Zum Seiteninhalt

Dumonda Gunzinger concernent il svilup dals tractaments staziunars da Grischunas e Grischuns en ospitals e clinicas extrachantunalas

sessiun: 15.02.2017

En il rapport davart il svilup economic en il chantun Grischun dals 8 da fanadur 2014 per mauns dal cussegl grond ha la regenza fixà la suandanta finamira per il sectur da la sanadad (missiva carnet nr. 5 / 2014-2015, p. 301 ss.):

La quota da las Grischunas e dals Grischuns che sa laschan tractar senza raschuns medicinalas en in ospital extrachantunal duai vegnir minimada.

En sia resposta dals 19 da november 2015 a mia dumonda concernent la nova finanziaziun dals ospitals ha la regenza explitgà:

 • ch'il dumber da cas staziunars extrachantunals è s'augmentà fin la fin da l'onn 2013 tenor la statistica medicinala da l'uffizi federal da statistica (UST) per 5 % dapi l'entrada en vigur da la nova finanziaziun dals ospitals il 1. da schaner 2012;

• ch'il dumber da cas staziunars extrachantunals, als quals il chantun ha stuì sa participar finanzialmain (tractaments en ospitals da la glista d'ospitals dal chantun Grischun u dal chantun da staziunament sco er tractaments per motivs medicinals en in ospital che na figurescha betg sin la glista d'ospitals dal chantun Grischun), è sa triplà dapi l'entrada en vigur da la nova finanziaziun dals ospitals (funtauna: glista interna da l'uffizi da sanadad).

En quest connex ha ella constatà che betg tuts n'hajan il sentiment, ch'il chantun disponia d'instituziuns extraordinarias en il sectur dals fatgs da sanadad che sajan en cas da far ina gronda part da las operaziuns giavischadas che vegnan fatgas ordaifer il chantun, e quai en ina qualitad almain uschè buna. En quest senn stoppian la populaziun ed ils furniturs da prestaziuns assegnants vegnir sensibilisads per il fatg che las atgnas instituziuns vegnian resguardadas sche pussaivel en cas d'operaziuns giavischadas.

Perquai ch'igl è passà in tschert temp dapi la resposta da la regenza e perquai che la tematica è d'ina impurtanza eminenta per il Grischun sco plazza d'ospitals, sa vesan las sutsegnadras ed ils sutsegnaders intimads da suttametter a la regenza las suandantas dumondas en quest connex:

1. Co è il dumber da tractaments staziunars extrachantunals da Grischunas e Grischuns en ospitals e clinicas extrachantunalas sa sviluppà fin la fin da l'onn 2016 dapi l'introducziun da la nova finanziaziun dals ospitals l'onn 2012?

2. Co èn las expensas dal maun public (chantun/vischnancas) e da las assicuranzas sa sviluppadas fin la fin da l'onn 2016 per tractaments extrachantunals da Grischunas e Grischuns dapi l'introducziun da la nova finanziaziun dals ospitals l'onn 2012?

3. Sco quant gronda stima la regenza la deflussiun da meds finanzials dal maun public e da las assicuranzas pervia da tractaments staziunars extrachantunals che n'èn betg inditgads medicinalmain?

4. Tge han fatg ils ospitals, l'uniun grischuna da medias e da medis ed il chantun per realisar la finamira formulada en la part introductiva qua survart? Tge quinta il chantun da far supplementarmain?

5. Vesa la regenza ina pussaivladad ch'i pudess vegnir messa a disposiziun ina purschida correspundenta en il Grischun per gruppas da prestaziuns d'ospital, tar las qualas è inditgà in tractament extrachantunal per motivs medicinals?

Cuira, ils 15 da favrer 2017

Gunzinger, Caduff, Buchli (Tenna), Albertin, Baselgia-Brunner, Berther (Mustér), Blumenthal, Brandenburger, Burkhardt, Cahenzli-Philipp, Caluori, Casanova (Glion), Casanova-Maron (Domat), Casutt-Derungs, Cavegn, Caviezel (Cuira), Caviezel (Tavau Clavadel), Claus, Clavadetscher, Crameri, Danuser, Darms-Landolt, Della Vedova, Dermont, Dosch, Engler, Epp, Fasani, Felix (Scuol), Foffa, Gartmann-Albin, Geisseler, Giacomelli, Hardegger, Heiz, Holzinger-Loretz, Hug, Jeker, Jenny, Kappeler, Kasper, Kollegger, Komminoth-Elmer, Kunfermann, Kunz (Fläsch), Kunz (Cuira), Kuoni, Märchy-Caduff, Marti, Mathis, Michael (Castasegna), Monigatti, Müller, Nay, Niederer, Niggli-Mathis (Grüsch), Papa, Paterlini, Pedrini, Peyer, Pfenninger, Pult, Salis, Schutz, Steck-Rauch, Steiger, Stiffler (Cuira), Thomann-Frank, Thöny, Tomaschett (Breil), Tomaschett-Berther (Trun), Troncana-Sauer, Valär, Vetsch (Claustra Vitg), von Ballmoos, Waidacher, Weidmann, Widmer-Spreiter, Wieland, Andri, Calonder, Gugelmann, Niederberger-Schwitter, Stäbler, Wellig

Resposta da la regenza

La regenza respunda las dumondas sco suonda:

1. Tenor la statistica medicinala da l'uffizi federal da statistica (UST) hai dà il suandant svilup tar las ospitalisaziuns da pazientas e pazients cun domicil en il Grischun en manaschis extrachantunals:

-

Las datas 2016 vegnan a vegnir publitgadas dal UST pir il cumenzament da l'onn 2018. I sa mussa ina creschientscha da 4 pertschient dals onns 2012 fin 2015.

