Navigation

Inhaltsbereich

Dumonda Bucher-Brini concernent la digitalisaziun en il sectur da sanadad (eHealth)

Sessiun: 19.04.2017

Cun l'entrada en vigur da la lescha federala davart il dossier electronic dal pazient (LDEP) l'onn current (2017) è il megatrend da la digitalisaziun er arrivà definitivamain en il sectur svizzer da sanadad (eHealth). Entant ch'ils ospitals e las clinicas ston s'associar entaifer 3 onns suenter l'entrada en vigur da la LDEP ad ina cuminanza certifitgada dad eHealth, è la participaziun ad ina tala cuminanza per barattar datas digitalas facultativa per las medias ed ils medis ch'èn domiciliads sco er per las pazientas ed ils pazients.

Per realisar il dossier electronic dal pazient èn gia vegnids fixads detagliadamain singuls standards tecnics dad eHealth, e la dumonda, co ir enturn cun las datas electronicas dal pazient è tendenzialmain vegnida surreglamentada. Actualmain mancan en la realitad deplorablamain anc ils process ch'èn necessaris per cuntanscher en il tractament da pazients ils standards electronics necessaris e las cundiziuns generalas organisatoricas sut la premissa da la segirezza e da la permeabilitad.

Cunquai che la digitalisaziun ed ils models dal provediment integrà dals pazients influenzeschan e sustegnan in l'auter fissi d'avantatg, sche quests dus elements constitutivs dal provediment futur da la sanadad, ch'èn centrals gist per il chantun Grischun perifer, vegnissan sviluppads maun en maun. Quai tant pli, perquai che la clav per cuntanscher l'equiliber tranter la qualitad ed ils custs d'in tractament è la colliaziun en il cas ideal da tut ils acturs entaifer la chadaina da tractament medicinala. Cunquai che l'assistenza ed il tractament da persunas malsaunas vegnan pli e pli spezialisads, sa la persuna spezialisada che tracta la persuna avant u suenter, oz savens mo incumplettamain, tge che la persuna spezialisada ha fatg avant u vegn a far suenter. Talas perditas d'infurmaziun chaschunan adina puspè diagnosticas surdimensiunadas, duplicitads e cas d'urgenza. Il chantun Grischun dovra urgentamain in masterplan per in sectur da sanadad digital entretschà dal tuttafatg. Manegià èsi, che tut ils partenaris da provediment da l'entira chadaina da tractament dals pazients vegnian colliads fisicamain e sustegnids digitalmain.

Cun il project „BlueConnect by KSGR“ (https://www.ksgr.ch/blueconnect.aspx) sustegnan la rait da medis Grisomed e l'ospital chantunal dal Grischun gia cuminaivlamain in model empermettent che collia ils elements constitutivs provediment integrà ed eHealth. Quest model porscha directamain ina basa per in masterplan "Provediment integrà da la sanadad en il Grischun".

En quest connex sa tschentan las suandantas dumondas:

1. Tge strategia ha la regenza en vista a la digitalisaziun en il sectur da sanadad?

2. Po il project „BlueConnect by KSGR“ (provediment integrà ed eHealth) vegnir promovì, per ch'el saja utilisabel pli svelt per uschè blers partenaris da provediment sco pussaivel a favur dal bainstar da las pazientas e dals pazients?

Cuira, ils 19 d'avrigl 2017

Bucher-Brini, Casty, Caduff, Atanes, Baselgia-Brunner, Brandenburger, Cahenzli-Philipp, Caluori, Casanova-Maron (Domat), Cavegn, Caviezel (Cuira), Danuser, Darms-Landolt, Davaz, Deplazes, Dermont, Florin-Caluori, Gartmann-Albin, Geisseler, Gunzinger, Hitz-Rusch, Jeker, Kasper, Koch (Igis), Locher Benguerel, Lorez-Meuli, Mani-Heldstab, Märchy-Caduff, Monigatti, Müller, Nay, Niederer, Niggli (Samedan), Noi-Togni, Papa, Pedrini, Perl, Peyer, Pult, Salis, Schneider, Steiger, Stiffler (Cuira), Thöny, Tomaschett-Berther (Trun), Toutsch, Widmer-Spreiter, Wieland, Berther (Segnas), Cantieni, Gugelmann, Hartmann-Conrad (Schiers), Pfister, Spreiter

