Cuntegn da la pagina

Incumbensa Bucher-Brini concernent la finanziaziun da la centrala dal clom d'agid sanitar 144 (centrala 144) tras il chantun Grischun

sessiun: 14.02.2018

En la resposta a mia dumonda concernent la finanziaziun da la centrala dal clom d'agid sanitar 144 en il chantun Grischun, neghescha la regenza la necessitad d'avair ina regulaziun da finanziaziun unitara per tut ils numers d'urgenza (117, 118 e 144) en il chantun.

Las sutsegnadras ed ils sutsegnaders na chapeschan betg, pertge ch'i duain vegnir applitgadas differentas reglas da finanziaziun per ils numers d'urgenza en il chantun Grischun. La gestiun da la centrala 144 è ina incumbensa che serva a proteger ed a promover il bainstar da la populaziun (service public) ed ils custs da questa gestiun ston pia vegnir surpigliads dal chantun. Els na duessan betg vegnir adossads a persunas malsaunas e disgraziadas. Particularmain er en vista al fatg che la centrala 144 vegn manada dapi il november 2017 directamain dal chantun.

Gist en il fatg ch'ils numers d'urgenza vegnan manads da nov tuts sut il tetg dal chantun, vesain nus ina pussaivladad per simplifitgar ulteriuramain ils andaments ed ils custs administrativs.

Las sutsegnadras ed ils sutsegnaders proponan perquai da stritgar senza cumpensaziun l'art. 52 al. 3 da la lescha per promover la tgira da persunas malsaunas, sco er l'art. 46 da l'ordinaziun respectiva.

Cuira, ils 14 da favrer 2018

Bucher-Brini, Geisseler, Niggli-Mathis (Grüsch), Albertin, Atanes, Baselgia-Brunner, Berther (Mustér), Blumenthal, Bondolfi, Caduff, Cahenzli-Philipp, Caluori, Casanova (Glion), Casty, Cavegn, Caviezel (Cuira), Clalüna, Crameri, Danuser, Darms-Landolt, Della Vedova, Deplazes, Dermont, Dosch, Engler, Epp, Fasani, Florin-Caluori, Foffa, Giacomelli, Gunzinger, Heiz, Hitz-Rusch, Holzinger-Loretz, Jaag, Jeker, Kasper, Komminoth-Elmer, Kunfermann, Lamprecht, Locher Benguerel, Lorez-Meuli, Märchy-Caduff, Marti, Monigatti, Niederer, Noi-Togni, Papa, Perl, Peyer, Pfenninger, Pult, Sax, Schneider, Steck-Rauch, Tenchio, Thomann-Frank, Thöny, Troncana-Sauer, Widmer-Spreiter, Zanetti, Berther (Segnas), Costa, Gugelmann, Stäbler

Resposta da la regenza

Tenor l'art. 52 al. 3 da la lescha per promover la tgira da malsauns e l'assistenza da persunas attempadas e da persunas che basegnan tgira (lescha per promover la tgira da persunas malsaunas, LTM; DG 506.000) ston las persunas che vegnan transportadas d'in servetsch da transport en cas d'urgenza e d'ambulanza, ch'è vegnì alarmà dal post da coordinaziun central, sa participar als custs da gestiun dal post da coordinaziun (centrala 144). L'autezza da la participaziun vegn fixada da la regenza ed importa maximalmain 200 francs per acziun che vegn disponida dal post da co¬ordinaziun. L'import fixà sto vegnir mess a quint da l'ospital e tramess al post da coordinaziun.

Tenor l'art. 46 al. 1 da l'ordinaziun tar la lescha per promover la tgira da persunas malsaunas (OLTM; DG 506.060) ston vegnir messas a quint las suandantas pauschalas per tut las acziuns che vegnan disponidas da la centrala dal clom d'agid sanitar 144: 50 francs per acziuns primaras dal stgalim d'urgenza 1 e 2 (lit. a) e 30 francs per tut las autras acziuns (lit. b).

La revisiun totala da la lescha per promover la tgira da persunas malsaunas è vegnida tractada dal cussegl grond ils 30 d'avust 2017 (PCG 2017/2018, p. 73). En il rom da la revisiun totala formala è vegnì cumplettà materialmain l'art. 52 al. 3 LTM. Correspundentamain ha la presidenta da la cumissiun renvià explicitamain al fatg, che da nov vegnia ussa fixada la participaziun als custs da gestiun en la lescha. L'adattaziun è vegnida approvada senza votum en chaussa, ed è entrada en vigur il 1. da schaner 2018. En il senn da la segirezza giuridica n'èsi betg opportun da puspè stritgar questa disposiziun suenter sia vigur dad in mez onn, dapi ch'il cussegl grond l'ha deliberada unanimamain ils 30 d'avust 2017.

Dal rest ha la regenza fatg diever moderadamain da la cumpetenza ch'il cussegl grond l'ha assegnada en l'art. 52 al. 3 LTM, e n'ha insumma betg exaurì il rom da 200 francs ch'era vegnì prescrit per ella en la disposiziun menziunada qua survart.

Cun il conclus dals 19 da december 2017 (prot. nr. 1085) ha la regenza explitgà ch'ella resguardia sco giustifitgada – considerond il conclus dal cussegl grond – ina participaziun da las persunas transportadas d'in servetsch da transport en cas d'urgenza e d'ambulanza d'in ospital public als custs da gestiun da la centrala 144. La regenza ha er mussà en quest conclus che l'autezza da la participaziun è adequata en la cumparegliaziun interchantunala.

Ils custs da manaschi da la centrala 144 èn ina part dals custs dals servetschs da salvament. L'import total da las pauschalas da disposiziun incassadas durant l'onn 2017 munta a 511 140 francs. Sche quests retgavs crudassan davent, stuessan els vegnir remplazzads cun contribuziuns dal chantun. Las vistas finanzialas dal chantun sco er las prescripziuns respectivas èn uschia, che questas expensas supplementaras per la gestiun da la centrala 144 stuessan vegnir cumpensadas en in auter lieu. En il center stessan qua las ulteriuras contribuziuns als servetschs da salvament e pia en emprima lingia las contribuziuns als ospitals per ils servetschs da salvament dad annualmain bundant 4,5 milliuns francs. Ils retgavs da las pauschalas da disposiziun pudessan vegnir cumpensads cun reducir per circa 11 pertschient las contribuziuns als ospitals per ils servetschs da salvament. Entant ch'ils servetschs da salvament pli gronds pudessan cumpensar questa reducziun dal sustegn finanzial tras il chantun eventualmain cun reducir correspundentamain las prestaziuns, na fissi bain betg exclus, ch'ils servetschs da salvament dals ospitals pli pitschens stuessan serrar lur portas.

Annullar la participaziun als custs da la persuna transportada cun stritgar la pauschala da disposiziun, na resguarda la regenza betg sco inditgà ni en il senn da la segirezza giuridica ni pervia da las consequenzas finanzialas ni pervia da l'adequatezza da l'autezza da questa participaziun en la cumparegliaziun interchantunala.

Sa basond sin questas consideraziuns propona la regenza al cussegl grond da refusar questa incumbensa.

18 d'avrigl 2018