari da prender ulteriuras mesiras.

11 d’avust 2016