Resposta da la regenza

Cun la plattafurma da communicaziun "BlueConnect" da la firma BlueCare SA exista dapi l'atun 2015 ina purschida simpla per la communicaziun tranter las praticas da medi e lur partenaris. Questa purschida sa basa dentant sin datas nunstructuradas, da las qualas pon però vegnir extratgas datas administrativas da pazientas e pazients. Il transfer da datas tranter l'ospital chantunal dal Grischun e las medias ed ils medis associads è s'augmentà da pauc dapli che 50 il schaner 2016 sin passa 770 il favrer 2017. Sin plaun svizzer è il dumber s'augmentà en la medema perioda da circa 250 sin passa 12 000 transfers.

En il rom d'in project cuminaivel cun l'ospital chantunal dal Grischun è vegnì realisà dal november 2015 fin il fanadur 2016 il project "BlueConnect by KSGR". Il project è vegnì terminà cun in concept specific per colliar l'ospital chantunal dal Grischun cun la plattafurma "BlueConnect". Cun quest project duess il barat da datas per collocaziuns en in ospital e per il transferiment da rapports vegnir meglierà sin basa da datas structuradas senza rupturas tranter ils mediums. L'ospital chantunal dal Grischun ha suspendì la decisiun da realisaziun fin a l'elecziun dal purschider da la plattafurma dad eHealth sidost (realisaziun da la lescha federala davart il dossier electronic dal pazient [LDEP]).

La regenza respunda las dumondas sco suonda:

1. Il departament da giustia, segirezza e sanadad ha relaschà il 1. da december 2015 la strategia dad eHealth per il chantun Grischun. Quella cuntegna ils trais suandants princips:
• Il chantun garantescha il provediment da la sanadad suffizient ed economicamain supportabel da sia populaziun. El procura per cundiziuns generalas adattadas, regulescha las prestaziuns da provediment e sustegna las stentas per augmentar la qualitad e la rentabilitad, inclusiv l'utilisaziun da tecnologias d'infurmaziun e da communicaziun (eHealth).
• Il chantun na chapescha eHealth betg sco servetsch public, mabain sco incumbensa concepziunala e tecnica cuminaivla dals furniturs da prestaziuns.
• Il chantun promova la diffusiun dad eHealth cun sustegnair l'installaziun da cumponentas d'infrastructura organisatoricas e tecnicas centralas ch'èn necessarias. En quest connex porscha el sustegn cun coordinar e cun colliar ils furniturs da prestaziuns ed ulteriurs acturs, cun represchentar ils interess da la populaziun sco er da las pazientas e dals pazients, cun infurmar la populaziun e cun far diever d'atgnas resursas persunalas.

2. "BlueConnect by KSGR" po esser in med auxiliar en connex cun la realisaziun dal barat da datas tranter l'ospital chantunal dal Grischun e las praticas da medi, e quai sco uschenumnada ultima miglia. Qua stoi però vegnir fatg attent ch'i dat sin il martgà gia differents purschiders che mettan a disposiziun soluziuns sumegliantas. Pervia dal dumber da differents purschiders en quest sectur n'èsi betg cunvegnent ch'il chantun dettia la preferenza ad in purschider.

Sut l'aspect da la qualitad da las datas e per evitar rupturas tranter ils mediums è l'integraziun cumpletta da las praticas da medi en in dossier (decentral) structurà dal pazient la meglra soluziun. Cunquai che la confederaziun ha, cun relaschar la LDEP, dentant desistì d'obligar las praticas da far part d'ina cuminanza da tschep – uschenumnada libertad dubla, pia libertad da las pazientas e dals pazients e da las praticas da manar in dossier electronic dal pazient –, vegn quai però a durar ditg. "BlueConnect by KSGR" sco er products da concurrenza pon servir sco soluziuns intermediaras durant quest temp.

Perquai ch'il diever da tut ils servetschs da sanadad electronics per il provediment da la sanadad decentral che vegn giavischà en il chantun Grischun porta senza dubi avantatgs, giavischass la regenza che las praticas da medi en il chantun faschessan part d'ina cuminanza da tschep per manar dossiers electronics dal pazient. Er pass intermediars a questa finamira, sco il diever da "BlueConnect" respectivamain da "BlueConnect by KSGR" u d'auters products da concurrenza vegnan beneventads.

23 da zercladur 2017