Il giavisch da l'incumbensa stat en connex cun la reducziun da la birocrazia nunnecessaria e cun la distgargia administrativa spezialmain d'interpresas pitschnas e mesaunas (IPM). Il chantun sa stenta dapi onns da stgaffir cundiziuns generalas favuraivlas per nossa economia e per nossas interpresas. Latiers tutga er in'administraziun satiglia. En la missiva da la regenza al cussegl grond tar l'iniziativa chantunala dal pievel cunter birocrazia e reglamentaziuns nunnecessarias (carnet nr. 10/ 2010-2011, p. 779) èn vegnids descrits ils instruments gia introducids per distgargiar administrativamain il chantun Grischun – analogamain a quels da la confederaziun. Tranter ils onns 1996 e 2000 èn vegnidas realisadas l'essenzialisaziun e la flexibilisaziun da la legislaziun e da l'applicaziun dal dretg (EFLAD). En differents secturs èn vegnidas introducidas coordinaziuns da las proceduras (planisaziun, energia, meglieraziuns e.u.v.). L'onn 2006 è vegnida abolida l'obligaziun da las interpresa d'alloschament d'annunziar mintga giast e l'onn 2008 è vegnida simplifitgada considerablamain la procedura per taxar vinars. L'onn 2007 è vegnì introducì in gremi da coordinaziun per la politica dad IPM e l'obligaziun da far ina valitaziun da las consequenzas da la regulaziun (VCR) en cas da relaschs chantunals novs u da tals che ston vegnir revedids. Ultra da quai èn las directivas per la giurisdicziun vegnidas repassadas ed amplifitgadas en il senn d'ina concepziun attractiva per l'economia. L'administraziun da taglia ha introducì il nov attest da salari che ha purtà tenor il SECO ina distgargia massiva dals patruns, in nov program da decleraziun, l'imposiziun electronica sco er automatisaziuns tar il rendaquint e metta a disposiziun en l'internet elements interactivs che reduceschan er la lavur respectiva da las interpresas. Plinavant èn vegnids endrizzads la dumonda automatisada d'infurmaziuns dal register funsil per tschertas branschas sco er il register central da persunas che porscha er avantatgs per interpresas en il traffic commerzial cun las autoritads. L'uffizi da stimaziun e l'institut d'assicuranza d'edifizis dovran da nov ina banca da datas cuminaivla. Ultra da quai elavura la chanzlia chantunala en il sectur dal e-government ina strategia per augmentar ils servetschs che pon vegnir liquidads senza palpiri sur l'internet. La finamira en quest connex è quella d'augmentar l'effizienza per tut ils participads e da distgargiar uschia administrativamain las interpresas. Differents posts d'administraziun dovran la finala il register da manaschi e d'interpresa (RMI) da la confederaziun.
En la strategia federala "Svizra digitala" sco er en la strategia dad e-government en Svizra che vegnan conpurtadas dal chantun e realisadas en ses champ d'influenza è francada la finamira da reducir la lavur per liquidar fatschentas d'autoritads. La direcziun generala da l'incumbensa è gia vegnida iniziada en quest rom dal chantun. Ultra da quai vegni examinà tar l'elavuraziun da l'incumbensa Casanova concernent in "Grischun digital" da tge trends digitals che las branschas essenzialas d'industria e da servetschs en il Grischun èn pertutgadas e quant ferm. Plinavant vegnan registràdas las pretensiuns a la politica ed il basegn d'agir ord vista da las interpresas resp. da las branschas.
Ultra da quai tira la regenza er a niz novas pussaivladads tecnicas sco er sistems per ademplir sias incumbensas sco er per concentrar ils process e per reducir la chargia administrativa per las interpresas. En il cas ideal succeda quai en collavuraziun cun la confederaziun e/u cun auters chantuns, cun vischnancas e cun partenaris. En quest rom vegn er garantida ina coordinaziun.

Dal chantun na pon betg vegnir influenzadas enquistas/retschertgas da la confederàziun, d'instituziuns privatas, da federaziuns u da scolas autas. Plinavant stoi vegnir renvià al fatg ch'il chantun na registrescha – pervia dal dretg chantunal resp. en il rom da sia libertad d'agir cuntrari a la confederaziun – abstrahà da paucas excepziuns spezialas (fatgs da sanadad, monitoring d'energia, sectur da persunas cun impediments/sectur social, interpresas suttamessas a la lescha da submissiun) – naginas datas statisticas tar las interpresas.
I vegn guardà che la lavur da controlla è, nua ch'il chantun po decider sez, uschè pitschna sco pussaivel. Sco ch'ils exempels qua survart mussan vegnan optimaziuns examinadas e prendidas en mira permanentamain. Però prescriva per regla il dretg federal, co che l'execuziun sto vegnir realisada.

La regenza parta ils giavischs menziunads en l'incumbensa. Sco mussà èn gia avant maun blers instruments per la deregulaziun e per la debirocratisaziun. Quels vegnan sviluppads vinavant. I vegn profità da novas pussaivladads en il sectur da la coordinaziun e dal barat da datas. La gronda part da las retschertgas e da las controllas na po il chantun però betg influenzar, perquai ch'ellas derivan da la confederaziun.

En quest senn è la regenza pronta d'acceptar l'incumbensa.

20 d'october 2017