Las limitas da canera per plazzas militaras d'armas, da tir e d'exercizi èn regladas en l'agiunta 9 da l'ordinaziun davart la protecziun cunter canera (OPC; CS 814.41). Las dumondas concernent la cumpetenza, concernent l'observaziun da las limitas e con­cernent las pussaivladads da la regenza da far valair sia influenza pon vegnir re­spun­didas sco suonda:

Tar la dumonda 1: Tenor l'art. 45 al. 3 lit. d OPC procura il departament federal da defensiun, protecziun da la populaziun e sport (DDPS) per l'execuziun da las pre­scripziuns davart las limitaziuns d'emissiuns, davart las sanaziuns sco er davart l'eruida ed il giudicament d'immissiuns da canera en cas da stabiliments da la defen­siun naziunala. L'observaziun da las limitas da canera da tir dal militar vegn pia con­trollada en l'entira Svizra tras il DDPS. Responsabel è il secretariat general DDPS, sectur "territori ed ambient".

Tar la dumonda 2: Tenor la calculaziun da la canera da l'onn 2014 vegnan sur­pas­sadas las limitas decisivas sin la plazza da tir Rossboden / Rheinsand da la plazza d'armas a Cuira. Tras la realisaziun da l'ulteriur svilup da l'armada (USviA) ha gì lieu ina concentraziun sin paucas infrastructuras da scolaziun, ch'èn dentant bain equi­padas, sco er sin plazzas d'armas e da tir che appartegnan a la confederaziun. Quai è er il cas per la plazza d'armas a Cuira e pia er per la plazza da tir Rossboden / Rhein­sand. Uschia sa lascha er declerar l'occupaziun e l'utilisaziun pli frequenta. Tenor l'art. 17 al. 6 lit. d OPC è il DDPS obligà da realisar fin ils 31 da fanadur 2025 las sanaziuns necessarias e da prender mesiras da protecziun cunter la canera sin plazzas militaras d'armas, da tir e d'exercizi, sin las qualas las limitas vegnan sur­passadas.

Tar la dumonda 3: La regenza pudess pretender dal DDPS ch'el observia las limitas da grevezza francadas en l'agiunta 9 OPC. Cunquai ch'il termin da sanaziun dura fin l'onn 2025, vegniss ina pretensiun correspundenta probablamain respundida cun la remartga che mesiras per observar las limitas da grevezza vegnian examinadas en il rom da la sanaziun. Sch'ina sanaziun cumpletta cunter la canera – che observass las limitas da grevezza – na fiss betg pussaivla, pudess il DDPS, sco autoritad executi­va, conceder facilitaziuns sin basa da l'art. 14 al. 1 lit. b OPC. En quest cas stuessan eventualas immissiuns sproporziunadas vegnir toleradas actualmain ed er en l'ave­gnir pervia d'interess predominants da la defensiun generala, uschè ditg sco la plaz­za da tir Rossboden / Rheinsand vegn duvrada sco plazza militara d'armas, da tir e d'exercizi. La regenza renda dentant attent ch'il DDPS prenda dapi var 15 onns dif­ferentas mesiras da protecziun cunter la canera e che la plazza da tir resp. d'armas Rossboden / Rheinsand è ina patruna impurtanta ed in factur economic relevant per Cuira e ses conturns. Uschia èn p.ex. vegnidas construidas boxas da protecziun cun­ter la canera da tir da las mitraglias dals chars armads a rodas da grenadiers, cun l'intent da reducir la grevezza tras il manaschi da scolaziun e d'exercizi. Il lieu da staziunament da l'armada a Cuira dat lavur a 100 collavuraturas e collavuraturs dal DDPS, e mo gia la truppa staziunada fa ina svieuta da 3 milliuns francs per onn a Cuira. Vitiers vegnan gronds posts d'expensas per il mantegniment e per il manaschi da l'infrastructura da la plazza d'armas, che vegnan surdads en emprima lingia local­main, plinavant pajaments pauschals a furniturs da prestaziuns externas ed a las vischnancas affiliadas da la plazza d'armas, ma er investiziuns en l'ulteriur svilup da l'infrastructura da l'alloschi e da la plazza d'armas. Sche la plazza d'armas a Cuira vegniss serrada, avess quai damai consequenzas per l'economia publica.

11 da december 2019