Cuntegn da la pagina

Incumbensa Niggli (Samedan) concernent la colliaziun da la plazza aviatica regiunala «Engadin Airport» cun il Forum economic mundial (WEF) a Tavau

sessiun: 11.02.2020

La plazza aviatica regiunala Samedan è situada sin 1707 m s.m. ed è uschia la plazza aviatica la pli auta da l'Europa. Sin il Plan sectorial Infrastructura (PSIA) da l'Uffizi federal d'aviatica civila (UFAC) figurescha ella sco plazza aviatica regiunala concessiunada. Actualmain vegn ella duvrada per sgols da fatschenta, da turissem e da lavur, per la scolaziun e la furmaziun supplementara aviatica sco er per il sport da sgular.

Dapi ils 5 da december 2019 ha il «Engadin Airport» in nov sistem da sgol d'arriv e da partenza che vegn regulà per satellit. La «procedura d'atterrament LSZS GNSS-IFR» è vegnida certifitgada dal UFAC ed è sa cumprovada fitg bain gia durant quest enviern. Il sistem augmenta la segirezza sco er la cuntanschibladad e permetta sgols d'arriv e da partenza er a cundiziuns meteorologicas pretensiusas. La meglra planisabladad dals sgols è ultra da quai ina schanza per sgols directs, dentant er per il turissem da congress. Plinavant datti numerus sgols a favur da la segirezza publica davent da la plazza aviatica regiunala Samedan (RFS).

Pertutgant las relaziuns dal possess da terren, è il chantun Grischun il proprietari da la plazza aviatica regiunala. L'interpresa d'infrastructura appartegna a las indesch vischnancas da l'Engiadin'Ota, gestiunada vegn la plazza aviatica da la «Engadin Airport SA». La plazza aviatica vegn proximamain suttamessa ad ina modernisaziun cumplessiva. Las construcziuns autas sco er ulteriuras infrastructuras vegnan remplazzadas ed engrondidas ils proxims onns.

Suenter questas investiziuns considerablas è la plazza aviatica regiunala en cas da sa mussar – en sia qualitad sco destinaziun da sgols d'arriv e da partenza – sco apportader dal traffic aviatic per il Forum economic mundial a Tavau e da prestar mintga onn ina incumbensa impurtanta a favur da la realisaziun da questa occurrenza. Las sutsegnadras ed ils sutsegnaders partan dal fatg, ch'i n'è betg mo en l'interess da l'Engiadin'Ota, mabain er en l'interess dal chantun, da duvrar il «Engadin Airport» ch'è ussa renovà, en moda optimala durant il WEF e d'augmentar la valurisaziun en il chantun durant il WEF.

Sut quest aspect vulan las sutsegnadras ed ils sutsegnaders dar la suandanta incumbensa a la Regenza. La Regenza vegn envidada da sclerir ils suandants fatgs:

1.     Tge mesiras èn necessarias per ch'il «Engadin Airport» possia daventar en il futur in furnitur da servetschs per il WEF e possia distgargiar la plazza aviatica Son Gagl Altenrhein e l'eroport Kloten?

2.     Tge acziuns concretas èn necessarias per integrar anc vinavant il «Engadin Airport» en il dispositiv da segirezza (analogamain a la plazza aviatica Altenrhein)?

3.     Tge (ulteriuras) pussaivladads d'utilisaziun existan per il «Engadin Airport» a favur dal WEF ed a favur da l'organisaziun da segirezza per il proxim WEF? Tge investiziuns ston eventualmain anc vegnir fatgas per quest intent?

