Cuntegn da la pagina

Dumonda Pult concernent la ristga da surannaziun en la dispita fiscala cun Remo Stoffel

sessiun: 14.02.2018

Ils 11 da zercladur 2013 ha il cussegl grond approvà cun 94 cunter 1 vusch e 0 abstenziuns ina revisiun parziala da la lescha da taglia che prolunghescha il termin da la surannaziun absoluta da taxaziun da 10 sin 15 onns. Il medem onn è quella revisiun entrada en vigur. En la missiva dals 11 da favrer 2013 ha la regenza motivà il project cun singulas proceduras, nua che la surannaziun absoluta da taxaziun smanatschava da daventar realitad. Sch'il termin da surannaziun na vegniss betg prolungà, pudessan ir a perder "en il cas singul entradas fiscalas fitg grondas" per il chantun (missiva da la regenza, carnet nr. 15/2012-2013, p. 953). Er per motivs da la gistadad fiscala e dal tractament giuridicamain egual da tut ils pajataglias stoppia vegnir impedì "che la surannaziun da taxaziun entria, avant che l'autoritad da taxaziun haja insumma gì la pussaivladad da taxar l'onn fiscal correspundent resp. ils fatgs respectivs" (missiva da la regenza carnet nr. 15/2012-2013, p. 951). Durant la debatta en il cussegl grond ha punctuà Barbara Janom Steiner sco cussegliera guvernativa responsabla ch'i sa tractia en quest cas singuls da "pretensiuns da taglia da milliuns" ed ha tschentà la dumonda retorica: "Stimadas damas deputadas e stimads signurs deputads, duai il stadi ussa propi guardar tiers co che pretensiuns da taglia da milliuns van a perder?" (protocol dal cussegl grond, 11 da zercladur 2013, p. 1033).

Ils 26 da zercladur 2017 ha il schurnal regiunal dal Grischun rapportà davart la sentenzia da la dretgira administrativa dal Grischun dals 4 d'avrigl 2017 (A 15 60 ed A 15 61), tenor la quala Remo Stoffel n'aveva betg pajà correctamain la taglia l'onn 2003 per gronds gudogns ch'el aveva realisà cun ina firma fictiva. Sco ch'ins po leger en la sentenzia da 200 paginas, ha la dretgira dà per gronda part raschun a las autoritads da taglia. Ils 27 da zercladur 2017 ha il schurnal regiunal dal Grischun rapportà vinavant che Remo Stoffel haja fatg recurs tar il tribunal federal cunter questa sentenzia. Perquai smanatschia ussa ina surannaziun da las pretensiuns da taglia. Fin la fin da l'onn 2018 stoppia il tribunal federal prender ina decisiun, uschiglio scrodia il termin da surannaziun. Tenor la sentenzia da la dretgira administrativa vai en quest connex per circa 8 milliuns francs.

Cun la publicaziun da la sentenzia da la dretgira administrativa e pervia da la rapportaziun en las medias èsi pli tard daventà public che Remo Stoffel è in da quels "cas singuls" numnads da "pretensiuns da taglia da milliuns". Sut quest aspect sa tschentan las suandantas dumondas per las sutsegnadras ed ils sutsegnaders:

1. Co giuditgescha la regenza actualmain la ristga che las pretensiuns da taglia envers Remo Stoffel numnadas suranneschian?

2. Datti – ultra dal cas Remo Stoffel ch'è daventà public – anc auters "cas singuls" da "pretensiuns da taglia da milliuns" ch'ins ha vulì taxar ad ura cun la revisiun parziala da la lescha da taglia numnada qua survart? Sche gea, han quests ulteriurs cas pudì vegnir taxads a temp e quant grondas èn stadas las singulas pretensiuns da taglia da las autoritads fiscalas communalas, chantunalas e federalas?

3. Devi u datti pretensiuns da taglia che na pon e che n'han betg pudì vegnir taxadas ad ura, malgrà la revisiun parziala da la lescha da taglia menziunada? Sche gea, quant grondas èn las perditas stimadas per las autoritads fiscalas communalas, chantunalas e federalas?

4. Èn las finamiras menziunadas da la revisiun parziala numnada da la lescha da taglia – numnadamain impedir perditas d'entradas, gistadad fiscala, tractament giuridicamain egual da tut ils pajataglias – vegnidas ademplidas ord vista da la regenza?

Cuira, ils 14 da favrer 2018

Pult, Caviezel (Cuira), Perl, Atanes, Baselgia-Brunner, Bucher-Brini, Deplazes, Jaag, Locher Benguerel, Monigatti, Noi-Togni, Peyer, Pfenninger, Thöny

Resposta da la regenza

Pervia dal secret fiscal na pon dumondas concernent persunas concretas obligadas da pajar taglia betg vegnir respundidas (art. 122 lescha da taglia per il chantun Grischun [DG 720.000]). Quai vala er, sch'igl è vegnì rapportà en las medias davart decisiuns giudizialas ch'èn vegnidas publitgadas senza numnar la partida recurrenta pertutgada.

En moda generala e senza connex cun in cas concret poi vegnir constattà il suandant en quai che concerna la surannaziun absoluta: La surannaziun absoluta entra en vigur 15 onns suenter che la perioda fiscala è scadida. Quest termin na vegn betg interrut e na po betg vegnir prolungà. El curra vinavant er durant ina procedura da meds legals. Quai vul dir che la surannaziun absoluta per las taglias sin las entradas e sin la facultad da l'onn fiscal 2003 entra en vigur la fin da l'onn 2018. Fin a quest termin sto esser avant maun ina decisiun da taxaziun cun vigur legala, ina decisiun giudiziala cun vigur legala u ina sentenzia dal tribunal federal en ultima instanza. Questa situaziun giuridica enconuschan er las autoritads da meds legals che procuran alura per ina procedura accelerada.

La regenza renunzia da respunder las dumondas tschentadas en connex cun in cas concret.

Tar la dumonda 3: I na dat nagins cas che n'han betg pudì vegnir taxads ad ura, malgrà la revisiun parziala da la lescha da taglia menziunada.

Tar la dumonda 4: Ord vista actuala èn vegnidas cuntanschidas las finamiras da la revisiun parziala menziunadas en la missiva.

17 d'avrigl 2018