Navigaziun principala

Cuntegn da la pagina

Incumbensa Derungs concernent la consultaziun da datas da proprietaris da bains immobigliars en il center da geodatas dal Grischun GeoGR

Sessiun: 30.08.2019

En l'art. 970 dal cudesch civil svizzer (CCS) vegn reglada la publicitad dal register funsil. L'alinea 2 da quest artitgel dat il dretg a mintga persuna da pretender infurmaziuns davart differentas datas da basa per in bain immobigliar, e quai senza restricziuns e senza stuair cumprovar in interess. Per l'execuziun regla l'art. 27 da l'ordinaziun davart il register funsil (ORF) ch'ils chantuns pon render accessiblas en l'internet las datas, da las qualas i po vegnir prendì invista senza stuair cumprovar in interess. Ils chantuns ston però garantir che las datas possian vegnir consultadas mo per in tschert bain immobigliar e ch'ils sistems d'infurmaziun sajan protegids cunter consultaziuns da seria (art. 27 al. 2 ORF).

Sin il center da geodatas dal Grischun GeoGR èn dumondas singulas davart proprietaris da bains immobigliars limitadas a 5 per di e per persuna. Quai vegn reglà en l'art. 146c al. 2 da la lescha introductiva chantunala tar il cudesch civil svizzer. Per l'interessenza privata che n'ha tenor l'ordinaziun davart il register funsil nagin access extendì a las datas dal bain immobigliar è questa limitaziun cumplitgada e dovra betg sco ultim bler temp e chaschuna gronds custs. Savens ston las datas dals proprietaris da bains immobigliars empè da quai vegnir procuradas en scrit tar l'uffizi dal register funsil e pajadas charamain, schebain che las datas fissan consultablas online per clic.

Auters chantuns paran da pudair observar las directivas federalas malgrà la pussaivladad d'ina consultaziun online che n'è betg limitada. Sin ils geo-portals dals chantuns Turgovia, Glaruna, Sviz, Appenzell Dadens ed Appenzell Dador sco er sin il portal da la citad da Cuira èn las datas dals proprietaris da bains immobigliars accessiblas en moda illimitada sur consultaziuns singulas. L'introducziun d'ina publicaziun dals proprietaris da bains immobigliars da tut il chantun è en gir er en il chantun Son Gagl, l'interpellaziun correspundenta da la PCD l'atun 2017 è vegnida sustegnida da la regenza e sia realisaziun è vegnida incumbensada.

La regenza vegn incumbensada – en il senn d'ina reducziun concreta da la birocrazia – d'eliminar en l'art. 146c al. 2 LItCCS la limitaziun a tschintg dumondas per di e per persuna.

Cuira, ils 30 d'avust 2019

Derungs, Caviezel (Cuira), Mittner, Atanes, Berther, Bigliel, Bondolfi, Brandenburger, Brunold, Caluori, Casty, Casutt-Derungs, Cavegn, Censi, Degiacomi, Deplazes (Cuira), Deplazes (Rabius), Ellemunter, Engler (Tavau Vitg), Epp, Fasani, Flütsch, Föhn, Gartmann-Albin, Geisseler, Giacomelli, Grass, Gugelmann, Hartmann-Conrad, Hefti, Hitz-Rusch, Hohl, Horrer, Jochum, Koch, Kohler, Kunfermann, Kuoni, Locher Benguerel, Loepfe, Loi, Maissen, Märchy-Caduff, Michael (Donat), Michael (Castasegna), Müller (Susch), Müller (Favugn), Natter, Papa, Paterlini, Perl, Preisig, Rettich, Ruckstuhl, Rüegg, Rutishauser, Salis, Sax, Schmid, Schneider, Schutz, Thomann-Frank, Tomaschett (Breil), Tomaschett-Berther (Trun), Ulber, Waidacher, Wilhelm, Zanetti (Sent), Zanetti (Landquart), Davaz, Engler (Surava), Federspiel

