Navigaziun principala

Cuntegn da la pagina

Dumonda Fasani-Horath concernent WLAN e prevenziun da la sanadad per uffants e giuvenils

sessiun: 22.10.2019

Cun digitalisar la furma d'instrucziun en il Plan d'instrucziun 21 vegnan installads en las stanzas da scolina e da scola access a WLAN. Prendì questas decisiuns han las directuras ed ils directurs da l'educaziun publica respectivamain la cumissiun da furmaziun. Quai senza incumbensa dal chantun. Las stanzas da scola vegnan uschia engrevgiadas cun electrosmog. Quai po vegnir evità cun internet a cabel. Il barat da datas sur cabel è pli svelt, pli segir e chaschuna main radiaziun. Trametter infurmaziuns tras l'aria dovra bler temp d'instrucziun impurtant.

Ils uffants èn bler pli permeabels ed adsorptivs per la radiaziun nunionisanta electromagnetica pulsanta (quai che na vegn betg resguardà en las limitas actualas) e ston perquai vegnir protegids spezialmain, cunzunt cunter la pulsiun da 10 Hz che po chaschunar ina memoria da stress (prof. dr. med. habil. Karl Hecht, professer per neurofisiologia, Berlin). Il UFAM scriva ch'ina leva radiaziun d'auta frequenza po midar las flussiuns cerebralas. Quai po influenzar la circulaziun dal sang ed il metabolissem dal tscharvè. Las consequenzas pon esser in disturbi da concentraziun e da memoria, mal il chau, stancladad ed autras chaussas. (100 studis èn vegnids resumads: Biological and pathological effects of 2.45 GHz radiation on cells, fertility, brain, and behavior da la biologa diplomada Isabel Wilke). Ils apparats finals radieschan er e na vegnan actualmain betg controllads areguard lur valurs. Ultra da quai na vegni betg sclerì consequentamain, sch'i vegnan cumprads computers cun moniturs che cuntegnan filters da glisch blaua (la glisch blaua donnegia la retina e reducescha la sintesa da melatonin ch'è impurtant per la resistenza cunter tumors e per durmir), e sch'ils uffants tegnan cun la tastatura ina distanza minimala da 30 cm tar il computer.

Pervia da quai fissi necessari da tegnair libers dad electrosmog ils locals da segiurn dals uffants da scolina e da scola sco er da las giuvnas studentas e dals giuvens students. Sin il martgà èn gia disponibels praticamain per tut ils apparats cabels d'attatg che pon vegnir colliads cun in port d'internet. Uschia po vegnir evitada la radiaziun obligata cun WLAN durant 24 uras. Quai è ina investiziun persistenta en la protecziun da la sanadad dals uffants e dals giuvenils.

Per proteger tenor meglier savair e pudair ils uffants en canortas, ils uffants da scolina, ils uffants da scola sco er las studentas ed ils students cunter radiaziun nunionisanta nuschaivla durant lur temp da scolina e da scola, sa tschenta ussa la dumonda a la regenza:

·       Pudess la regenza s'imaginar d'elavurar directivas per preschentar a las scolas soluziuns co installar las structuras digitalas senza electrosmog? (Questas directivas pudessan er vegnir applitgadas en auters lieus cun in'utilisaziun sensibla [LcUS] sco en edifizis publics, en edifizis administrativs communals e chantunals, en chasas da persunas attempadas, da persunas cun impediments e da tgira sco er en ospitals).

Cuira, ils 22 d'october 2019

Fasani-Horath, Noi-Togni, Atanes, Cahenzli-Philipp, Degiacomi, Della Cà, Gartmann-Albin, Hitz-Rusch, Hofmann, Kunfermann, Preisig, Thomann-Frank, von Ballmoos, Pajic, Sturzenegger

Resposta da la regenza

Emetturs da WLAN communitgeschan cun ils apparats finals sco smartphones u laptops sur undas electromagneticas respectivamain radiaziun nunionisanta. L'effect da questa radiaziun dependa da sia intensitad e da la frequenza sco er dal temp, durant il qual ina persuna è exponida a questa radiaziun. Retschertgas davart la dumonda, quant fitg che umans èn exponids a la radiaziun electromagnetica en il mintgadi, mussan, che mo gist 5 % da l'exposiziun quotidiana (dosa da radiaziun) derivan d'emetturs da WLAN. Las contribuziuns principalas a questa exposiziun totala derivan da staziuns da telefonia mobila (downlink: 38 %) e da telefons mobils (uplink: 35 %). Il pli auta è l'exposiziun en meds da transport publics, il pli bassa en scolas ed a chasa. Per reducir la dosa da radiaziun stuessan pia en emprima lingia vegnir reducids il downlink e l'uplink. Tgi che communitgescha per exempel cun il telefon mobil sur WLAN (empè da sur la rait da telefonia mobila) fa exact quai. Ord vista da la prevenziun da la sanadad na fissi perquai betg raschunaivel da scuman­dar WLAN en scolas. Ultra da quai na vegnan ozendi strusch pli utilisadas colliaziuns da cabel, gia per motivs pratics, damai ch'i vegn fatg diever gia oz en bleras scolas d'apparats mobils. Tenor il fegliet infurmativ da l'uffizi federal da sanadad publica dals 9 d'avust 2019 na mussan ils studis ch'èn avant maun davart la radiaziun d'auta frequenza da WLAN ni enconuschientschas cumprovadas ni infurmaziuns plausiblas davart privels per la sanadad, uschia ch'i n'èn betg necessarias mesiras da protec­ziun cunter la radiaziun electromagnetica da WLAN per tut las gruppas da la popula­ziun. La regenza na vesa perquai actualmain nagin basegn direct per directivas che duain mussar a las scolas soluziuns per endrizzar las structuras digitalas senza electrosmog.

20 da december 2019