Cuntegn da la pagina

Dumonda Atanes concernent il futur da las medias en il Grischun talian

sessiun: 14.06.2017

La fin da matg è vegnida terminada la procedura da consultaziun tar la revisiun parziala da l'ordinaziun federala davart radio e televisiun. Il rapport explicativ propona d'excluder il Moesano da la zona da provediment da radio e televisiun che cumpiglia il chantun Grischun. Cunter questa proposta ha la regenza cun dretg protestà energicamain. D'in pèr posiziuns inoltradas a l'uffizi federal da communicaziun resorta dal rest che la concessiunaria actuala n'adempleschia betg sia incumbensa per la zona da provediment da noss chantun areguard ils servetschs d'infurmaziun a favur da la minoritad dal Grischun talian.

D'agiuntar è la situaziun precara da numerusas medias dal Grischun talian: Sch'i na vegn betg chattada ina soluziun fin la fin da l'onn, vegn "La Voce del San Bernardino" a stuair serrar. Er las gasettas online "ilmoesano.ch" e "labregaglia.ch" sa chattan en ina situaziun finanziala fitg difficila, che metta seriusamain en dumonda lur survivenza en il proxim futur. Ultra da quai pon las duas medias puschlavinas surviver senza agid public mo grazia a l'engaschament instancabel da differentas voluntarias e da differents voluntaris.

Perquai dumondan las sutsegnadras ed ils sutsegnaders la regenza dal chantun Grischun il suandant:

1. È la regenza da l'avis ch'er la minoritad dal Grischun talian duess avair la pussaivladad da pudair profitar da medias en lingua taliana, che infurmeschan davart la realitad regiunala e chantunala e che garanteschan la diversitad d'opiniuns?

2. È la regenza pronta da reveder las prescripziuns fixadas en l'ordinaziun da linguas (art. 14 al. 1 lit. c), che reglan la finanziaziun da las medias en las linguas minoritaras en quel senn, ch'i vegn concedì a questas medias in sustegn effectiv, senza ch'i vegnian provocadas eventualas distorsiuns dal martgà?

3. Tge pussaivladads vesa la regenza per sustegnair finanzialmain a curta vista las medias en il Grischun talian, che han difficultads?

Cuira, ils 14 da zercladur 2017

Atanes, Casanova (Glion), Papa, Alig, Baselgia-Brunner, Bondolfi, Brandenburger, Bucher-Brini, Cahenzli-Philipp, Caluori, Caviezel (Cuira), Clalüna, Crameri, Darms-Landolt, Della Vedova, Deplazes, Dermont, Dosch, Fasani, Florin-Caluori, Gartmann-Albin, Giacomelli, Jaag, Jeker, Kollegger, Kunfermann, Locher Benguerel, Märchy-Caduff, Michael (Donat), Michael (Castasegna), Monigatti, Niederer, Noi-Togni, Pedrini, Perl, Peyer, Pfenninger, Pult, Salis, Schutz, Tenchio, Thomann-Frank, Thöny, Tomaschett (Breil), Tomaschett-Berther (Trun), von Ballmoos, Zanetti, Berther (Segnas), Geisseler Severin, Wellig

Resposta da la regenza

La regenza è senza auter conscienta che diversas interpresas da medias sa chattan actualmain en ina situaziun difficila. Per l'ina è quai d'attribuir a las midadas pli e pli sveltas en la branscha, particularmain a la concurrenza en il sectur digital, per l'autra al fatg che las cundiziuns generalas tradiziunalas vegnan messas en dumonda – en la discussiun publica – en ina furma sco quai ch'ins n'avess anc betg pudì imaginar avant intgins onns (chavazzin iniziativa "No Billag").

Questa situaziun difficila pertutga spezialmain ferm las medias pitschnas, uschia er las medias electronicas e las medias stampadas dal Grischun talian. Tge consequenzas negativas che pon resultar da quai gist er per linguas minoritaras, mussa actualmain la discussiun davart l'avegnir da las medias rumantschas.

En quest connex stoi vegnir menziunà:

1. Las medias electronicas e las medias stampadas n'èn betg suttamessas a la medema legislaziun en Svizra e vegnan finanziadas differentamain. Per part vegnan ellas cofinanziadas dal maun public. Lur concessiun resp. lur sustegn finanzial è suttamess a differents organs sin plaun federal resp. chantunal. En quest reguard na sa lascha betg dar a las dumondas fatgas ina resposta ch'è generalmain valaivla e che cumpiglia tut ils geners da medias.
2. La regenza presta gia oz ina contribuziun impurtanta a favur da las medias talianas, particularmain en il sectur stampà.

En vista a quests fatgs respunda la regenza las dumondas concretas sco suonda:

Tar la dumonda 1: Gea. Per quest motiv ha la regenza stgaffì per il sectur stampà la nova plazza da correspundent da la SDA per il Grischun talian a partir da l'avrigl 2017. En il sectur da las medias electronicas ha ella plinavant intervegnì cunter l'intenziun da la revisiun parziala da l'ordinaziun dal cussegl federal davart radio e televisiun, che vegn menziunada en la dumonda, numnadamain da divider il Grischun talian en connex cun las concessiuns da radio.

Tar la dumonda 2: Tenor l'art. 14 al. 1 lit. c da l'ordinaziun da linguas dal chantun Grischun dals 11 da december 2007 (OLing; DG 492.110) po il chantun surpigliar "10 fin 15 pertschient dals custs betg cuvrids da gasettas e da revistas rumantschas e talianas per indemnisar prestaziuns che mantegnan la lingua". Cun questa disposiziun conceda il chantun gia oz in sustegn supplementar a las linguas minoritaras per promover las linguas minoritaras chantunalas. Ma da questa pussaivladad èsi strusch vegnì fatg diever dapi l'entrada en vigur da la OLing l'onn 2008. Sin dumonda èn vegnidas concedidas tut en tut indesch contribuziuns chantunalas a gasettas online fin l'onn 2017. Da quellas ha pertutgà mo ina dumonda ina gasetta online rumantscha. Dal sectur stampà (gasettas e revistas) n'èn vegnidas inoltradas naginas dumondas. Las contribuziuns importan en media circa 2000 fin 3000 francs per onn. Supplementarmain èn vegnidas garantidas durant la medema perioda sut il titel da mesiras generalas e projects generals (art. 14 al. 1 lit. a OLing) totalmain plirs dieschmilli francs a gasettas en il Grischun talian (per lantschar da nov gasettas, per fusiunar gasettas sco er per project spezials da gasettas en il sectur da scola). Tut las contribuziuns derivan da meds finanzials a libra disposiziun per projects a favur da la promoziun da linguas.

Tar la dumonda 3: Schebain ch'er las gasettas regiunalas dal Grischun tudestg ston cumbatter cunter difficultads da structura sumegliantas, permetta la legislaziun da linguas da sustegnair mo las medias talianas e rumantschas (cf. resposta tar la dumonda 2). Uschia ademplescha il chantun sia incumbensa en il sectur da las medias tenor l'art. 1 al. 1 lit. d da la lescha da linguas dal chantun Grischun dals 19 d'october 2006 (LLing; DG 492.100) da "mantegnair e promover la lingua rumantscha e taliana".

23 d’avust 2017