Cuntegn da la pagina

Incumbensa Tomaschett (Breil) concernent l'aboliziun da las taxas da roaming en Svizra

sessiun: 13.06.2017

En Svizra èn ils pretschs da roaming in pèr giadas pli chars ch'ils pretschs per colliaziuns naziunalas. Cun ils instruments classics dal dretg da concurrenza na pon ins betg cumbatter ils pretschs da roaming auts. Perquai ch'il contract da telefonia mobila vala tant per ils servetschs da telefon internaziunals sco er naziunals, n'èn ils pretschs da roaming per las consumentas e per ils consuments per regla betg decisivs per la tscherna d'in abunament. Uschia n'exista per ils purschiders nagin grond squitsch da concurrenza d'offrir pretschs da roaming bass. Perquai mantegnan els lur grondas marschas sin ils servetschs da roaming. Senza intervenziun dal legislatur na vegnan ils pretschs da roaming betg sbassads en Svizra.

Per ils 15 da zercladur 2017 ha il parlament da la UE decidì che las taxas da roaming duain da princip vegnir abolidas. Percunter ha la UE fixà limitas maximalas per il commerzi a l'engrossa cun pretschs da roaming. Inclus èn ils 25 stadis da la UE sco er ils stadis d'ordaifer la UE Islanda, Norvegia e Liechtenstein, dentant betg la Svizra. Giasts europeics che fan vacanzas en il chantun da vacanzas Grischun na pon betg profitar da l'aboliziun da las taxas da roaming e ston pajar vinavant taxas da roaming autas durant lur vacanzas en Svizra. Il telefonin ha cuntanschì en il fratemp il status d'in basegn fundamental. Nus avain tut las infurmaziuns sin noss apparats mobils, uschia er quellas da nossa destinaziun da vacanzas, per exempel las prognosas da l'aura, las colliaziuns dal traffic, annunzias da stagnaziun dal traffic, plans e rapports da las pistas, chalender d'occurrenzas. Ultra da quai na sa ferma il svilup digital betg davant las organisaziuns turisticas resp. davant ils posts d'infurmaziun turistics.

La Svizra è daventada in insla da roaming en Europa ed è ussa l'unic pajais europeic che incassescha anc adina taxas da roaming da ses giasts. Quai è en ils egls da las sutsegnadras e dals sutsegnaders in ulteriur dischavantatg da concurrenza per il turissem svizzer e grischun.

Perquai che questas cundiziuns generalas pon – cuntrari a la fermezza dal franc – vegnir midadas senza problems, incumbenseschan las sutsegnadras ed ils sutsegnaders la regenza dal chantun Grischun – cun sustegn dals parlamentaris federals grischuns – da cumenzar cun tractativas cun la confederaziun (departament federal per ambient, traffic, energia e communicaziun [DATEC]), tenor las qualas las autoritads federalas duain vegnir supplitgadas instantamain d'abolir las taxas da roaming en Svizra, per che quest dischavantatg da concurrenza vegnia eliminà uschè svelt sco pussaivel.

Cuira, ils 13 da zercladur 2017

Tomaschett (Breil), Engler, Jeker, Alig, Atanes, Berther (Mustér), Bleiker, Blumenthal, Bondolfi, Bucher-Brini, Buchli-Mannhart, Burkhardt, Caduff, Caluori, Casanova (Glion), Casutt-Derungs, Cavegn, Caviezel (Cuira), Caviezel (Tavau Clavadel), Clalüna, Crameri, Darms-Landolt, Della Vedova, Dermont, Dosch, Dudli, Epp, Fasani, Florin-Caluori, Foffa, Gartmann-Albin, Geisseler Hans, Giacomelli, Grass, Hardegger, Jaag, Jenny, Joos, Kappeler, Kasper, Komminoth-Elmer, Kunfermann, Lamprecht, Lorez-Meuli, Märchy-Caduff, Michael (Donat), Monigatti, Müller, Niederer, Papa, Paterlini, Pedrini, Perl, Peyer, Pult, Sax, Schneider, Schutz, Stiffler (Tavau Plaz), Tenchio, Thomann-Frank, Tomaschett-Berther (Trun), Vetsch (Claustra Vitg), von Ballmoos, Zanetti, Altmann, Berther (Segnas), Bossi, Föhn, Gassmann, Geisseler Severin, Pfister, Plattner Gerber, Wellig

