Navigation

Inhaltsbereich

Dumonda Degiacomi concernent in martgà gist en la branscha da coiffeur

Sessiun: 17.10.2017

La branscha da coiffeur è gia daditg ina branscha cun ina dira concurrenza. Quai sa mussa betg sco ultim tar il contract collectiv da lavur (CCL) per las fatschentas da coiffeur svizras. Quel è vegnì declerà l'onn 2010 dal cussegl federal per generalmain impegnativ e prolungà l'ultima giada ils 17 d'avust 2017. Ch'il cumbat da pretschs è dir, mussan er intginas disposiziuns da quest CCL. Uschia importa il salari da lavurantas e lavurants che han fatg in emprendissadi e che disponan d'in attestat federal da qualificaziun (AFQ) mo 3800 francs, il salari d'absolventas ed absolvents da l'emprendissadi 3400 francs.

En lieus grischuns dal center procuran ussa novs gronds saluns da coiffeur per irritaziun, perquai ch'els fan reclama cun pretschs bass prest incredibels. Inevitablamain sa tschenta la dumonda, sch'il CCL generalmain impegnativ, ma er autras prescripziuns sco l'obligaziun da pajar la taglia sin la plivalur u disposiziuns dal dretg d'esters (permissiuns da lavur valaivlas) vegnan observads tar tals pretschs.

Perquai vegn la regenza supplitgada da respunder las suandantas dumondas:

1. Cun tge mesiras concretas vegni controllà en il Grischun, sch'il CCL per las fatschentas da coiffeur svizras vegn observà? Tge activitads da controlla han gì lieu concretamain en quest reguard ils onns 2014 fin 2016 e tge sancziuns èn vegnidas pronunziadas?

2. Co vegni controllà ch'ils patruns da la branscha da coiffeur dettian lavur mo a persunal che dispona d'ina permissiun da lavur valaivla? Tge activitads da controlla han gì lieu concretamain en quest reguard ils onns 2014 fin 2016 e tge sancziuns èn vegnidas pronunziadas?

3. Ha la regenza pussaivladads da render attent l'administraziun federala da taglia (AFT) davart inobservanzas presumtivas da l'obligaziun da pajar la taglia sin la plivalur respectivamain da far ina denunzia en chaussa? Èn talas pussaivladads vegnidas nizzegiadas en la branscha da coiffeur ils onns 2014 fin 2016?

4. Po la regenza instradar ulteriuras mesiras per garantir in martgà gist en la branscha da coiffeur?

Cuira, ils 17 d'october 2017

Degiacomi, Widmer-Spreiter, Atanes, Baselgia-Brunner, Blumenthal, Bucher-Brini, Burkhardt, Cahenzli-Philipp, Caluori, Caviezel (Cuira), Deplazes, Dermont, Jaag, Kappeler, Kunfermann, Monigatti, Nay, Niederer, Noi-Togni, Perl, Peyer, Pfenninger, Pult, Tenchio, Thöny, Decurtins-Jermann, Ruckstuhl

Resposta da la regenza

I constat che la branscha da coiffeur è exponida gia dapi blers onns ad ina concurrenza relativamain dira, quai che ha er consequenzas per ils pretschs e per la situaziun da las entradas da blers manaschis. Per las fatschentas da coiffeur è avant maun in contract collectiv da lavur cun vigur lianta (CCL) che regla tranter auter ils salaris minimals per las emploiadas ed ils emploiads cun emprendissadi e cun emprendissadi scursanì da questa branscha. Ils salaris minimals da forzas da lavur senza emprendissadi n'èn betg reglads en il CCL. L'incumbensa d'examinar, sch'il CCL vegn observà, n'ha betg il stadi, mabain la cumissiun professiunala paritetica ch'è vegnida nominada dals partenaris socials. Betg suttamess al CCL n'èn las bleras coiffeusas ed ils numerus coiffeurs che lavuran independentamain.