Cuira, ils 11 da favrer 2020

Niggli (Samedan), Aebli, Föhn, Alig, Berther, Berweger, Bettinaglio, Bigliel, Brandenburger, Buchli-Mannhart, Caluori, Cavegn, Caviezel (Tavau Clavadel), Censi, Clalüna, Claus, Crameri, Danuser, Ellemunter, Engler, Felix, Flütsch (Spleia), Giacomelli, Gort, Hartmann-Conrad, Hefti, Hitz-Rusch, Hohl, Holzinger-Loretz, Jenny, Jochum, Kienz, Koch, Kunfermann, Kunz (Fläsch), Kunz (Cuira), Kuoni, Lamprecht, Loepfe, Marti, Michael (Castasegna), Mittner, Müller (Susch), Natter, Niggli-Mathis (Grüsch), Papa, Pfäffli, Preisig, Rüegg, Salis, Schutz, Stiffler, Thomann-Frank, Thür-Suter, Waidacher, Weber, Wellig, Widmer (Favugn), Widmer-Spreiter (Cuira), Zanetti (Sent), Costa

Resposta da la regenza

A la Dieta annuala dal Forum economic mundial (WEF) prendan part mintga onn var 3000 participantas e participants da l'economia, da la politica, da la scienza e da la cultura. Mo ina pitschna part da questas persunas giauda protecziun internaziunala (per exempel scheffas u schefs da stadis, scheffas e schefs da regenzas sco er ministras e ministers), e puspè mo per ina part da questa gruppa da persunas sto la Polizia prender mesiras da protecziun. Quai signifitga che la gronda part da las persunas che prendan part a la Dieta annuala dal WEF, entran e pon sa mover en Svizra senza mesiras da protecziun supplementaras/spezialas.

Las sutsegnadras ed ils sutsegnaders vulan dar a la Regenza l'incumbensa da sclerir trais puncts:

Tar il punct 1: La Fundaziun Forum economic mundial sco organisatura da la Dieta annuala a Tavau permetta a sias participantas e ses participants da tscherner libramain lur med da transport per l'arriv e per la partenza, ed ella n'ha nagins contracts cun interpresas da transport, particularmain cun plazzas aviaticas. Ils arrivs e las partenzas vegnan organisads individualmain. Las entradas en Svizra, tant dal territori da Schengen sco er da l'ulteriur territori, pon vegnir regladas gia oz senza problems en il Engadin Airport. Er l'entrada en Svizra da persunas protegidas tenor il dretg internaziunal è pussaivla senza mesiras da protecziun spezialas. Da cumplettar èsi ch'il spazi d'aria è serrà durant la Dieta annuala dal WEF. Tenor il cumond da la Aviatica militara na dastga pia il proceder GPS existent per sgols d'arriv betg vegnir applitgà, ed ils sgols d'arriv e da partenza ston capitar a vista, sche la permissiun d'atterrar respectivamain da partir è avant maun.

Tar il punct 2: En il rom da la Dieta annuala dal WEF na prepara la Polizia chantunala dal Grischun nagin dispositiv da segirezza per la plazza aviatica Altenrhein. Sco ch'igl è gia vegnì mussà qua survart, n'èn necessarias naginas mesiras da protecziun spezialas tenor il dretg internaziunal per la gronda part da las participantas e dals participants da congress. Plinavant èsi chaussa da la plazza aviatica respectiva da prender las mesiras da segirezza necessarias, per exempel per jets privats parcads. Sch'ina persuna protegida tenor il dretg internaziunal arrivass en Svizra sur il Engadin Airport, giuditgass il Servetsch federal da segirezza la periclitàziun da questa persuna e proponiss mesiras da protecziun correspundentas che la Polizia chantunala realisass temporarmain sin la plazza aviatica. Questas mesiras da protecziun fissan relativamain custaivlas, tut tenor la persuna e tut tenor las circumstanzas concretas.

Tar il punct 3: Sco ch'igl è gia vegnì preschentà qua survart, pudess entrar en Svizra gia oz la pli gronda part da las participantas e dals participants da congress sur il Engadin Airport. Sche persunas protegidas tenor il dretg internaziunal che han in tschert basegn da protecziun entrassan en Svizra sur il Engadin Airport, stuess la Polizia chantunala – en coordinaziun cun la gestiunaria da la plazza aviatica – realisar temporarmain las mesiras da protecziun che fissan necessarias en il cas concret.

Ils puncts menziunads en l'incumbensa han gia pudì vegnir sclerids.

Sa basond sin questas explicaziuns propona la Regenza al Cussegl grond da stritgar questa incumbensa.

30 d'avrigl 2020