Resposta da la regenza

En connex cun la decisiun dal parlament da la UE d'abolir en general las taxas da roaming per ils 15 da zercladur 2017 e da fixar limitas maximalas liantas per il commerzi a l'engrossa cun pretschs da roaming resulta in dischavantatg da concurrenza per il turissem svizzer ed uschia er per il turissem grischun. Suenter ch'igl è vegnì enconuschent ch'er stadis sco il Liechtenstein, la Norvegia e l'Islanda fetschian part da questa nova regulaziun dals 28 stadis da la UE, è quest fatg gia vegnì tematisà en il parlament federal: En sia resposta dals 12 da zercladur 2017 a la dumonda parlamentara da cussegliera naziunala Kathy Riklin dals 7 da zercladur 2017 «Preisinsel Schweiz. Hohe Handy-Abonnementspreise und Roaming-Gebühren» (Curia Vista 17.5318) ha il cussegl federal giuditgà la problematica da roaming en cas da viadis en Europa sco «mitigiada», perquai che la clientella dovria purschidas cumbinadas che hajan inclus il roaming. Ultra da quai sajan avant maun alternativas cun WhatsApp u Skype che vegnian duvradas stediamain en Svizra ed a l'exteriur. Sin quai ha la cussegliera naziunala Elisabeth Schneider-Schneiter inoltrà ils 15 da zercladur 2017 ina moziun sco er ina iniziativa parlamentara «Tschüss Roaming-Insel Schweiz. Abschaffung zur Sicherung des Wirtschafts-, Handels- und Tourismusstandortes Schweiz» (Curia Vista 17.3476 e 17.457). Questas duas fatschentas n'èn anc betg vegnidas tractadas en il cussegl.

La regenza vesa il basegn d'agir en vista a l'economia da turissem: L'influenza da la digitalisaziun sin il cumportament dals giasts è incontestada. Betg mo avant e suenter il viadi, mabain er durant il segiurn èn giasts da temp liber e da fatschenta (p.ex. giasts d'in congress) colliads mobilmain en il chantun Grischun e spetgan che l'access a l'internet saja pussaivel dapertut ed adina. Las purschidas da WLAN da furniturs da prestaziuns turisticas, da destinaziuns e da vischnancas èn en quest connex ina part impurtanta da questa cuntanschibladad.
Ultra da questas purschidas è la rait da la telefonia mobila vinavant il sistem da communicaziun il pli impurtant. Perquai èsi fitg impurtant ch'i n'existian per las destinaziuns turisticas grischunas betg ulteriurs dischavantatgs da concurrenza envers las destinaziuns turisticas concurrentas da l'exteriur. La Svizra ed uschia er il chantun Grischun vegnan percepids ina giada dapli sco «insla da pretschs auts». Vitiers vegn en mintga cas la situaziun da la fermezza dal franc ch'engrevgescha il turissem grischun e svizzer. La regenza vesa en la situaziun actuala correspundentamain in ulteriur dischavantatg da concurrenza per las destinaziuns dal Grischun cumpareglià cun l'exteriur. Perquai è la regenza gia entrada en contact cun la presidenta da la confederaziun Doris Leuthard e l'ha supplitgada cun la brev dals 22 d'avust 2017 (CR 739) da procurar energicamain che la Svizra vegnia integrada en quest sistem da reglas.

En il senn da questas explicaziuns è la regenza pronta d'acceptar l'incumbensa e da s'engaschar sin plaun federal per ina svelta realisaziun.

23 d'avust 2017