La decisiun d'introducir ina taxa supplementara tar ils posts d'examinaziun a Scuol, a Li Curt ed a Müstair sa basa sin in conclus ch'il cussegl grond ha prendì en la sessiun da zercladur 2003 en connex cun l'examinaziun da las structuras e da las prestaziuns per sanar las finanzas dal chantun e che ha pertutgà l'aboliziun dals posts d'examinaziun menziunads (PCG 2003/2004, p. 148 s.). La finamira da questas mesiras proponidas (19, 20 e 21) è stada da quel temp tranter auter quella da spargnar ca. 67 000 francs (missiva nr. 2/2003-2004, p. 41 ss.).
Dapi ussa 15 onns porscha l'uffizi per il traffic sin via quests servetschs per examinar vehichels cun questa taxa supplementara facultativa da 30 francs per cuvrir ils custs supplementars che resultan là tar las activitads d'examinaziun.
Sco gia menziunà en l'incumbensa dal collega dal cussegl grond Tino Schneider concernent ina reducziun da las taxas tar l'uffizi per il traffic sin via ha il survegliader dals pretschs examinà e controllà detagliadamain ils onns 2010 e 2014 e l'ultima giada l'onn 2018 las taxas dals uffizis chantunals per il traffic sin via. La surcuvrida considerabla dals custs da 3,2 milliuns francs en il chantun Grischun ha la regenza relativà en sia resposta dals 24 d'october 2018 ed explitgà, pertge ch'i vegn observà il princip da la cuvrida dals custs ed il princip d'equivalenza tar l'uffizi per il traffic sin via, e quai cun resguardar las «differentas prestaziuns ed activitads d'incasso facultativas per la confederaziun». Il retgav net cuntanschì tar l'uffizi per il traffic sin via va cumplainamain al quint da las vias (art. 56 lit. b LVias).
En vista a quest aut grad da surcuvrida dals custs da passa 3 milliuns francs per onn èsi ussa segiramain inditgà d'abolir il conclus da spargn da l'onn 2003 e l'introducziun da la taxa supplementara da 30 francs che sa basa sin quel.
Las sutsegnadras ed ils sutsegnaders incumbenseschan perquai la regenza da prender las mesiras necessarias per ch'il conclus da spargn dal cussegl grond da la sessiun da zercladur 2003 possia vegnir annullà. Las taxas supplementaras menziunadas da 30 francs per las examinaziuns da vehichels a Scuol, a Li Curt ed a Müstair duain puspè vegnir abolidas e l'uffizi per il traffic sin via duai survegnir l'incumbensa politica d'examinar vinavant ils vehichels als lieus menziunads senza incassar questas taxas supplementaras.
Cuira, ils 5 da december 2018
Ellemunter, Della Cà, Jochum, Aebli, Atanes, Berweger, Bettinaglio, Bondolfi, Buchli-Mannhart, Casty, Clalüna, Claus, Danuser, Favre Accola, Felix, Gasser, Giacomelli, Gort, Grass, Gugelmann, Hardegger, Hartmann-Conrad, Hofmann, Kienz, Koch, Lamprecht, Loepfe, Loi, Michael (Donat), Müller (Susch), Natter, Niggli (Samedan), Niggli-Mathis (Grüsch), Noi-Togni, Papa, Paterlini, Rettich, Salis, Schneider, Schwärzel, Tanner, Weidmann, Widmer (Favugn), Widmer-Spreiter (Cuira), Wieland, Zanetti (Sent), Zanetti (Landquart), Gujan-Dönier