Navigation

Inhaltsbereich

Sessiun: 06.12.2017

La segirezza tutga tar ils basegns fundamentals da l'uman. In'auta segirezza è plinavant fitg impurtanta er sco factur economic per ina plazza economica attractiva. Per valitar ina situaziun da segirezza vegni enconuschentamain distinguì tranter ina "segirezza objectiva" ch'è cumprovabla statisticamain e facticamain, ed ina "segirezza subjectiva" che vegn resentida dal singul individi. Tuts dus geners da segirezza èn d'ina impurtanza fundamentala.

Segirezza objectiva: Dependa da cundiziuns generalas. En quest connex renviescha la regenza a la pagina 24 dal preventiv, resp. dal program annual PS 4/22 "segirezza publica", nua ch'i vegn descritta la finamira da l'onn. Las sutsegnadras ed ils sutsegnaders renconuschan las stentas da la regenza e sustegnan questas stentas senza resalvas.

Segirezza subjectiva: Che la populaziun resentia segirezza, dependa tranter auter er d'ina communicaziun averta, transparenta e regulara. Il mument stoi deplorablamain vegnir constatà che tala è fitg manglusa da vart da la confederaziun. Ils ultims mais han ins piglià p.ex. circa 50 fugitivs a las duanas da Campocologno, da Müstair e da Martina. Quests fugitivs èn ubain vegnids refusads ubain manads en il center da cumpetenza ad Altstätten. La populaziun n'ha strusch badà insatge da quai. Quai grazia a la prestaziun excellenta da nossas forzas da segirezza a la front. Quellas han schlià ils singuls cas cun bler engaschament e cun gronda umanitad, dentant betg senza fadias. Sin fundament da quests fatgs pudess ins presumar ch'i na dettia nagins problems a noss cunfins grischuns. La situaziun idealisada pudess vegnir duvrada da la confederaziun sco manevra da guntgida per reducir ulteriuramain il dumber effectiv dal corp da guardias da cunfin en noss chantun. Quai vegn refusà categoricamain.

La preschientscha dal corp da guardias da cunfin e dal persunal da duana als cunfins na gida betg mo ad augmentar la segirezza en general. Ella procura a medem temp per plazzas da lavur impurtantas e preziusas en nossas regiuns perifericas. En quest connex deploreschan las sutsegnadras ed ils sutsegnaders zunt fitg che en connex cun la centralisaziun annunziada da las investigaziuns da duana è planisada in'ulteriura reducziun da plazzas. Las sutsegnadras ed ils sutsegnaders dumondan ultra da quai, tge consequenzas ch'il project da refurma da 400 milliuns francs DaziT da la direcziun generala da duana, che cuntegna er ina cumponenta organisatorica, ha per il chantun Grischun.

Surprendentamain stoi vegnir prendì enconuschientscha che – malgrà diversas intervenziuns, sco l'iniziativa dals chantuns inoltrada dacurt en chaussa – ha lieu in'ulteriura reducziun da plazzas da vart da la confederaziun. Cunter quest proceder sto la regenza cumbatter cun vehemenza. Las sutsegnadras ed ils sutsegnaders dischapprovan fermamain in'ulteriura reducziun da plazzas.

Sin basa da las explicaziuns qua survart vegn la regenza incumbensada:

1. da pretender – pertutgant il corp da guardias da cunfin – ina infurmaziun transparenta a la publicitad davart la situaziun als cunfins da noss chantun e davart las consequenzas dal project DaziT;

2. da s'engaschar vinavant activamain tar la confederaziun cunter ina reducziun tar la duana e tar il corp da guardias da cunfin en las regiuns dal chantun Grischun;

3. d'impedir cun tutta forza ch'i vegnian centralisadas las investigaziuns da duana e pia ch'i vegnian reducidas ulteriuras plazzas en las regiuns dal Grischun;

4. da sa reunir cun ils ulteriurs chantuns da la Svizra orientala e da communitgar a la confederaziun cleras aspectativas areguard la dotaziun persunala da la duana e dal corp da guardias da cunfin al cunfin ost.

Cuira, ils 6 da december 2017

Della Vedova, Salis, Michael (Castasegna), Albertin, Alig, Atanes, Berther (Mustér), Bleiker, Blumenthal, Bondolfi, Brandenburger, Buchli-Mannhart, Caduff, Caluori, Casanova (Glion), Casty, Casutt-Derungs, Cavegn, Clalüna, Claus, Danuser, Darms-Landolt, Deplazes, Dermont, Dosch, Dudli, Engler (Tavau Vitg), Epp, Fasani, Felix (Scuol), Florin-Caluori, Geisseler, Giacomelli, Gunzinger, Hartmann, Heiz, Hitz-Rusch, Holzinger-Loretz, Hug, Jeker, Jenny, Joos, Koch (Tumein), Kollegger, Komminoth-Elmer, Kunfermann, Kunz (Fläsch), Lamprecht, Mani-Heldstab, Märchy-Caduff, Mathis, Michael (Donat), Monigatti, Müller, Nay, Niederer, Niggli (Samedan), Niggli-Mathis (Grüsch), Noi-Togni, Papa, Pfäffli, Sax, Schneider, Schutz, Steck-Rauch, Steiger, Stiffler (Tavau Vitg), Tenchio, Thomann-Frank, Tomaschett (Breil), Tomaschett-Berther (Trun), Toutsch, Troncana-Sauer, von Ballmoos, Waidacher, Weber, Weidmann, Widmer-Spreiter, Wieland, Zanetti, Antognini, Berther (Segnas), Engler (Surava), Grünenfelder Hunger, Pfister, Wellig