Resposta da la regenza

Ils 11 da zercladur 2014 ha il cussegl grond concludì ina revisiun parziala da la lescha introductiva tar il cudesch civil svizzer (LItCCS; DG 210.100), ch'è entrada en vigur il 1. da schaner 2015. La disposiziun integrada da nov da l'art. 146c LItCCS prevesa – en il rom da l'admissibladad tenor il dretg federal – ina publicaziun en l'internet d'infurmaziuns dal register funsil. La publicaziun vegn fatga sur consul­ta­ziuns, che sa refereschan a bains immobigliars, sin il portal da GeoGR. Per la pro­tecziun cunter consultaziuns da seria dastgan vegnir fatgas maximalmain tschintg consultaziuns per di. La regenza era da l'avis che l'integraziun da l'art. 146c LItCCS saja inditgada en vista al svilup en il sectur da la publicaziun electronica da datas. En la procedura da consultaziun tar questa revisiun parziala è vegnida exprimida la tem­ma che la publicaziun da datas en l'internet stettia en cuntradicziun cun la protecziun da datas. La regenza è da l'avis che la publicaziun ord vista da la protecziun da da­tas stettia en accord cun il dretg federal, premess che las restricziuns tenor l'art. 27 al. 2 da l'ordinaziun (federala) davart il register funsil (ORF; CS 211.432.1) vegnian respectadas. Cun il sistem actual, tenor il qual i sto d'ina vart vegnir cliccà l'emprim sin il bain immobigliar ed alura sin in "link a la consultaziun dal proprietari" sco er suenter endatà in code da segirezza (captcha) ed acceptadas las disposiziuns d'utilisaziun, avant che las indicaziuns cumparan, e ch'igl exista da l'autra vart ina limitaziun a tschintg consultaziuns per di e per apparat, vegni tegni quint da questa prescripziun dal dretg federal sco er da la protecziun da datas. Uschia po – tenor l'avis da la regenza – er vegnir satisfatga suffizientamain l'interessenza privata.

Dal rest saja menziunà ch'i dastga tenor l'art. 28 ORF vegnir previs in access extendì (main limità) mo per gruppas spezialas da persunas, sco funcziunaris da documen­taziun u er bancas, cassas da pensiun e la Posta per las datas ch'èn necessarias per la fatschenta d'ipotecas. Autras gruppas sco interpresas d'immobiglias ed interpresas sumegliantas na tutgan betg tar questas gruppas.

Tenor l'incumbensa duai la regenza abolir en l'art. 146c al. 2 LItCCS la limitaziun a tschintg consultaziuns per di e per persuna. Scleriments tar ils chantuns menziunads en l'incumbensa e tar la citad da Cuira han mussà ch'ils chantuns AI, AR, GL e SZ sco er la citad da Cuira n'enconuschan nagina limita per consultaziuns singulas. Il chantun SG pretenda tar ils sistems communals ina limitaziun a maximalmain diesch consultaziuns per persuna e per di u ina retardaziun che daventa adina pli ferma a partir da sis consultaziuns tras la medema adressa dad IP. Il chantun TG ha endrizzà ina funcziun da captcha che sto vegnir renovada suenter diesch consultaziuns. Quai duai render "inattractivas" consultaziuns da seria. Per l'uffizi federal per il dretg dal register funsil e per il dretg funsil (UFRF) èn ils chantuns responsabels da prevair mesiras da protecziun ch'èn adattadas per impedir consultaziuns da seria. El recu­monda en general ina tscherta retegnientscha en connex cun l'access electronic a datas dal register funsil (chavazzin: il proprietari transparent). Portals che permet­tessan senza restricziuns consultaziuns singulas, cuntrafetschian al dretg federal. El recumonda indrizs da protecziun, che pon vegnir sviads mo cun gronds sforzs, e mo pussaivladads che permettan fitg paucas repetiziuns per di. En cas d'ina avertura pli generusa postulescha l'incumbensà chantunal per la protecziun da datas ch'in dretg da bloccada vegnia introducì almain parallelamain per ils proprietaris d'in bain immo­bigliar.

Tenor l'avis da la regenza stattan en spezial il dretg da las burgaisas e dals burgais sin protecziun da lur datas cunter access nuncontrollads e las prescripziuns da la lescha en l'art. 27 al. 2 ORF en ina cuntradicziun insurmuntabla cun in'ulteriura aver­tura da l'access tenor l'art. 146c al. 2 LItCCS. L'introducziun d'in dretg da bloccada en cas d'ina ulteriura avertura destruiss da l'autra vart facticamain puspè il niz da l'access online.

Sa basond sin questas explicaziuns propona la regenza al cussegl grond da refusar questa incumbensa.

18 d'october 2019