Navigation

Inhaltsbereich

Sessiun: 11.02.2020

Senza dubi ston las energias regenerablas vegnir engrondidas massivamain en Svizra ils proxims onns, per che l'aboliziun da l'energia atomara possia vegnir cumpensada pli u main e per ch'i na naschia betg ina dependenza massiva da l'exteriur. En spezial sto la producziun d'electricitad vegnir extendida fermamain durant l'enviern. L'incumbensa Gasser concernent dapli electricitad per il Grischun producida l'enviern cun fotovoltaica, ch'è vegnida acceptada dal Cussegl grond, pretenda pervia da quai da serrar la largia tar la producziun d'electricitad l'enviern cun promover implants da fotovoltaica.

Stabiliments d'infrastructura dal chantun, en spezial stabiliments da l'Uffizi da construcziun bassa, paran d'avair in grond potenzial en quest connex. I pon vegnir numnads per exempel: spazis libers tar construcziuns da sustegn da vias, mirs per lung da las vias chantunalas, paraids da protecziun cunter la canera (sch'ellas sa chattan en vischinanza d'in colliaziun electrica suffizienta ed èn drizzadas vers sid), fatschadas sid d'edifizis dal chantun e.u.v. Il chantun duess surpigliar ina funcziun d'exempel ed utilisar, dapertut nua che quai è pussaivel, las atgnas infrastructuras per producir energia.

Las sutsegnadras ed ils sutsegnaders dumondan la Regenza, sch'ella ha l'intenziun:

a)     d'examinar e da realisar en il futur l'installaziun d'implants fotovoltaics tar tut ils projects d'infrastructuras e d'edifizis, er sche la rentabilitad n'è per pauc betg dada;

b)    da surdar l'incumbensa d'analisar il potenzial d'implants fotovoltaics en il rom dals stabiliments d'infrastructura existents; e sche gea

c)     da surdar l'incumbensa da far in studi da realisabladad dals implants fotovoltaics en dumonda e d'als realisar la finala tenor ina glista da prioritads.

Cuira, ils 11 da favrer 2020

Cantieni, Bigliel, Rettich, Alig, Atanes, Berweger, Bettinaglio, Bondolfi, Brunold, Buchli-Mannhart, Cahenzli-Philipp, Caluori, Casutt-Derungs, Cavegn, Caviezel (Cuira), Degiacomi, Della Cà, Deplazes (Cuira), Deplazes (Rabius), Ellemunter, Epp, Fasani, Felix, Florin-Caluori, Gartmann-Albin, Gasser, Geisseler, Hartmann-Conrad, Hefti, Hofmann, Horrer, Kappeler, Kienz, Kohler, Kunfermann, Loepfe, Maissen, Märchy-Caduff, Marti, Müller (Favugn), Natter, Niggli-Mathis (Grüsch), Perl, Pfäffli, Preisig, Rüegg, Rutishauser, Sax, Schmid, Stiffler, Thür-Suter, Tomaschett (Breil), Tomaschett-Berther (Trun), von Ballmoos, Widmer (Favugn), Widmer-Spreiter (Cuira), Wilhelm, Zanetti (Sent), Costa, Flütsch (St. Antönien), Gaupp, Spadarotto, Stieger

Resposta da la regenza

La regenza parta l'opiniun che cun la producziun d'energia solara vi d'edifizis e vi da stabiliments d'infrastructura dal chantun possia vegnir contribuì a cuntanscher las fi­namiras da la Confederaziun e dal chantun areguard la politica d'energia. Cun reali­sar l'incumbensa Joos da l'onn 2012 concernent l'elavuraziun d'in cataster solar per il Grischun (PCG 2012 648) è vegnì eruì in potenzial da producziun vi dals edifizis dal chantun dad 1,3 uras da gigawatt (GWh) per onn. Ultra da quai ha l'Uffizi da con­struc­ziun auta fatg l'onn 2015 in'analisa dal potenzial d'energia solara per ils tetgs dals edifizis dal chantun. Sin edifizis dal chantun èn montads oz 11 implants foto­vol­taics che produceschan 1,2 GWh per onn. En quest connex vegni prendì en mira che l'electricitad producida vegnia duvrada en emprima lingia per l'agen basegn. In'autra situaziun da partenza sa mussa tar ils stabiliments d'infrastructura en il sectur da las vias. D'ina vart vali da resguardar che implants fotovoltaics na dastgan betg disturbar il traffic ed il mantegniment da las vias, da l'autra vart manca per gronda part la pus­saivladad da duvrar l'electricitad per l'agen basegn, ed ina colliaziun cun la rait publi­ca n'è betg adina realisabla. Entant che tar las basas dal UCB sco er tar ils lavura­to­ris (er en collavuraziun cun l'Uffizi federal da vias UVIAS) èn vegnids realisads u èn en planisaziun projects, n'èn fin ussa anc installads u projectads nagins implants fotovoltaics vi d'infrastructuras sper la via sco construcziuns da sustegn e.u.v.

Tar la dumonda 1: En il rom da l'extensiun da la producziun d'energias regenerablas surpiglia il chantun ina rolla activa. En connex cun edifizis novs e cun renovaziuns examinescha l'Uffizi da construcziun auta gia oz e dapi blers onns l'installaziun d'im­plants fotovoltaics. Pervia da las cundiziuns generalas odiernas pon implants foto­vol­taics vegnir manads en moda economica, sch'els sa chattan en lieus adattads. Per­via da quai ha la Regenza l'intenziun d'examinar pli detagliadamain las pussaivla­dads per implants fotovoltaics er en connex cun projects da vias, sch'i sa tracta da trajects che dovran energia electrica per lur manaschi (en spezial tunnels e galla­rias). Sch'il potenzial è avant maun e sche la realisabladad è dada, duain vegnir installads implants fotovoltaics en il futur. Ma els ston funcziunar en moda rentabla ord vista da la Regenza.

Tar la dumonda 2: Per ils edifizis dal chantun èn avant maun scleriments dal poten­zial correspundents. Pervia da la situaziun da partenza menziunada na vegn in'ana­lisa detagliada dal potenzial concernent implants fotovoltaics sin stabiliments d'infra­structura existents betg resguardada sco cunvegnenta. Il potenzial per realisar im­plants fotovoltaics en il perimeter da las vias duai però tuttina vegnir eruì sistematica­main tar quels trajects che dovran energia electrica per lur manaschi u per utilisa­ziuns parentadas. Il chantun vegn ad incitar ils scleriments correspundents.

Tar la dumonda 3: Per ils edifizis dal chantun è avant maun ina priorisaziun corre­spundenta che resguarda la strategia d'object dals singuls edifizis en il rom da la strategia d'immobiglias. Sin basa da questa priorisaziun èsi previs d'installar ulteriurs implants fotovoltaics sin edifizis existents. Sch'i pon vegnir eruids – en il rom dals scleriments menziunads (guardar dumonda 2) – lieus adattads per la producziun d'electricitad vi da stabiliments d'infrastructura en il sectur da las vias, èsi per la Regenza raschunaivel da far studis da realisabladad ed er da realisar implants foto­voltaics tras il chantun. Sche investiders privats èn interessads da realisar implants fotovoltaics vi d'auters trajects da via che quels menziunads, vegn l'Uffizi da con­strucziun bassa ad examinar dumondas correspundentas ed a metter a disposiziun ils stabiliments d'infrastructura correspundents per la producziun d'electricitad, pre­mess che la realisabladad saja cumprovada.

29 d'avrigl 2020