Navigaziun principala

Cuntegn da la pagina

Dumonda Schneider concernent la gestiun d'ina apoteca publica tras l'ospital chantunal dal Grischun

Sessiun: 14.06.2019

En il sectur d'entrada da l'edifizi nov da l'ospital chantunal dal Grischun è planisada sper ina cafetaria tranter auter in'apoteca publica. Quella duai vegnir averta en il decurs da l'onn 2020. L'apoteca vegn manada sco filiala independenta da l'ospital chantunal dal Grischun. En quest connex sa tschenta la dumonda, pertge che l'ospital chantunal che vegn finanzià cun daners da taglia sto manar in'atgna apoteca, malgrà ch'il provediment medicinal da basa en la Val dal Rain grischuna è cuvrì surproporziunalmain.

Perquai vulessan las interpellantas ed ils interpellants che la regenza respundia las suandantas dumondas:

1.       Èsi admissibel tenor lescha che l'ospital chantunal dal Grischun maina in'apoteca publica?

2.       Èsi tenor la regenza raschunaivel che l'ospital chantunal dal Grischun che vegn finanzià cun daners da taglia concurrenzescha ils manaschis en la Val dal Rain grischuna cun manar in'apoteca publica?

3.       Pertge n'è la gestiun da l'apoteca betg vegnida publitgada?

4.       En l'ospital chantunal ad Aarau vegn l'apoteca publica da l'ospital manada da las apotecas da la regiun. È questa opziun medemamain vegnida persequitada? Sche gea, pertge han ins la finala refusà quella?

5.       Na guntgescha l'ospital chantunal dal Grischun cun la gestiun d'ina atgna apoteca publica betg il dretg restrenschì dals medis da consegnar sezs medicaments, che vala a Cuira?

6.       Èsi garantì che l'apoteca publica vegn manada separadamain da l'apoteca da l'ospital e pia ch'ella n'ha nagins avantatgs da concurrenza envers ils auters manaschis en la regiun (p.ex. tras reducziuns dal pretsch per grondas quantitads)?

Puntraschigna, ils 14 da zercladur 2019

Schneider, Rutishauser, Rettich, Berther, Bettinaglio, Bigliel, Brunold, Buchli-Mannhart, Caluori, Cantieni, Casutt-Derungs, Cavegn, Caviezel (Cuira), Crameri, Deplazes (Rabius), Derungs, Epp, Föhn, Gasser, Hefti, Hohl, Kasper, Kohler, Kunfermann, Maissen, Märchy-Caduff, Niggli (Samedan), Niggli-Mathis (Grüsch), Papa, Pfäffli, Ruckstuhl, Schmid, Stiffler, Tanner, Tomaschett (Breil), Tomaschett-Berther (Trun), Ulber, Widmer (Favugn)

Resposta da la regenza

Tar la dumonda 1: Gea, i na dat ni relaschs chantunals ni relaschs federals che impe­dissan quai. L'apoteca publica da l'ospital chantunal dal Grischun sto ademplir las me­demas premissas per la permissiun sco tut las autras apotecas publicas en il chantun Grischun.

Tar la dumonda 2: L'ospital chantunal dal Grischun è ina fundaziun independenta da dretg privat. Sco tala è ella libra en sia activitad d'interpresa. La "Apoteca Loë" vegn manada sco societad anonima independenta. Tut las aczias èn en possess da la fun­da­ziun Ospital chantunal dal Grischun. Ella è independenta da la finanziaziun dals ospitals e na vegn pia betg finanziada cun daners da las cassas da malsauns u cun contribu­ziuns chantunalas e communalas. Che la gestiun da l'apoteca saja indepen­denta dal manaschi d'ospital vegn examinà en il rom dal controlling annual da l'uffizi da sanadad.

Sco tut las autras apotecas publicas stat l'apoteca publica da l'ospital chantunal dal Gri­schun en concurrenza. Las pazientas ed ils pazients che vegnan relaschads da l'ospital dastgan natiralmain decider sezs, en tge apoteca (apoteca publica u apoteca da spedi­ziun) ch'els retiran lur medicaments tenor il recept da relaschada.

Tar la dumonda 3: La dumonda, sche l'ospital chantunal dal Grischun maina sez in'apo­teca publica sco societad affiliada u sch'el surdat questa incumbensa ad in post extern, è ina decisiun operativa che l'ospital chantunal dal Grischun po prender en atgna cum­petenza. Correspundentamain sto questa dumonda vegnir drizzada a l'ospital chantunal dal Grischun.

Tar la dumonda 4: Er tar questa dumonda sa tracti d'ina decisiun operativa da l'ospital chantunal dal Grischun che quel sto respunder sez.

Tar la dumonda 5: Na. Sch'ils medicaments prescrits d'ina persuna medicinala (recepts) vegnan consegnads d'ina apoteca publica, n'è quai betg ina cuntravenziun cunter il dretg restrenschì d'autodispensaziun.

Tar la dumonda 6: Gea. Tant la lescha federala davart ils medicaments ed ils products medicinals (CS 812.21) sco er la lescha introductiva tar la lescha federala davart ils me­dicaments ed ils products medicinals (DG 500.500) differenzieschan areguard la noziun sco er areguard las premissas per la permissiun tranter apotecas publicas ed apotecas d'ospital. Per conceder ina permissiun da manaschi sco apoteca publica èsi correspun­dentamain necessari da separar – tant areguard il persunal sco er areguard il spazi – tranter la "Apoteca Loë" e l'apoteca d'ospital da l'ospital chantunal dal Grischun. Sche la persuna u la societad petenta ademplescha las premissas per manar in'apoteca publi­ca, sto la permissiun vegnir concedida. Las premissas per la permissiun èn:

-     la persuna che porta la responsabladad professiunala sto avair ina permissiun per pratitgar la professiun d'apotecra respectivamain d'apotecher;

-     sche la persuna che porta la responsabladad professiunala n'è betg possessura dal manaschi, examinescha l'uffizi da sanadad l'independenza professiunala;

-     las localitads ed ils indrizs ston esser adattads per l'activitad commerziala e l'equipa­ment ch'è necessari per quai sto esser avant maun en in stadi che funcziuna en mo­da irreproschabla;

-     ed i sto esser avant maun in laboratori separà che permetta da producir medica­ments tenor formula magistralis.

Ils documents che l'ospital chantunal dal Grischun ha inoltrà adempleschan las premis­sas per manar in'apoteca publica. Correspundentamain ha l'uffizi da sanadad concedì la permissiun da manaschi.

La fundaziun Ospital chantunal dal Grischun dispona dapi plirs onns d'ina permissiun da commerzi a l'engrossa da Swissmedic. Questa permissiun autorisescha l'ospital chantunal dal Grischun da far commerzi a l'engrossa cun medicaments. Questa permis­siun permetta a l'ospital chantunal dal Grischun da furnir medicaments ad apotecas publicas u ad apotecas d'ospital en Svizra ed en il Liechtenstein. Las apotecas publicas localas pon decider sezzas, sch'ellas vulan tscherner l'ospital chantunal dal Grischun sco grossist e profitar – tras cuminanzas da cumpra – da rabats da quantitad.

15 d'avust 2019