Navigation

Inhaltsbereich

Sessiun: 07.12.2016

Ils 18 d'october 2016 hai dà in cas da "suicidi assistì" d'ina persuna da l'exteriur sin il territori communal da San Vittore. Las dumondas che resultan qua tras ston vegnir tschentadas a l'executiva chantunala. L'autoritad communala n'era infurmada ni davart l'intent da l'abitaziun, nua ch'il suicidi è vegnì fatg, ni ch'i sa tractia d'ina activitad da gudogn (per activitads da gudogn ston ins dumandar ina permissiun). Senza vulair tractar las prescripziuns giuridicas fundamentalas davart la cumplicitad ad in suicidi, che n'èn apparentamain betg vegnidas violadas, sco er senza tematisar dumondas eticas, chaschuna la pratica sco tala dumondas. Il medem vala per las persunas ch'èn involvidas en activitads che pudessan degenerar ad in fenomen dal "turissem da la mort" en il Moesano.

Il Moesano ha stretgs contacts cun il Tessin ed enconuscha bain ils problems dal Tessin. Medemamain enconuschentas èn las mesiras politicas ch'èn vegnidas prendidas per far frunt a mancanzas ed a displaschairs che resultan per part da la vischinanza dal Tessin a l'Italia. En quest reguard èn las deputadas ed ils deputads dal Tessin s'engaschads – il pli tard a partir da la primavaira 2016 – per scuvrir cas da "suicidi assistì" en lur chantun. Uschia èsi reussì d'impedir societads e persunas da l'exteriur da pratitgar lur activitads en il sectur da sanadad. Quellas pratitgavan numnadamain lur activitads senza la scolaziun necessaria, senza transparenza areguard il dumber da suicidis, areguard las modalitads ed areguard las entradas che resultavan sco er senza infurmaziuns davart la naziunalitad da las persunas mortas e davart la sedia da lur societads u da lur uniuns (vesair intervenziuns da la deputada e dals deputads tessinais Ghisletta, Dadò e Rückert, l'ultima dals 6 da matg 2016), e.u.v. La deputada ed ils deputads èn sa concentrads en spezial sin l'uniun Liberty Life. A la titulara da questa uniun ha la regenza dal chantun Tessin retratg la permissiun da manaschi la fin da l'onn 2015. La persuna pertutgada ha alura transferì la sedia da sia uniun, che ha oz il num "Nuovi Orizzonti", da Biasca (TI) a Cama (GR). Dal register da commerzi resultan repetidamain liquidaziuns e novas fundaziuns da la societad numnada. L'ultima ha gì lieu ils 6 da settember 2016. La titulara n'ha apparentamain anc mai dumandà ina permissiun da manaschi per il Grischun. Quest fatg lascha concluder ch'igl èn activas en questa uniun autras figuras professiunalas cun cumpetenzas e persunalitad dubiusas (sco quai ch'igl ha pudì vegnir constatà), che disponan d'ina permissiun emessa dal chantun Grischun.

Cun l'intent da cumbatter cunter la derasaziun d'in fenomen en noss chantun (il Tessin ha gia prendì mesiras correspundentas) ch'è sensibel per cuntravenziuns tant areguard la procedura (illegalitad) sco er areguard la dignitad umana (localitads, metodas, persunas dubiusas) ed areguard il gudogn simpel u illegal (summas memia autas en vista a la prestaziun), suttamet jau las suandantas dumondas a la regenza:

1. Ha la regenza enconuschientschas d'ina rait da persunas spezialisadas dal sectur da sanadad che lavura pli u main illegalmain en il Moesano?

2. Ha il chantun Grischun in program per controllar la scolaziun da persunas che lavuran independentamain e la qualitad da lur prestaziuns medicalas e da tgira, en spezial da quellas da l'exteriur?

3. Tge cumpetenzas professiunalas ston las persunas avair che pratitgeschan il "suicidi assistì", cunquai che questas activitads pretendan ina tscherta assistenza?

4. Ston las persunas che pratitgeschan il "suicidi assistì" en il chantun Grischun observar protocols che correspundan a las directivas da la cumissiun centrala d'etica da l'academia svizra da las scienzas medicalas?

5. Tgi surpiglia las spesas (polizia, medias e medis, documentaziun) per persunas che derivan d'ordaifer (exteriur, auters chantuns)?

