Navigation

Inhaltsbereich

Dumonda Loepfe concernent la mancanza da persunas spezialisadas tar ils uffizis dal register funsil en il chantun Grischun

Sessiun: 24.10.2018

Tar ils uffizis dal register funsil dal chantun Grischun sa mussa ina mancanza pli e pli gronda da persunas spezialisadas. Ils proxims onns van intginas administraturas resp. intgins administraturs dal register funsil en pensiun. A medem temp sentan ils uffizis dal register funsil gia oz ina mancanza da persunas spezialisadas, quai che sa manifestescha en ina spirala da salaris vers ensi. Las forzas giuvnas ch'èn ussa en scolaziun na vegnan betg a bastar ord vista actuala per reducir la mancanza da per­sunas spezialisadas e per cumpensar ils pensiunaments. Memia paucas forzas giuvnas èn numnadamain en scolaziun, e l'ultim examen per l'attest da qualificaziun ha gì in'auta quota da nunsuccess. Ord la perspectiva actuala na sa sviluppa la situaziun da persunal tar ils uffizis dal register funsil pia betg en moda positiva, ed ord vista da las sutsegnadras e dals sutsegnaders dovra quai ussa mesiras.

Las sutsegnadras ed ils sutsegnaders fan las suandantas dumondas en chaussa:

1.     Ha la regenza percurschì ch'igl ha ina mancanza pli e pli gronda da persunas spezialisadas en ils fatgs dal register funsil?

2.     Sa la regenza che intginas administraturas resp. intgins administraturs dal register funsil u lur substituziuns van en pensiun ils proxims onns, senza ch'i sajan avant maun avunda forzas giuvnas recrutablas en il chantun u en auters chantuns?

3.     Ha la regenza l'intenziun da trametter brevs a las vischnancas responsablas per ils fatgs dal register funsil resp. als circuls da register funsil e d'als render attent ch'i stoppian vegnir engaschadas forzas giuvnas, per che la scolaziun possia avair lieu «on the job»?

4.     Ha la regenza – per evitar ina mancanza da persunas spezialisadas – da sia vart l'intenziun d'iniziar e d'organisar ulteriuras scolaziuns durant ils proxims 1 fin 5 onns sper las scolaziuns enconuschentas en il rom da l'examen d'administratur dal re­gister funsil e sper ils novs sforzs da la federaziun dals administraturs dal register funsil, e da porscher questas scolaziuns sco scolaziun, furmaziun supplementara e perfecziunament a tut las gruppas interessadas als fatgs da notariat (notars pa­tentads vegnints, administraturs dal register funsil sco persunas da notariat ed eventualmain auters circuls)? Ha la regenza l'intenziun da sustegnair finanzialmain tals curs?

5.     Ha la regenza ina strategia per il cas che las mesiras menziunadas en las dumondas 2 e 3 n'han nagin success e ch'ils uffi­zis dal register funsil na pon betg pli vegnir manads cun avunda persunal spezialisà en l'avegnir? È ella pronta da render enconuschenta questa strategia en il rom da la resposta a questa dumonda?

Cuira, ils 24 d'october 2018

Loepfe, Föhn, Schmid, Alig, Berther, Berweger, Brunold, Buchli-Mannhart, Caluori, Cantieni, Casutt-Derungs, Cavegn, Cen­si, Crameri, Degiacomi, Della Cà, Deplazes (Rabius), Derungs, Epp, Fasani, Felix, Florin-Caluori, Flütsch, Gasser, Geisseler, Giacomelli, Jenny, Jochum, Kasper, Kienz, Kohler, Kunfermann, Kuoni, Lamprecht, Loi, Maissen, Märchy-Caduff, Michael (Donat), Mittner, Müller (Susch), Natter, Niggli (Samedan), Papa, Paterlini, Rettich, Ruckstuhl, Sax, Schneider, Tomaschett (Breil), Tomaschett-Berther (Trun), Wellig, Zanetti (Sent), Nicolay

Resposta da la regenza

Tenor ils art. 137 ss. da la lescha introductiva tar il cudesch civil svizzer (LItCCS; DG 210.100) èn las vischnancas cumpetentas per l'organisaziun da la gestiun dal register funsil en il chantun Grischun. Mintga vischnanca furma in circul da register funsil (CRF). Pliras vischnancas pon s'unir ad in CRF. Las vischnancas resp. ils CRF elegian pia il persunal dals uffizis dal register funsil (URF) e fixeschan la salarisaziun. Sco administraturas ed administraturs dal register funsil pon mo vegnir elegidas per­sunas che possedan in attest da qualificaziun (AQ) (art. 139 al. 2 LItCCS).

