Navigation

Inhaltsbereich

Sessiun: 18.10.2016

L'introducziun da tempo 30 sin vias lateralas, e sche necessari er sin vias principalas, è in grond avantatg per tut las participantas ed ils participants dal traffic. Il dumber d'accidents e da persunas blessadas sa sminuescha considerablamain ed er las immissiuns da canera sa reduceschan cleramain – e quai senza dischavantatgs da num e per custs minimals.

 

Fin avant 4 fin 5 onns era il chantun Grischun en l'entira Svizra in exempel areguard la concessiun da permissiuns da zonas da tempo 30. Las vischnancas pudevan laschar far las expertisas necessarias per introducir tempo 30 cun ina lavur administrativa raschunaivla da paucas paginas e cun custs da cleramain sut 10 000.– francs.

 

Dapi la sentenzia dal tribunal federal a favur da tempo 30 a Sumvitg e tras la nova directiva chantunala "Quietar il traffic entaifer il vitg" ch'è vegnida relaschada sin basa da quai, èn la lavur per in'expertisa correspundenta sco er ils custs respectivs sa multiplitgads per duas fin trais giadas. Questa lavur e quests custs supplementars n'èn strusch d'explitgar, cunquai ch'i valan sin plaun federal dapi l'onn 2002 las medemas pretensiuns envers in'expertisa da temp 30 en il senn d'in "rapport curt".

 

Dumondas a la regenza:

 

1. N'è la regenza betg er da l'avis che l'introducziun da tempo 30 duai puspè succeder – sco pli baud – en moda pli simpla, pli svelta e pli nunbirocratica?

 

2. Tge rolla po e duai il tempo 30 giugar en il rom da la sanaziun da las vias chantunalas engrevgiadas cun canera, pretendida fin l'onn 2018 tenor la legislaziun davart la protecziun da l'ambient?

 

3. Tenor in artitgel dal Bündner Tagblatt dals 22 da settember 2016 spetgan 37 dumondas avertas sin ina decisiun dal chantun. Fin cura pon las vischnancas pertutgadas quintar cun ina resposta positiva?

 

Cuira, ils 18 d'october 2016

 

Deplazes, Baselgia-Brunner, Atanes, Bucher-Brini, Cahenzli-Philipp, Caviezel (Cuira), Danuser, Dosch, Gartmann-Albin, Jaag, Jenny, Kappeler, Lamprecht, Locher Benguerel, Lorez-Meuli, Monigatti, Niggli-Mathis (Grüsch), Pedrini, Perl, Pult, Steiger, Thöny, von Ballmoos, Cantieni, Degiacomi, Horrer, Vassella

Resposta da la regenza

En l'art. 4a al. 1 lit. a da l'ordinaziun davart las reglas dal traffic sin via (ORT; CS 741.11) ha la confederaziun fixà la sveltezza maximala generala entaifer ils vitgs a 50 km/h. Per evitar u per sminuir privels spezials en il traffic sin via, per reducir ina contaminaziun sproporziunada da l'ambient u per meglierar la circulaziun dal traffic po l'autoritad cumpetenta ordinar divergenzas da las sveltezzas maximalas generalas per tscherts trajects da via. Avant che fixar sveltezzas maximalas divergentas vegni sclerì a maun d'ina expertisa, sche la mesira è necessaria, adequata e proporziunala u sch'i ston vegnir preferidas autras mesiras (cf. art. 108 al. 2 e 4 da l'ordinaziun davart la signalisaziun da las vias [OSV; CS 741.21]).

1. L'onn 2001 ha la confederaziun simplifitgà l'introducziun da zonas da tempo 30, quai che ha chaschunà in ferm augment da las dumondas en il Grischun. Sin quai ha la cumissiun chantunala per la determinaziun da sveltezzas maximalas differenziadas per il traffic sin via (cumissiun) elavurà la "directiva chantunala per quietar il traffic entaifer il vitg" (directiva), che la regenza ha approvà ils 15 da mars 2005. Ella serviva sco agid per garantir in tractament giuridicamain egual. La directiva cuntegneva differents criteris per decider davart l'introducziun da zonas da tempo 30. In criteri central e simpel d'applitgar era l'uschenumnada valur V85, che correspunda a la sveltezza che na vegn betg surpassada dad 85 % da tut las participantas e participants dal traffic.

