Navigaziun principala

Cuntegn da la pagina

Incumbensa Schneider concernent la reducziun da las taxas da l'uffizi per il traffic sin via

Sessiun: 31.08.2018

Ils onns 2010, 2014 ed ussa er puspè l'onn 2018 ha il survegliader dals pretschs examinà en detagl las taxas dals uffizis chantunals per il traffic sin via. Da la cumparegliaziun 2018 resultan danovamain differenzas interchantunalas marcantas da las taxas. En divers chantuns – tranter auter en il Grischun – datti en quest reguard ina surcuvrida considerabla dals custs. Il survegliader dals pretschs pretenda perquai danovamain che las taxas en il chantun Grischun stoppian vegnir reducidas.

En pliras sessiuns dal cussegl grond èn gia vegnidas discutadas las taxas memia autas da l'uffizi per il traffic sin via. Durant l'ura da dumondas da la sessiun d'avrigl 2015 ha la regenza explitgà che las entradas or da la gestiun da l'uffizi per il traffic sin via minus il custs vegnian impundidas per finanziar las vias dal chantun. Er sche las taxas memia autas cuntrafan evidentamain cunter il princip da la cuvrida dals custs, ha la regenza refusà quella giada da reducir las taxas. Quai è nuncunvegnent, perquai che las Grischunas ed ils Grischuns pajan uschia mintga onn stgars 3,2 milliuns francs (guardar ura da dumondas da la sessiun d'avrigl 2015) memia bler per taxas a l'uffizi per il traffic sin via.

Perquai incumbenseschan las sutsegnadras ed ils sutsegnaders la regenza da reducir las taxas da l'uffizi per il traffic sin via uschia, ch'i vegnan incassadas a partir da l'onn 2020 taxas che cuvran gist ils custs e che correspundan pia effectivamain al princip da la cuvrida dals custs.

Cuira, ils 31 d'avust 2018

Schneider, Hohl, Zanetti (Landquart), Aebli, Berther, Bettinaglio, Bigliel, Bondolfi, Brunold, Buchli-Mannhart, Caluori, Cantieni, Casutt-Derungs, Cavegn, Danuser, Della Cà, Deplazes (Rabius), Derungs, Dürler, Epp, Erhard, Florin-Caluori, Föhn, Gugelmann, Hefti, Kohler, Kunfermann, Loepfe, Loi, Maissen, Märchy-Caduff, Michael (Donat), Papa, Ruckstuhl, Schmid, Tomaschett (Breil), Ulber, Weber, Widmer (Favugn), Widmer-Spreiter (Cuira), Gaupp

Resposta da la regenza

En connex cun anteriuras cumparegliaziuns da taxas dal survegliader dals pretschs èn vegnidas examinadas detagliadamain las taxas da l'uffizi per il traffic sin via 2015. I n'è vegnì constatà nagin basegn d'agir (PCG nr. 3 2015/2016, p. 512 s.). Da la cumparegliaziun da las taxas 2018 che stat ussa a disposiziun na resultan naginas novas enconuschientschas fundamentalas.

En il rapport davart la finanziaziun da las taxas da l'administraziun federala da finanzas (AFF) dals 31 d'october 2017, che furma la basa da la cumparegliaziun da las taxas 2018 dals uffizis per il traffic sin via, stat scrit sut la cifra 1 introductiva: "Valurs d'index da passa 100 % na muntan percunter er betg sfurzadamain ch'i vegnan incassadas taxas memia autas e che quellas ston vegnir reducidas. Quai vala tant per l'index total sco er per tut ils indexs parzials." La AFF sezza renda attent che sias calculaziuns èn colliadas cun differentas difficultads metodicas e na duain betg vegnir surpigliadas senza in'examinaziun detagliada da las datas e da las disposiziuns giuridicas. La gronda part dals chantuns n'han – suenter analisas detagliadas – vis nagin basegn d'adattaziun malgrà la cumparegliaziun da taxas, uschia sco ultim er il chantun Turitg. Er per il chantun Grischun ston las cifras vegnir relativadas suenter in'examinaziun pli detagliada, cunquai che la cumparegliaziun da las taxas na resguarda betg resp. resguarda mo insuffizientamain las relaziuns concretas en il chantun Grischun. Il princip da la cuvrida dals custs signifitga ch'il retgav total da las taxas na dastga betg u dastga surpassar mo minimalmain ils custs totals da la branscha administrativa respectiva. Ina branscha administrativa cumpiglia en quest cas las incumbensas administrativas cun connex material (cf. en quest connex Häfelin/Müller/Uhlmann, Allgemeines Verwaltungsrecht, 7. ediziun, marg. 2778 ss.).

