Navigation

Inhaltsbereich

Sessiun: 19.04.2017

L'organisaziun da marketing dal lieu Greater Zurich Area SA (GZA) vegn purtada d'instituziuns e d'interpresas privatas e publicas. Ultra dal chantun Grischun è commembra er la banca chantunala grischuna. Cun il manader da l'uffizi per economia e turissem (UET) fa il chantun Grischun ultra da quai part dal cussegl d'administraziun da set persunas ed il schef dal departament d'economia publica e fatgs socials (DES) è commember dal cussegl da fundaziun.

Dal rapport annual 2016 ch'è cumparì ultimamain resorta il suandant: L'onn 2016 ha l'organisaziun da marketing dal lieu GZA domicilià – ensemen cun ses partenaris chantunals, regiunals ed urbans 101 interpresas estras en il spazi economic da Turitg. Las interpresas domiciliadas da nov l'onn da rapport 2016 han stgaffì 434 plazzas da lavur. Ellas planiseschan da stgaffir ils proxims 5 onns circa 1500 novas plazzas da lavur.

Il rapport annual sez consista per gronda part d'in discurs tranter il president dal cussegl d'administraziun Balz Hösly e la mainagestiun Sonja Wollkopf Walt davart l'onn da gestiun 2016. Cifras pli precisas, co ch'ils meds finanzials da las instituziuns privatas e publicas participadas èn vegnids impundids, na sa laschan chattar naginas, er betg sin la pagina d'internet da la GZA (https://www.greaterzuricharea.com).

Las sutsegnadras ed ils sutsegnaders tschentan perquai las suandantas dumondas a la regenza:

1. Quantas da las 101 interpresas ch'èn vegnidas domiciliadas l'onn 2016 èn sa chasadas en il chantun Grischun, quantas plazzas da lavur èn vegnidas stgaffidas directamain e quantas èn vegnidas permessas?

2. Co sa preschentan questas cifras per ils ultims 5 onns?

3. Tge contribuziuns pajan il chantun Grischun e la banca chantunala grischuna a la fundaziun resp. a la Greater Zurich Area SA?

4. Co giuditgescha la regenza l'operar da la Greater Zurich Area SA a favur da l'economia publica dal Grischun?

Cuira, ils 19 d'avrigl 2017

Peyer, Davaz, Stiffler (Cuira), Atanes, Baselgia-Brunner, Brandenburger, Bucher-Brini, Buchli-Mannhart, Burkhardt, Caduff, Cahenzli-Philipp, Caviezel (Cuira), Deplazes, Dermont, Dosch, Engler, Gartmann-Albin, Grass, Hitz-Rusch, Hug, Jaag, Jenny, Kappeler, Kasper, Koch (Igis), Komminoth-Elmer, Kunfermann, Kunz (Fläsch), Kuoni, Locher Benguerel, Marti, Monigatti, Müller, Nay, Noi-Togni, Perl, Pult, Salis, Steiger, Thöny, Valär, von Ballmoos, Weber, Wieland, Berther (Segnas), Gugelmann, Hartmann-Conrad (Schiers), Heini, Natter, Spreiter

Resposta da la regenza

La Greater Zurich Area (GZA) ha l'incumbensa da commerzialisar la plazza economica da Turitg ed ils territoris ch'èn cuntanschibels entaifer ca. 1 ½ ura cun il traffic privat u public davent da l'eroport da Turitg, sco er da domiciliar novas interpresas. Il chantun Grischun è dapi 16 onns conpurtader da la fundaziun «Marketing dal lieu Greater Zurich Area» (fundaziun). Ulteriurs purtaders èn ils chantuns Turitg, Schaffusa, Soloturn, Sviz, Glaruna, Zug ed Uri sco er la citad da Turitg e la regiun Winterthur. La GZA è l'unitad operativa da la fundaziun. La fundaziun ha l'incumbensa da procurar meds per finanziar l'activitad da la GZA.

Dumonda 1:
Da las 101 interpresas estras ch'èn sa domiciliadas l'onn 2016 en il perimeter da la GZA èn duas sa domiciliadas en il Grischun. Per l'emprim onn da gestiun, che vegn ad avair lieu pir suenter l'onn 2017, han quellas prognostitgà in potenzial da 66 plazzas da lavur e suenter 5 onns in potenzial da 125 plazzas da lavur. Cuntegnidas en questas cifras èn er domiciliaziuns en il perimeter da la GZA, ch'èn vegnidas realisadas dals chantuns GZA respectivs er senza il sustegn direct da la GZA. Sco interpresas estras valan interpresas ch'èn sa transferidas da l'exteriur en la GZA u interpresas / gruppas da firmas ch'existan gia en Svizra, ch'èn activas sin plaun internaziunal, ch'èn caracterisadas tras investiders esters e che han fundà novas interpresas e/u filialas en la GZA.

Dumonda 2:
Dal 2012 fin il 2016 èn sa domiciliadas 26 interpresas estras en il Grischun. Per l'emprim onn da gestiun han quellas prognostitgà in potenzial da 167 plazzas da lavur e suenter 5 onns in potenzial da 588 plazzas da lavur. Fin oz èn vegnidas stgaffidas 70 plazzas da lavur.

Dumonda 3:
Cun il conclus da la regenza nr. 276 dals 15 da mars 2016 è vegnida concedida a la fundaziun ina contribuziun annuala da 99 180 francs per la perioda 2016–2019. La commembranza da la banca chantunala grischuna en la fundaziun è in engaschament (commitment) cuminaivel da pliras bancas chantunalas. Il contract dura fin l'onn 2018 e la contribuziun annuala importa 27 500 francs.

Dumonda 4:
Sco conpurtader da la fundaziun vegn il chantun Grischun represchentà e promovì activamain sin plaun internaziunal sco part da la regiun metropolitana da Turitg. La preschientscha directa da la GZA sin martgads selecziunads porscha la pussaivladad da render enconuschent er il chantun Grischun ad in vast circul da clientella en mira. La participaziun activa dals chantuns purtaders ad occurrenzas da la GZA ed ad auters partenaris sco Switzerland Global Enterprise, visitas cuminaivlas tar clientella potenziala en mira e tar multiplicaturs sco er la participaziun a messas selecziunadas pussibilitescha er dad esser correspundentamain activ al lieu sin ils martgads en mira dal Grischun. Sch'ils chantuns purtaders ed ils partenaris privats na gidassan betg a finanziar il preventiv da la fundaziun da 4 milliuns francs (2016), na pudess il chantun Grischun betg cuntanscher questa preschientscha. Ultra da las consequenzas economicas directas – sco las investiziuns e la creaziun da plazzas da lavur en il rom da la domiciliaziun da novas interpresas en il chantun Grischun – vegn il spazi economic rinforzà tras las domiciliaziuns en tut ils chantuns da la GZA sco unitad. Quai augmenta l'attractivitad da la GZA per interpresas estras e creescha – tras las investiziuns e tras las plazzas da lavur – er schanzas per interpresas sco er lavurantas e lavurants dal Grischun.
Sin plaun politic porscha la fundaziun ina plattafurma per tractar temas da l'economia publica surregiunala e permetta in barat permanent sin plaun guvernamental, en spezial cun Turitg ch'è in partenari impurtant per il Grischun.

28 da zercladur 2017