Tar la dumonda 1: Cun agid d'ina retschertga davart las plazzas d'emprendissadi tar ils manaschis da scolaziun vegnan registradas las plazzas d'emprendissadi betg occupadas. La gronda part dals manaschis profitan da l'occasiun ed annunzian lur plazzas d'emprendissadi ch'èn anc libras. Intgins annunzian la plazza d'emprendissadi libra tant sco scolaziun AFQ sco er sco scolaziun AFP e pia dublamain. Durant ils mais da zercladur e da fanadur vegnan anc registrads ed approvads circa 200 contracts d'emprendissadi. La distribuziun actuala po vegnir consultada sin la tabella qua sutvart:

Tar la dumonda 2: Ils ultims onns è vegnida constatada la gronda part da las plazzas d'emprendissadi betg occupadas en ils suandants secturs: industria principala e secundara da construcziun, hotellaria e gastronomia, automobil, industria da maschinas, d'electro e da metal sco er commerzi en detagl. La successiun correspunda circa a quella da la gronda part da las regiuns. Ma en las regiuns Plaun, Landquart e Plessur cumpara il dumber da las plazzas d'emprendissadi betg occupadas en la hotellaria ed en la gastronomia pir a la quarta plazza.

Tar la dumonda 3: Gea. La purschida da plazzas d'emprendissadi sa drizza dentant tenor il basegn da l'economia en la regiun respectiva e betg tenor la dumonda da las dunnas giuvnas e dals umens giuvens.

Tar la dumonda 4: La digitalisaziun permetta d'exequir lavurs pli e pli decentralmain ed independentamain dal lieu ed ha per consequenza ch'i resultan novas professiuns. Tras quai pon s'augmentar il dumber e la diversitad da la purschida da plazzas d'emprendissadi.

Tar la dumonda 5: La regenza ha adina puspè refusà cleramain d'integrar en il dretg fiscal mesiras directivas che han ina finamira extrafiscala. Questas mesiras violeschan il princip da la taxaziun tenor la capacitad economica e l'egualitad giuridica, rendan il dretg fiscal pli cumplitgà, han effects fitg variads sin differents stgalims da progressiun, na vegnan betg controlladas areguard lur efficacitad e na vegnan ni budgetadas ni cumprovadas concernent ils custs. Quai vala er per il bonu fiscal che sto vegnir examinà qua per interpresas che porschan plazzas d'emprendissadi en las regiuns perifericas. En connex cun las persunas natiralas cun activitad da gudogn independenta cuntrafaschess ina deducziun correspundenta schizunt al dretg federal, perquai che l'art. 9 al. 4 da la lescha federala davart l'armonisaziun da la taglia directa dals chantuns e da las vischnancas dals 14 da december 1990 (LATD; CS 642.14) enumerescha definitivamain las deducziuns admissiblas.

Tar la dumonda 6: Differentas emprendistas e differents emprendists absolvan in emprendissadi e/u frequentan ina scola professiunala spezialisada ordaifer lur vischnanca da domicil u ordaifer lur chantun da domicil. Custs da transport resultan pia tar ina gronda part da las emprendistas e dals emprendists e quai independentamain da lur regiun da domicil. Ina participaziun supplementara als custs da transport per emprendistas ed emprendists da regiuns perifericas signifitga in tractament inegual da las ulteriuras emprendistas e dals ulteriurs emprendists. Però paja il chantun stipendis tenor la lescha davart las contribuziuns da scolaziun dals 5 da december 2006 (lescha da stipendis; DG 450.200).

27 da zercladur 2018