Il pass da l'Alvra ha in'autezza da 2312 m s.m. e collia Bravuogn en la Val d'Alvra cun La Punt Chamues-ch en l'Engiadina. Il trassé actual da la via dal pass da l'Alvra è vegnì construì da l'onn 1864 fin l'onn 1866 ed è inscrit en l'inventari federal da las vias da communicaziun istoricas (IVS) sco object d'impurtanza naziunala "cun substanza resp. cun blera substanza". Tenor l'art. 14 al. 1 da l'ordinaziun davart las vias dal chantun Grischun (OVias; DG 807.110) na vegn la via da colliaziun actuala betg tegnida averta dal chantun durant l'enviern.

Il pass da l'Alvra generescha – en cumparegliaziun cun ils auters pass en l'Engiadina – in volumen da traffic relativamain pitschen. Ma pervia da la geometria da la via e pervia da la limita da tonnascha ha il pass da l'Alvra cunzunt ina impurtanza turistica. Dapi circa 50 onns durant ils mais d'enviern vegn la via chantunala tranter Preda e Bravuogn duvrada da la vischnanca per scarsolar.

La statistica da las averturas dals pass da l'uffizi da construcziun bassa mussa ch'il pass da l'Alvra pudeva vegnir avert per regla tranter mez matg e la fin da matg durant ils onns 1999 fin 2018. Cun sia avertura tardiva, ils 13 da zercladur, è l'onn 2019 in'excepziun. Quai vala però per l'entira Svizra en connex cun las averturas dals pass, e quai pervia da l'enviern 2018/2019 cun fitg blera naiv.

Tar la dumonda 1: La regenza è conscienta da l'impurtanza turistica ed economica resultanta dal pass da l'Alvra sco colliaziun la pli curta dal Grischun dal nord en l'Engiadina. Correspundentamain èn previsas vastas mesiras da sanaziun sin la via dal pass da l'Alvra durant ils proxims 5 onns.

Tar la dumonda 2: Per lung da la via dal pass da l'Alvra sa chattan tut en tut set laviners enconuschents. Cunzunt èsi difficil da prevair las lavinas che sa distatgan en la grippa sumbrivanta. Là lieua la cuverta da naiv pir vers la stad, uschia ch'igl è adina puspè da far quint cun lavinas fin lura. Pervia da las spundas da grippa fermamain structuradas cun vallatschas separadas è limità er l'effect da las siglientadas da lavinas. Quai cunzunt er sch'i dat naiv marscha, sco savens la primavaira.

Per pudair eruir mesiras per reducir las ristgas sco er in eventual potenzial da meglieraziun en connex cun l'avertura dal pass èn vegnids fatgs scleriments pli detagliads pertutgant la situaziun da lavinas al pass da l'Alvra gia l'onn 2010. Quests scleriments han mussà essenzialmain che per segirar la via èn necessarias vastas mesiras architectonicas sco galarias, rempars da sustegn e da deviaziun. Sin fundament da l'impurtanza naziunala da la via dal pass da l'Alvra en l'inventari da las vias da communicaziun istoricas vegni mess en dumonda, sche talas intervenziuns èn insumma pussaivlas.

Tar la dumonda 3: Pervia da l'utilisaziun da la via dal pass da l'Alvra sco via da scarsolar e da viandar po il pass vegnir avert pir a partir da la fin da mars, resguardond las lavurs da rumida da la via da scarsolar englatschada, ch'èn mintgamai necessarias. Ord vista da la regenza èn las mesiras ch'èn sut quest aspect raschunaivlas e commensuradas per meglierar l'avertura dal pass, gia vegnidas introducidas da l'uffizi chantunal da construcziun bassa. Dapi 5 onns vegnan uschia distatgadas artifizialmain lavinas durant l'entir enviern per distgargiar a temp la via e per stgaffir uschia las premissas optimalas per in'avertura uschè tempriva sco pussaivel. Per obtegnair meglras basas da decisiun en il sectur da la "lavina da cunfin" ch'è critica per l'avertura dal pass, è vegnida construida ina staziun provisorica dad IMIS (sistem integrà da mesiraziun e d'infurmaziun) l'onn 2019. Ulteriuras mesiras sco cunzunt galarias, rempars da sustegn e da deviaziun n'èn betg previsas il mument.

7 d'avust 2019