Navigation

Inhaltsbereich

Incumbensa Troncana-Sauer concernent emprests da daners NPR; garanzia communala

Sessiun: 15.06.2016

En il rom da la nova politica regiunala da la confederaziun (NPR) sustegna il chantun er projects degns da vegnir promovids da las telefericas. Tenor l'art. 8 al. 3 da la lescha federala davart la politica regiunala ston eventualas perditas d'emprests da daners concedids vegnir purtadas per la mesadad dal chantun che ha concedì quests emprests a l'emprestanta u a l'emprestant. Cuntrari ad auters chantuns che concedan lur prestaziuns equivalentas tar l'emprest da la confederaziun er sco emprest, fa quai il chantun Grischun en furma da contribuziuns à fonds perdu.

 

Sche la confederaziun conceda p.ex. in emprest da 2 milliuns francs che sto vegnir rembursà entaifer 15 onns, paja il chantun ina contribuziun à fonds perdu da 336 679 francs e sto garantir envers la confederaziun per 1 milliun francs en cas d'ina perdita totala da l'emprest federal.

 

Il departament d'economia publica e fatgs socials ha relaschà ina directiva concernent la concessiun d'emprests NPR sco er da prestaziuns chantunalas da promoziun per construir stabiliments turistics da transport e d'ennavar. En questas directivas fixescha il departament:

 

"Sco segirezza per il rembursament da l'emprest federal sto vegnir prestada ina garanzia communala davart la summa cumplaina da l'emprest concedì."

 

Cun questa cundiziun va il chantun pli lunsch che la garanzia da 50 % che vegn pretendida da la confederaziun. En la pratica vul quai dir che la vischnanca sto, sche l'emprest federal na po betg vegnir rembursà, surpigliar en l'exempel qua survart 1 milliuns francs per da la perdita da la confederaziun e pajar al chantun – perquai che la garanzia pretendida è vegnida dada per 2 milliuns francs – supplementarmain 1 milliun francs. Il chantun ha deliberà ina contribuziun à fonds perdu ch'importa var 17 % da l'emprest federal e che na sto betg vegnir rembursà dal petent. Pervia da la garanzia pretendida faschess il chantun tar ina perdita totala en quest cas in gudogn da 663 321 francs. Cunter l'integraziun da las vischnancas na pon ins dir nagut, ma il chantun na dastga betg s'enritgir pervia da la garanzia. Cun la formulaziun vertenta fa el quai.

 

Il chantun giustifitgescha ses agir uschia ch'el stuess surpigliar – sch'i na dess betg la garanzia communala per tut l'import da l'emprest – trais quarts da la promoziun totala (emprest e contribuziun à fond perdu) en cas d'ina perdita totala (insolvenza da l'emprestant) resp. ch'el stuess acceptar ina perdita en questa autezza. Ina contribuziun à fond perdu na stuess atgnamain betg vegnir activada en ils cudeschs perquai ch'ella na vegn insumma mai rembursada. Uschia na pon ins da vart dal chantun er betg discurrer d'ina perdita da sia prestaziun.

 

Las sutsegnadras ed ils sutsegnaders pretendan dal chantun ch'el na giaja betg pli lunsch che las directivas federalas tar garanzias en connex cun emprests da daners NPR e ch'el tractia contribuziuns à fond perdu er sco talas. Ultra da quai duain garanzias existentas vegnir adattadas en quest senn.

 

Cuira, ils 15 da zercladur 2016

 

Troncana-Sauer, Sax, Hug, Aebli, Alig, Berther (Mustér), Blumenthal, Buchli-Mannhart, Burkhardt, Caduff, Casanova (Glion), Casutt-Derungs, Caviezel (Tavau Clavadel), Claus, Crameri, Davaz, Della Vedova, Engler, Epp, Fasani, Hardegger, Hartmann (Champfèr), Heiz, Hitz-Rusch, Holzinger-Loretz, Kasper, Marti, Mathis, Michael (Donat), Michael (Castasegna), Müller, Niggli (Samedan), Paterlini, Rosa, Salis, Schutz, Steck-Rauch, Stiffler (Cuira), Tenchio, Thomann-Frank, Valär, Vetsch (Pragg-Jenaz), von Ballmoos, Waidacher, Weber, Weidmann, Wieland, Berther (Segnas), Bossi, Degiacomi, Hartmann-Conrad (Schiers), Natter, Pfister