Il dumber da cas staziunars extrachantunals, als quals il chantun ha stuì sa participar finanzialmain (tractaments en ospitals da la glista d'ospitals dal chantun Grischun u dal chantun da staziunament sco er tractaments per motivs medicinals en in ospital che na figurescha betg sin la glista d'ospitals dal chantun Grischun), è sa sviluppà sco suonda (funtauna: glista interna da l'uffizi da sanadad, stadi dals cas 2016, mez mars 2017):

-

Qua sa mussa ina creschientscha da 15 pertschient dals onns 2012 fin 2015. La facturaziun da blers manaschis extrachantunals n'è betg anc cumpletta per l'onn 2016. Correspundentamain dastgassan las cifras 2016 anc vegnir s'auzar.

2. Las expensas dal maun public per il tractament da pazientas e pazients grischuns en manaschis extrachantunals èn sa sviluppadas sco suonda:

-

Qua sa mussa ina creschientscha da 17 pertschient dals onns 2012 fin 2015 e da 21 pertschient dals onns 2012 fin 2016.

3. Indicaziuns precisas davart l'autezza da la deflussiun da meds finanzials pervia da tractaments staziunars extrachantunals che n'èn betg inditgads medicinalmain na sa laschan betg far. La regenza fa quint cun ina deflussiun da meds finanzials dal maun public d'almain 30 fin 40 pertschient da las expensas dal maun public e dals assicuraders da malsauns che importan actualmain circa 65 milliuns francs per cas che n'èn ni inditgads medicinalmain ni urgents.

4. Da vart dals ospitals èn vegnidas prendidas differentas mesiras per franar la deflussiun da pazientas e pazients grischuns en auters chantuns. Uschia porscha p.ex. l'ospital da Scuol da nov prestaziuns staziunaras er en il sectur da la medischina cumplementara ch'èn vegnidas integradas en l'incarica da prestaziun en il rom da la glista d'ospitals. Er a Scuol è vegnida etablida ina purschida da reabilitaziun per ils secturs da l'oncologia e da la psicosomatica. A Schiers ed a Fläsch èn vegnidas stgaffidas novas pussaivladads cun la nova construcziun d'ospitals che permettan d'extender la purschida sin in nivel aut sin basa d'ina infrastructura moderna. Sche pussaivel vegnan dischlocaziuns necessarias fatgas entaifer il chantun. In ulteriur focus han ils ospitals mess sin la collavuraziun cun ils medis locals sco er sin la lavur generala da publicitad per render pli enconuschentas las pussaivladads da lur purschida.

L'uniun grischuna da medis ha gia baud rendì attent ses commembers a la problematica dals tractaments staziunars extrachantunals che n'èn betg inditgads medicinalmain. Il departament da giustia, segirezza e sanadad è ultra da quai sa drizzà da sia vart a las medias ed als medis en il chantun cun la supplica da s'engaschar che lur pazientas e pazients sa laschian tractar en in ospital intrachantunal uschenavant che quai è pussaivel.

La regenza ha integrà en la glista d'ospitals novas prestaziuns dals manaschis intrachantunals. Il departament da giustia, segirezza e sanadad sco er l'uffizi da sanadad vegnan a s'engaschar vinavant cun differentas mesiras che tut ils medis e tut ils ospitals recumondian a lur pazientas e pazients da duvrar las purschidas da tractament en il chantun Grischun.

5. La regenza ha ina tenuta averta envers in'ulteriura examinaziun da l'extensiun da purschidas en ils ospitals ed en las clinicas dal Grischun, sche las premissas qualitativas per inscriver questas prestaziuns en la glista d'ospitals èn ademplidas. Perquai ha il departament da giustia, segirezza e sanadad dumandà il schaner 2017 tut ils ospitals d'inoltrar propostas per metter a disposiziun ina purschida intrachantunala per gruppas da prestaziuns d'ospital, tar las qualas è inditgà in tractament extrachantunal per motivs medicinals. Fin oz n'èn vegnidas inoltradas naginas propostas concretas. Correspundentamain na vesa la regenza actualmain anc nagina pussaivladad d'integrar en l'incarica da prestaziun d'in ospital gruppas da prestaziuns d'ospital, tar las qualas è inditgà anc oz in tractament extrachantunal per motivs medicinals.

21 d'avrigl 2017