Tar la dumonda 1: La regenza parta dal fatg che la cumissiun professiunala paritetica per la branscha da coiffeur (sco las cumissiuns professiunalas pariteticas d'autras branschas) controllia las cundiziuns da salari e da lavur da las emploiadas e dals emploiads en fatschentas da coiffeur. La regenza na sa betg quantas controllas ch'èn vegnidas fatgas ils onns 2014 fin 2016 e tge sancziuns ch'èn vegnidas pronunziadas.

Tar la dumonda 2: Sin fundament da la cunvegna davart la libra circulaziun (CLC) han forzas da lavur dal territori da la UE/AECL il dretg da survegnir ina permissiun da lavurar en Svizra, uschia ch'i na dat strusch cuntravenziuns cunter l'obligaziun da permissiun tar questas forzas da lavur estras. Da vart da l'uffizi da migraziun e da dretg civil n'èn vegnidas ordinadas ils ultims onns naginas controllas specificas en la branscha da coiffeur. Per regla vegnan controllas incumbensadas mo, sche vischnancas, uffizis u persunas privatas han fatg denunzias. En cas da burgaisas e burgais da la UE/AECL è la mancanza d'ina permissiun dentant mo in causal da surpassament.
Per engaschar persunas admessas provisoricamain, requirentas e requirents d'asil sco er fugitivas e fugitivs dovri ina permissiun da lavur correspundenta che vegn concedida dal chantun. En quest connex controllescha l'uffizi per industria, mastergn e lavur (UCIML) en mintga cas ch'il contract da lavur correspundia al CCL resp. che las cundiziuns da salari e da lavur usitadas en il lieu ed en la branscha vegnian observadas. Sin fundament da denunzias correspundentas ha il UCIML fatg ils onns 2014 fin 2016 duas controllas en fatschentas che dattan lavur a persunas da terzs stadis. Igl è vegnì examinà, sch'ils salaris correspundan al lieu ed a la branscha, perquai ch'il CCL na regla betg ils salaris minimals da forzas da lavur auxiliaras. Plinavant èsi vegnì controllà, sche las permissiuns da lavur necessarias èn avant maun. En ils dus cas numnads n'èn vegnidas constatadas naginas cuntravenziuns.

Tar la dumonda 3: L'administraziun da taglia n'ademplescha naginas incumbensas executivas u funcziuns concernent la taglia sin la plivalur. L'administraziun da finanzas è responsabla per ils rendaquints da la taglia sin la plivalur (TPV) da l'administraziun chantunala sco er per la cussegliaziun dals uffizis en dumondas da la TPV. La controlla da manaschis privats è chaussa da la confederaziun (cf. controlla da la TPV tras l'administraziun federala da taglia (1) e portal d'interpresas pitschnas e mesaunas (2)). La regenza n'ha pia naginas cumpetenzas e naginas pussaivladads da daventar activa en quest connex.

Tar la dumonda 4: Uschenavant ch'ils manaschis sa movan en il rom prescrit menziunà, n'ha la regenza actualmain naginas ulteriuras pussaivladads e nagins ulteriurs instruments per intervegnir en il martgà da la branscha da coiffeur.
I po vegnir rendì attent al fatg che la branscha ed ils sindicats èn sa cunvegnids ils 21 da matg 2017 ad in nov CCL che sto dentant anc vegnir declerà da la confederaziun per generalmain liant. Tenor quel vegnan er forzas da lavur senza scolaziun renconuschida suttamessas al CCL. Ultra da quai èn ils partenaris socials er sa cunvegnids ad instruments per cumbatter cunter la pseudo-independenza ("locaziun da sutga" abusiva).

(1) https://www.estv.admin.ch/estv/de/home/mehrwertsteuer/fachinformationen/mwst-kontrolle.html
(2) https://www.kmu.admin.ch/kmu/de/home/praktisches-wissen/finanzielles/steuern/mwst/mehrtwertsteuer-kontrolle-durch-die-estv.html

21 da december 2017