Prestaziuns voluntaras da l'uffizi per il traffic sin via, sco p.ex. taxas d'urgenza, la vendita da numers d'immatriculaziun da giavisch ed ingiants da numers d'immatriculaziun, vegnan bain furnidas en il rom da l'incumbensa publica. Ellas n'èn però betg prescrittas tenor lescha e vegnan furnidas sin giavisch da la clientella. Da princip n'èn ellas pia betg suttamessas al princip da la cuvrida dals custs ed al princip d'equivalenza. Il medem vala per las entradas en furma d'indemnisaziuns da la confederaziun per l'incassament da la taxa sin il traffic da camiuns pesants e per la vendita da vignettas d'autostrada. Quai na vegn betg resguardà per la cumparegliaziun da las taxas. L'uffizi per il traffic sin via incassescha er taxas causalas independentas dals custs sco p.ex. permissiuns spezialas per vehichels e per transports spezials. Per talas taxas (en spezial per quellas che han eventualmain in effect directiv) na vala il princip da la cuvrida dals custs betg. En la cumparegliaziun da las taxas na vegnan ellas betg cumprovadas spezialmain.

Per conceder permissiuns spezialas fa l'uffizi per il traffic sin via diever dal sustegn professiunal e d'indrizs tecnics da l'uffizi da construcziun bassa. Questas prestaziuns na metta l'uffizi da construcziun bassa betg a quint a l'uffizi per il traffic sin via. Ellas vegnan indemnisadas cun l'attribuziun dal retgav net sin basa da l'art. 56 lit. b da la lescha davart las vias (LVias; DG 807.100). I sa tracta d'ina incumbensa administrativa cun connex material che sto medemamain vegnir resguardada tar l'eruida cumplessiva da las taxas tenor il princip da la cuvrida dals custs ed il princip d'equivalenza. Ultra da quai stoi vegnir constatà ch'il mantegniment da las vias tras l'uffizi da construcziun bassa ch'è necessari pervia dal diever pli ferm da l'infrastructura da las vias tras transports grevs e tras transports spezials correspunda ad ina incumbensa administrativa cun connex material. La taxa correspundenta vegn incassada da l'uffizi per il traffic sin via. Quests custs ston medemamain vegnir integrads per eruir da nov las taxas, er els influenzeschan la cumparegliaziun da las taxas en moda decisiva.

La finala stoi vegnir resguardà ch'il retgav net tar l'uffizi per il traffic sin via vegn attribuì tenor l'art. 56 lit. b LVias cumplainamain al quint da las vias. Sche l'import croda davent u vegn reducì, stuess quel vegnir cumpensà tras daners da taglia generals supplementars u chaschunar reducziuns da las expensas correspundentas en il sectur da la via. En quest connex stoi vegnir resguardà che las singulas persunas pertutgadas na sentan strusch ina reducziun da las taxas. En cumparegliaziun cun il chantun il pli favuraivel importa la reducziun var 9 fin 13 francs per onn.

Sa basond sin questas consideraziuns propona la regenza al cussegl grond da refusar questa incumbensa.

24 d'october 2018