En il rom d'in recurs cunter la nunintegraziun da la via principala a Sumvitg è la dretgira administrativa dal Grischun vegnida a la conclusiun che la valur V85 saja pauc adattada per sclerir la necessitad d'ina zona da tempo 30. En dumondas spezialisadas na possian ins plinavant betg divergiar d'ina expertisa senza motivs stringents, ed eventualas divergenzas stoppian vegnir motivadas. Il tribunal federal ha confermà questa decisiun (DTF 139 II 145).

Uschia è l'expertisa daventada il criteri da decisiun central, e la libertad da decider da las autoritads responsablas è sa reducida fermamain. A chaschun da la procedura davant il tribunal federal era l'uffizi federal da vias (UVIAS) sa fatschentà cun l'expertisa da Sumvitg ed aveva qualifitgà quella en divers puncts sco nunexacta e nuncumpletta. En general èsi vegnì constatà che cunzunt la qualitad da las expertisas pli pretensiusas cun l'integraziun da vias orientadas al traffic variava fermamain. Per tegnair quint da la giurisdicziun dal tribunal federal e per garantir la qualitad necessaria da las expertisas ha stuì vegnir adattada la directiva.

La procedura sco tala n'è betg pli cumplitgada ed er betg pli birocratica che pli baud, e tras quai che la cumissiun ha augmentà il dumber da sesidas, pon las dumondas da las vischnancas vegnir tractadas oz pli svelt. Unicamain per l'expertisa valan pretensiuns pli grondas. In return a la pratica chantunala anteriura n'è betg pussaivla pervia da las prescripziuns dal dretg federal e da las dretgiras. Actualmain vegni dentant discutà sin plaun federal da laschar crudar l'obligaziun da far in'expertisa per introducir zonas da tempo 30 sin vias orientadas a l'abitadi.

2. La sveltezza maximala generala po vegnir reducida per motivs da la protecziun cunter la canera, sch'ina contaminaziun sproporziunada da l'ambient en il senn da la legislaziun davart la protecziun da l'ambient po vegnir reducida qua tras e sch'il princip da commensurabladad vegn mantegnì. Areguard l'examinaziun, sch'ina reducziun da la sveltezza è ina mesira proporziunala per reducir la canera, stoi vegnir resguardà che vias chantunalas èn da princip vias orientadas al traffic. Tenor la giurisdicziun dal tribunal federal èsi admissibel d'introducir zonas da tempo 30 sin vias orientadas al traffic mo excepziunalmain e sut las premissas da l'art. 108 al. 2 OSV (DTF 136 II 539, consideraziun 2.2).

Ensemen cun l'uffizi per la natira e l'ambient lavura l'uffizi da construcziun bassa dal Grischun vi da differents projects per sanar las vias chantunalas cunter la canera, per part cun l'integraziun da vias communalas. Ils projects vegnan coordinads cun las proceduras per zonas da tempo 30 tar la polizia chantunala e tar il departament da giustia, segirezza e sanadad.

3. Actualmain èn avertas tar la polizia chantunala 27 dumondas da vischnancas, ed ultra da quai han lieu scleriments preliminars tar trais vischnancas. Tar 20 da las 27 dumondas spetga la polizia chantunala che las vischnancas inoltreschian in'expertisa. Set dumondas èn en la fasa da scleriment resp. da permissiun. En duas ulteriuras zonas da tempo 30 gia permessas ston las vischnancas anc montar la signalisaziun. La cumissiun giuditgescha actualmain quatter giadas per onn las dumondas. Uschespert che las dumondas da las vischnancas incl. las expertisas èn avant maun, vegnan ellas elavuradas tras la polizia chantunala e tractadas da la cumissiun a chaschun da la proxima sesida.

12 da schaner 2017