Zum Seiteninhalt

Dumonda Tomaschett (Breil) concernent l'augment il pli grond da plazzas da lavur en il chantun Grischun

sessiun: 12.02.2019

Ils 12 da schaner 2019 ha la "Schweiz am Wochenende" publitgà in artitgel davart la creschientscha da las administraziuns chantunalas durant ils ultims 10 onns. Il rapport davart las plazzas mussa cleramain che la gronda part dals chantuns ha engrondì las administraziuns malgrà il squitsch da spargn e malgrà las stentas da deregulaziun. Pervia da prescripziuns legalas e pervia da conclus parlamentars sajan vegnidas stgaffidas novas autoritads u incumbensas, argumenteschan in pèr chantuns, uschia er il chantun Grischun.

Il dumber da collavuraturas e collavuraturs da las administraziuns chantunalas è creschì en quasi tut ils chantuns. En quest connex na demussan noss chantuns vischins nagina creschientscha u demussan ina creschientscha minimala: Glaruna +0%, Uri +6%, Sviz +7%. Il chantun Turitg sco chantun cun la populaziun la pli gronda dad 1,5 milliuns abitantas ed abitants ha registrà en 10 onns in augment da +12%.

En il Grischun è il dumber da las plazzas cumplainas s'augmentà tenor il rapport da plazzas da 2168 plazzas l'onn 2008 a 3120 plazzas l'onn 2018. Quai è in augment da +44%. Ils dumbers dals instituts sco er dals ospitals n'èn betg registrads qua.

Cumpareglià cun ils auters chantuns demussa il chantun Grischun lunschor l'augment il pli grond. Questa cumparegliaziun pudess svegliar l'impressiun che l'administraziun chantunala dal Grischun saja tut auter che productiva e consumeschia daners da taglia.

Pervia da quai supplitgain nus la regenza da respunder las suandantas dumondas:

1.     Ha la regenza resp. l'administraziun chantunala furnì a la "Schweiz am Wochenende" las basas/las cifras/ils fatgs necessaris per l'artitgel da gasetta dals 12 da schaner 2019?

2.     Co poi vegnir declerà che las plazzas da lavur en l'administraziun chantunala dal Grischun èn s'augmentadas per +44% ils ultims 10 onns?

3.     Tge uffizis en creschids ils ultims 10 onns, cun quantas plazzas a temp cumplain e sin fundament da tge basas legalas (leschas, ordinaziuns, conclus parlamentars da la confederaziun e dal chantun)? Nus supplitgain d'ans dar las infurmaziuns en moda tabellara.

4.     Han las regiuns profità da questa creschientscha u èn vegnidas stgaffidas las plazzas mo en il "center administrativ" a Cuira?

5.     Co pensa la regenza da reglar en l'avegnir il dumber da persunal ed ils custs da persunal?

6.     Tge consequenzas ha il grond augment da collavuraturas e da collavuraturs l'onn 2015 (500 plazzas supplementaras) per la strategia d'immobiglias dal chantun (a Cuira; en ils centers administrativs regiunals), suenter che la dimensiun da "sinergia" e dals centers administrativs regiunals è gia vegnida predefinida en la votaziun dal pievel dal mars 2012?

Cuira, ils 12 da favrer 2019

Tomaschett (Breil), Engler, Casty, Aebli, Berther, Berweger, Bigliel, Bondolfi, Brunold, Caluori, Cantieni, Casutt-Derungs, Cavegn, Crameri, Danuser, Deplazes (Rabius), Derungs, Ellemunter, Epp, Fasani, Felix, Föhn, Gasser, Geisseler, Giacomelli, Grass, Gugelmann, Hartmann-Conrad, Hefti, Hitz-Rusch, Hohl, Holzinger-Loretz, Jenny, Kasper, Kohler, Kunfermann, Kunz (Fläsch), Kuoni, Lamprecht, Loepfe, Loi, Märchy-Caduff, Michael (Donat), Michael (Castasegna), Mittner, Müller (Susch), Niggli (Samedan), Niggli-Mathis (Grüsch), Paterlini, Pfäffli, Ruckstuhl, Rüegg, Sax, Schmid, Schneider, Thür-Suter, Waidacher, Wellig, Widmer (Favugn), Widmer-Spreiter (Cuira), Wieland, Zanetti (Sent), Zanetti (Landquart), Buchli (Tenna), Collenberg, Gujan-Dönier, Locatelli-Iseppi, Ulber Daniel

Resposta da la regenza

Cumparegliaziuns interchantunalas ston vegnir recepidas cun resalvas spezialas. A quest fatg ha la regenza gia rendì attent en sia resposta dals 7 da mars 2014 a la dumonda Nick concernent las expensas dal stadi. Per la cumparegliaziun dal svilup da las plazzas da lavur dals chantuns che "Schweiz am Wochenende" ha fatg stu­essan tranter auter vegnir resguardadas las differenzas tar la repartiziun da las in­cumbensas tranter il chantun e las vischnancas, las incumbensas ch'èn vegnidas excorporadas sco er las surdadas al chantun. Il svilup da persunal tar il chantun è fitg different tut tenor la repartiziun da las incumbensas. En il Grischun ademplescha il chantun differentas incumbensas che demussan in svilup dinamic areguard las plazzas (asil, segirezza, protecziun d'uffants e da creschids, segirezza sociala).