La scolaziun dal persunal ha lieu principalmain tar il URF sez. L'experientscha prati­ca è in element essenzial per garantir forzas giuvnas cun qualificaziuns suffizientas. Sco preparaziun da l'examen per acquistar il AQ porscha il chantun in curs dad 1 onn che accumpogna il studi autodidactic pretendì. Plinavant existan purschidas da fur­maziun entaifer la branscha (federaziun da las administraturas e dals administraturs dal register funsil) e sin il martgà (pratica dal register funsil "Professional" a la ibW, scolaziun cumplessiva cumplementara a la professiun cun la pussaivladad d'acqui­star in diplom sco administratura u administratur dal register funsil a la Academia da Son Gagl). Ultra da quai vegnan renconuschids attests extrachantunals u diploms da giurista u giurist (cun enconuschientschas praticas).

L'incumbensa da procurar per avunda persunal cun qualificaziuns suffizientas per ch'il URF funcziunia, è ina sfida per las vischnancas. Savens sa lascha questa sfida dumagnar mo cun reorganisar u cun engrondir ils CRF, cunquai ch'in uffizi d'ina tscherta grondezza para dad esser oz ina premissa indispensabla, en spezial er per pudair scolar avunda persunal.

Tar la dumonda 1: La situaziun tar ils URF è enconuschenta a la regenza. Problems da recrutar forzas spezialisadas en ils fatgs dal register funsil existan en la maioritad dals chantuns da la Svizra orientala. Correspundentamain ha la regenza stgaffì per il 1. da schaner 2015 in'opziun supplementara, numnadamain da renconuscher er diploms da giurisprudenza. En passa la mesadad dals chantuns svizzers mainan giuristas e giurists ils URF.

Tar la dumonda 2: Durant ils proxims 5 fin 8 onns cuntanscha var la mesadad da las administraturas e dals administraturs dal register funsil dals 23 URF (en ils 21 CRF; ils CRF Plessur e Glion-Lumnezia han mintgamai dus uffizis resp. secretariats) la vegliadetgna da pensiun. Il giudicament da la situaziun tras l'inspecturat dal register funsil e register da commerzi (IRFRC), tranter auter er sin basa d'ina enquista tar ils URF, ha mussà ch'i dat en praticamain tut ils CRF pertutgads soluziuns tras succes­siuns internas u tras reorganisaziuns. Novs posts vacants resultan lura en intgins cas tar las substituziuns. Questas plazzas libras ston vegnir occupadas da nov cun sco­lar e cun perfecziunar ubain las forzas giuvnas existentas tar ils URF ubain persunas che derivan d'autras professiuns.

Tar la dumonda 3: Las vischnancas enconuschan la situaziun da persunal en ils fatgs dal register funsil ed èn conscientas da l'impurtanza d'engaschar avunda forzas giuvnas per ina scolaziun orientada a la pratica. Il tema vegn discutà regularmain entaifer la federaziun da las administraturas e dals administraturs dal register funsil. Dapi dacurt sustegna la federaziun las commembras ed ils commembers cun ina purschida da scolaziun cumplementara, fatga sin mesira per futuras administraturas e futurs administraturs dal register funsil. Plinavant vegnan las vischnancas infurma­das tras il IRFRC davart sfidas organisatoricas en il rom da l'inspecziun che ha lieu mintga 2 onns, ed ellas vegnan sustegnidas tar la realisaziun d'eventualas mesiras necessarias. Ina brev da la regenza a las vischnancas na preschentass nagins fatgs novs.

Tar la dumonda 4: Sco menziunà al cumenzament existan avunda purschidas da furmaziun da vart dal chantun, da la branscha e dal martgà. La quota da nunsuccess relativamain auta a chaschun dals examens per acquistar il AQ (ils trais ultims exa­mens han totalmain sis candidatas e candidats reussì, set betg) ha differents motivs, principalmain dentant la mancanza da pratica en ils URF. En il dretg chantunal n'exi­sta nagina basa per sustegnair finanzialmain las scolaziuns e las furmaziuns supple­mentaras en ils fatgs dal register funsil.
La scolaziun d'administratura u administratur dal register funsil sto vegnir separada strictamain da l'examen da notara patentada u notar patentà sco er da l'elecziun da notaras regiunalas e da notars regiunals.

Tar la dumonda 5: Per la gestiun dal register funsil èn responsablas las vischnancas. La regenza è persvadida ch'ellas èn bunas er en l'avegnir d'occupar adequatamain las plazzas en lur URF. Il chantun sustegna ils URF uschenavant sco pussaivel. Però vegnan ulteriuras optimaziuns da l'organisaziun, tranter auter er ina raziunalisaziun da la gestiun dal register funsil, ad esser indispensablas en l'avegnir.

13 da december 2018