Ils 22 da november han las votantas ed ils votants da Haldenstein approvà cun 253 cunter 251 vuschs ubain cun 50,2 % cunter 49,8 % la fusiun cun la citad da Cuira. A Cuira n'ha la votaziun pertutgant la fusiun anc betg gì lieu. Sco ch'i para na vegn il resultat betg mess en dumonda giuridicamain. Tuttina sa tschentan – en vista a la decisiun fitg stretga – dumondas en connex cun fusiuns futuras.
Il resultat da la votaziun è vegnì interpretà – betg senza raschun – sco resultat casual, in resultat che fixescha bain cleramain la voluntad dal pievel, ma che na l'exprima betg en moda persvadenta. Quai na tegna betg quint da l'impurtanza d'ina tala decisiun, che schlia facticamain en moda irreversibla ina vischnanca. La dumonda è, na stuess ina decisiun da fusiun betg esser legitimada meglier politicamain.
Il chantun sustegna regularmain fusiuns cun pauschalas da promoziun e cun contribuziuns da gulivaziun. Ils daners servan a rectifitgar las structuras, na dattan dentant betg impuls per impedir deficits enconuschents da fusiuns. Il rapport davart las structuras communalas da l'onn 2018 ha mussà che l'engaschament politic en chaussas communalas sa diminuescha per gronda part suenter la fusiun. Il mussavia per vischnancas «Sa maschadar en, per plaschair» da l'uffizi chantunal da sanadad constatescha, «La participaziun e la cooperaziun èn basas da la democrazia e facturs da success en il sectur da la promoziun da la sanadad. Per che la democrazia vivia dovri uschè bleras burgaisas e burgais sco pussaivel ch'èn pronts da sa far valair e da sa maschadar en.»
En quest senn vegn la regenza supplitgada da respunder las suandantas dumondas:
1. È la regenza er da l'avis che decisiuns da fusiun, en spezial en vischnancas che vegnan schliadas cun la fusiun, stoppian cuntanscher in quorum pli qualifitgà che la maioritad simpla?
2. Èsi giavischà ord vista da la regenza, da colliar contribuziuns chantunalas en connex cun fusiuns er cun cundiziuns che garanteschan ina gronda participaziun da las burgaisas e dals burgais, l'organisaziun autonoma, la participaziun, la cumpensaziun da la pussanza e dals conflicts sco er l'innovaziun suenter la fusiun?
3. Co sa posiziunescha la regenza envers la suandanta supplica dal comité Pro Haldenstein: «Nus supplitgain perquai la regenza ed il cussegl grond da far patratgs davart la promoziun da la participaziun activa da las burgaisas e dals burgais e da l'engaschament politic en las vischnancas.»
Cuira, ils 4 da december 2019
Gasser, Widmer (Favugn), Bigliel, Cahenzli-Philipp, Florin-Caluori, Gartmann-Albin, Jenny, Noi-Togni, Preisig, Rettich, Waidacher