6. Tge infurmaziuns duain las vischnancas survegnir en chaussa?

Cuira, ils 7 da december 2016

Noi-Togni, Della Vedova, Atanes, Burkhardt, Crameri, Deplazes, Dermont, Joos, Michael (Castasegna), Monigatti, Papa, Zanetti, Derungs, Lombardi, Wellig

Resposta da la regenza

Tenor l'art. 10 da la constituziun federala da la confederaziun svizra (Cst.; CS 101) ha mintga uman il dretg da la vita ed il dretg da la libertad persunala. La resposta a la dumonda, quant enavant che er il dretg da pudair decider sez davart sia atgna mort tutga tar il dretg da la vita dependa – ultra dals aspects giuridics – da la tenuta da basa etica e religiusa da mintga singula persuna. Il giudicament etic-religius da l'eutanasia e da l'accumpagnament d'ina persuna a la fin da sia vita è ina decisiun fitg persunala che dependa da las circumstanzas dal cas singul. La regenza na sa considerescha correspundentamain betg sco legitimada da far in giudicament etic-religius da l'eutanasia e da l'accumpagnament d'ina persuna a la fin da sia vita.

En cas dal giudicament giuridic stoi vegnir differenzià, sch'i sa tracta d'ina eutanasia directa activa, d'ina eutanasia indirecta activa u d'ina eutanasia passiva. L'eutanasia directa activa (mazzament intenziunà per scursanir las suffrientschas d'in auter uman) è chastiabel tenor l'art. 111 (mazzament intenziunà), art. 113 (mazzament) u art. 114 (mazzament sin giavisch da la victima) dal cudesch penal svizzer (CP; CS 311.0). Percunter n'èn l'eutanasia indirecta activa (per mitigiar suffrientschas vegnan duvrads meds che pon – sco effect secundar – reducir la durada da la vita) e l'eutanasia passiva (renunzia u sistida da mesiras che mantegnan la vita) betg regladas en la lescha. Da princip valan ellas sco permessas. Tenor l'art. 115 CP vegn chastià tgi che instighescha insatgi per motivs egoistics al suicidi u presta agid per quest intent.

En cas da suicidis accumpagnads sa tracti da cas da mort extraordinaris che ston vegnir annunziads a la procura publica. Suenter l'annunzia fa quella ina procedura per examinar la dumonda, sch'i sa tracta d'in act chastiabel d'ina persuna participada.

Respostas a las dumondas:

1. La regenza n'enconuscha naginas raits da persunas spezialisadas dal sectur da la sanadad che porschan eutanasia en il Mesauc. En quest connex stoi vegnir constatà che l'eutanasia indirecta u passiva po vegnir purschida senza permissiun.

2. Na. Tenor l'art. 58 da la lescha federala davart l'assicuranza da malsauns (LAMal; CS 832.10) en cumbinaziun cun l'art. 77 da l'ordinaziun davart l'assicuranza da malsauns (OAMal; CS 832.102) èsi chaussa dals furniturs da prestaziuns u da lur federaziuns da garantir la qualitad. Las modalitads da la realisaziun vegnan regladas en contracts cun las assicuranzas u cun lur federaziuns.

Las directivas federalas e chantunalas da la polizia da sanadad u da la garanzia da qualitad ston ademplir tant burgaisas e burgais svizzers sco er esters.

Ord vista giuridica n'èn l'eutanasia indirecta activa u l'eutanasia passiva naginas prestaziuns da tgira en il senn da la legislaziun federala u chantunala respectiva. Eventualmain po l'eutanasia vegnir qualifitgada sco assistenza respectivamain sco accumpagnament che na suttastat er betg ni a la legislaziun federala respectiva ni a quella chantunala. Correspundentamain na suttastattan questas persunas spezialisadas dal sectur da la sanadad betg a la legislaziun correspundenta.

L'uffizi da sanadad intervegn tar persunas culpaivlas, sch'el ha enconuschientscha da cuntravenziuns cunter la legislaziun da sanadad.

3. I na dat naginas prescripziuns legalas davart la scolaziun ch'ina persuna, che porscha l'eutanasia indirecta activa u l'eutanasia passiva sto avair.

4. Perquai ch'i na dat naginas prescripziuns legalas davart las premissas professiunalas e davart las obligaziuns professiunalas dals purschiders d'eutanasia indirecta activa u d'eutanasia passiva, na pon per quests purschiders betg vegnir decleradas sco applitgablas las directivas da l'academia svizra da las scienzas medicalas.

5. Ils custs per ina procedura ch'è vegnida averta da la procura publica pervia d'eutanasia van, sche la procedura vegn sistida pervia da la giurisdicziun respectiva da la dretgira chantunala, per regla a donn e cust da la cassa chantunala (dretgira chantunala dals 20 da fanadur 2011 en chaussa J.N.). La noziun dals custs da procedura cumpiglia tut ils custs che resultan per cuvrir la lavur e las expensas en il cas penal concret (art. 22 dal cudesch da procedura penala svizzer, CPP; CS 312.0).

6. Pervia dal fatg che las vischnancas n'èn partida ni en la procedura da la polizia da sanadad ni en la procedura penala n'è il dar vinavant d'infurmaziuns davart l'eutanasia sin lur territori betg admess tant ord vista processuala sco er ord vista da la protecziun da datas.

22 da favrer 2017