Resposta da la regenza

Il chantun Grischun realisescha la nova politica regiunala da la confederaziun (NPR) sa basond sin la lescha federala davart la politica regiunala (CS 901.0) sco er sin l'art. 9 da la lescha per promover il svilup economic en il chantun Grischun (lescha davart il svilup economic, LSE; DG 932.100). Las contribuziuns ed ils credits vegnan concedids da la regenza, dal departament u da l'uffizi, tut tenor co che la lescha chantunala da finanzas vertenta ha fixà las cumpetenzas d'expensas. Ils chantuns èn obligads da conceder ina prestaziun finanziala ch'è equivalenta a quella dal credit federal NPR. Uschia ha mintga promoziun NPR obligatoricamain ina part federala ed ina part chantunala. Ils meds finanzials per ils credits federals derivan dal fond federal per il svilup regiunal. En cas da credits federals paja il chantun Grischun la prestaziun d'equivalenza pretendida en furma d'ina contribuziun à fonds perdu discontada che correspunda a l'import ed a la durada dal credit. Ord vista dals emprestants è quai pli attractiv ch'in credit, perquai che la contribuziun meglierescha la basa da l'agen chapital.

En la lescha federala davart la politica regiunala èsi francà da mantegnair a vista pli lunga da la valur dal fond per il svilup regiunal. Da quai resulta che las perditas per il fond ston esser uschè pitschnas sco pussaivel e ch'ils credits ston vegnir garantids uschè bain sco pussaivel. Tenor la lescha federala procuran ils chantuns per mesiras da controlla adattadas. L'administraziun da credits federals NPR è er chaussa dals chantuns che fixeschan er las cundiziuns per survegnir in credit. Tenor la lescha federala ston eventualas perditas da credits concedids vegnir purtadas per la mesadad dal chantun che als ha concedì.

Credits ad interpresas da teleferica (per construir implants da transport ed indrizs d'ennavar) èn en il Grischun dapi onns la part la pli gronda da tut ils credits federals NPR. Las ristgas per l'emprestader (chantun per incumbensa da la confederaziun) èn per regla in zic pli grondas tar projects da telefericas che tar auters projects da promoziun – la pratica en tut la Svizra mussa ch'i dat spezialmain savens difficultads d'amortisaziun tar interpresas da teleferica, sch'ils affars n'èn betg buns. Ina perdita totala (concurs e sco consequenza da quai la perdita per il donatur da la garanzia sco er per la confederaziun e per il chantun) n'hai anc mai dà en il Grischun. La pratica da promoziun dal chantun Grischun tar projects da telefericas na prevesa betg che vischnancas ston sa participar directamain vi da projects d'interpresas da teleferica cun contribuziuns da promoziun u cun in augment dal chapital d'aczias. Percunter han las vischnancas da prestar – tenor la pratica executiva da blers onns – obligaziuns eventualas (garanzia) en l'import dal credit federal concedì. Uschia vegnì garantì che la vischnanca da staziunament resguarda il project sco impurtant ed al sustegna e ch'ella surpiglia la rolla da la garanta envers la confederaziun, sche l'interpresa da teleferica ha eventualmain difficultads d'amortisar il credit. Perquai che interpresas da teleferica èn da gronda impurtanza turistica en tut las vischnancas; è l'integraziun da las vischnancas en la strategia da promoziun commensurada en questa furma.

La garanzia communala cumpiglia la mesadad da la promoziun totala, numnadamain il credit federal, e vegn duvrada mo, sche l'interpresa da teleferica n'è betg pli en cas da pajar ils pajaments d'amortisaziun. Grazia a sia prestaziun d'equivalenza (contribuziun à fonds perdu) cuvra il chantun en quest connex gia la mesadad d'ina eventuala perdita.

L'incumbensa sa basa sin ipotesas faussas e tira conclusiuns che na pon – sco descrit – mai capitar. Uschia èsi exclus en mintga cas ch'il chantun "s'enritgeschia". In'eventuala prestaziun da garanzia da vart da la vischnanca na vegn mai fatga a favur dal chantun. Ella cumpiglia mo quella part dal credit, che n'è betg pajada il mument da l'insolvenza, e sto vegnir prestada a la confederaziun. I sa tracta la finala da credits federals. En la glista da las garanzias publitgescha il chantun mintga onn ils imports da credit che n'è betg anc pajads e fa in giudicament da las ristgas. En quest connex sa tracti da 37 credits NPR che han in volumen da 22,4 milliuns francs (quint annual 2015).

La pratica executiva vertenta per conceder credits federals NPR ad interpresas da teleferica ed ad autras interpresas è sa cumprovada fitg. Las disposiziuns per garantir ils credits federals NPR na van betg pli lunsch che las prescripziuns federalas per mantegnair il fond federal per il svilup regiunal. Sa basond sin las explicaziuns qua survart propona la regenza perquai da refusar l'incumbensa.

24 d'avust 2016