Resposta da la regenza

La regenza observa cun grond quità il svilup da l'administraziun federala da duana (AFD) vers la centralisaziun. Il departament cumpetent è intervegnì immediatamain e cleramain suenter ch'ils plans da la AFD da centralisar las investigaziuns da duana èn vegnids enconuschents. Cunzunt tema la regenza che suenter la centralisaziun da las investigaziuns da duana pudess vegnir reorganisà correspundentamain er il corp da guardias da cunfin (Cgcf) cun sias filialas. La regenza vegn perquai a persequitar strictamain ils ulteriurs pass da la AFD ed a cumbatter cun tutta forza cunter ina reducziun dal persunal al cunfin a l'ost ed al sid.

Tenor la AFD è pertutgada da la nova organisaziun causa la centralisaziun da las investigaziuns da duana, mo la duana e betg il Cgcf. Cun delegar cumpetenzas supplementaras da persecuziun penala al Cgcf duai vegnir garantì ch'ils cas pli pitschens possian vegnir liquidads al lieu. En quests cas spetga la AFD in augment da l'effect. Quai duai gidar a cuntanscher ch'en il futur èn dapli forzas a la front. La AFD conferma che l'activitad d'investigaziun en ils chantuns na vegnia betg reducida pervia da la centralisaziun; apparentamain duai ella schizunt vegnir extendida en ils chantuns. La AFD na tradescha dentant betg, quant enavant e co che l'activitad d'investigaziun duai vegnir extendida al lieu en il chantun. La regenza na vesa perquai nagins motivs persvadents che pledassan per la centralisaziun dals posts correspundents. Ella vegn ad observar vinavant strictamain la situaziun ed ad intervegnir puspè en cas d'ina eventuala centralisaziun dal Cgcf u da la duana.

La AFD vul sa modernisar cun il program cumplessiv da transfurmaziun DaziT. Las formalitads da duana duain vegnir simplifitgadas e digitalisadas totalmain. Er la segirezza areguard la criminalitad transcunfinala u areguard la migraziun irregulara duai vegnir meglierada grazia a la colliaziun digitala. La AFD infurmescha sin sia pagina d'internet (www.ezv.admin.ch) detagliadamain davart DaziT. Ma i n'è betg enconuschent, tge consequenzas che DaziT vegn ad avair per il Grischun.

Tar il punct 1: Sin tut ils plauns da direcziun respectivamain da commando exista in fitg bun barat cun il corp da guardias da cunfin. Il Cgcf ha adina puspè recepì e resguardà en il passà ils giavischs dal chantun Grischun. La regenza ed il departament cumpetent vegnan a deponer il giavisch tar il Cgcf e tar la duana, respectivamain tar la direcziun generala da duana per ina infurmaziun transparenta da la publicitad davart la situaziun als cunfins dal chantun Grischun e davart las consequenzas dal project DaziT.

Tar ils puncts 2 e 3: La regenza ed il departament cumpetent vegnan a s'engaschar er vinavant cun tutta forza ed activamain cunter ina reducziun tar il Cgcf e tar la duana en las regiuns dal chantun Grischun.

Tar il punct 4: Ina fusiun cun ils chantuns da la Svizra orientala exista sur la conferenza dals directurs chantunals da giustia e polizia da la Svizra orientala (CDCGP-ost) sut il presidi da cusseglier guvernativ Christian Rathgeb, la quala ha communitgà fin ussa e vegn a communitgar er vinavant envers la confederaziun – sco er en ina discussiun cun il directur general da duana – cleramain sias ideas areguard la dotaziun persunala dal Cgcf e da la duana al cunfin ost. La regenza renviescha al fatg che la problematica sto vegnir schliada per l'entira Svizra, sco ch'er l'iniziativa dal chantun concernent il corp da guardias da cunfin, inoltrada dal chantun Grischun, ha per finamira. Las regiuns da la Svizra na duain betg vegnir opponidas ina a l'autra, mabain il problem fundamental duai vegnir schlià da la confederaziun. A quai na cuntrafai betg ch'il chantun Grischun – ensemen cun ils chantuns da la Svizra orientala – prenda vinavant cleramain posiziun envers la confederaziun.

Sa basond sin questas consideraziuns propona la regenza al cussegl grond d'acceptar questa incumbensa.

7 da mars 2018