Tar la dumonda 1: "Schweiz am Wochenende" ha duvrà las datas publitgadas en il rapport annual da la regenza 2008 ed en la missiva tar il preventiv 2018. Il departa­ment da finanzas e vischnancas (DFV) ha rendì attent la redacziun che questas duas cifras n'èn betg cumparegliablas ina cun l'autra pervia da midadas dal sistem. En spezial èsi vegnì renvià a la midada da la moda da dumbrar en il rom da l'integraziun da las forzas auxiliaras en il plan da plazzas l'onn 2015.

Tar la dumonda 2: L'augment da las plazzas da lavur per 44 pertschient cumprovà en la "Schweiz am Wochenende" è senza expressivitad. Ils 2168 equivalents a temp cumplain (FTE) cumprovads per l'onn 2008 resguardan mo las collavuraturas ed ils collavuraturs inscrits en il plan da plazzas. Ils onns 2015 e 2016 èn las forzas auxi­liaras e las emprendistas ed ils emprendists vegnids integrads en il plan da plazzas. Il dumber da plazzas è creschì per 544 FTE senza ch'ils custs da persunal sajan s'augmentads. Ils custs da persunal (en miu. francs) èn sa sviluppads dapi l'onn 2008 sco suonda:

-
Tar la dumonda 3: Las plazzas che vegnan creadas vegnan mintgamai cumprovadas en moda transparenta en la missiva tar il preventiv. Guardà en moda cumulada èn las suandantas plazzas vegnidas permessas cun ils preventivs 2009-2018 en las unitads administrativas (UA) cun in augment da dapli che 10 FTE: 
-Sch'ina plazza na vegn betg occupada durant l'onn, en il qual ella è vegnida permes­sa, po ella – pervia da la gestiun basada sin ils custs – puspè vegnir stgaffida durant ils onns suandants resp. vegnir quintada duas giadas. La tabella mussa ina cre­schientscha effectiva dals FTE ch'è memia gronda. Ella na mussa er betg l'aboliziun da plazzas.

Tar la dumonda 4:  Da l'augment da plazzas han er profità fermamain las regiuns. Plazzas èn vegnidas stgaffidas tant a Cuira sco er en las regiuns. La APUC, incum­bensas en il sectur da la segirezza sco ils centers da controlla per il traffic pesant ed ils centers d'asil èn exempels per plazzas ch'èn vegnidas stgaffidas en las regiuns. Pervia da la dischlocaziun procura il stabiliment per l'execuziun giudiziala Cazas Tignez in grond augment da plazzas en la regiun Viamala a partir da l'onn 2019. Indicaziuns cumplementaras en chaussa cuntegna la resposta da la regenza a la dumonda Casutt-Derungs concernent il svilup da plazzas centralas e decentralas tar l'administraziun chantunala dals 16 d'avust 2016.

Tar la dumonda 5: Ils custs da persunal vegnan reglads a maun da las directivas da la politica da finanzas. L'augment da la summa dals salaris vegn suttamess al cus­segl grond mintgamai cun la missiva tar il preventiv. La creschientscha da la summa dals salaris relevanta per la valur directiva è limitada ad 1 pertschient per onn. Que­sta regulaziun surordinada è sa cumprovada.

Tar la dumonda 6: Dapi ch'il cussegl grond ha prendì enconuschientscha da la stra­tegia chantunala d'immobiglias l'onn 2010 (missiva carnet nr. 6/2009-2010) è il dum­ber da collavuraturas e collavuraturs s'augmentà pass per pass. Quest svilup n'ha nagina influenza sin la realisaziun dals nov centers administrativs regiunals. Il svilup influenzescha però la surfatscha utilisada e la dimensiun dals centers. In'ulteriura influenza ha il svilup en direcziun da plazzas parzialas. Pervia da questa tendenza crescha il dumber da collavuraturas e da collavuraturs pli svelt ch'il dumber da plaz­zas. Per garantir las plazzas da lavur necessarias èn vegnidas fatgas con­cen­traziuns dal dumber da plazzas, e biros èn vegnids prendids a fit en singuls lieus.

18 d'avrigl 2019