Navigation

Inhaltsbereich

Sessiun: 11.02.2020

Per mintga uffizi chantunal da la AI fixescha l'Uffizi federal d'assicuranzas socialas (UFAS) finamiras da quotas. Las finamiras da prestaziun prescrittas per l'onn 2018 sa cloman per la gronda part dals uffizis da la AI: Tegnair u sbassar las rentas novas, tegnair u sbassar il dumber total da las rentas da la AI sco er tegnair u sbassar ils custs per persuna assicurada. Talas finamiras da prestaziun èn ordvart problematicas en connex cun l'assicuranza d'invaliditad. Finamiras da quotas han per consequenza che l'assicuranza d'invaliditad n'examinescha betg pli dapertut avertamain, da tge prestaziuns ch'ina persuna assicurada ha il dretg. Pervia da talas finamiras da prestaziun s'etablescha entaifer ils uffizis chantunals da la AI ina cultura problematica che stat en cuntradicziun cun las directivas da la legislaziun davart l'assicuranza d'invaliditad.

L'assicuranza d'invaliditad ha l'obligaziun legala da conceder d'ina vart a tut las persunas assicuradas quellas prestaziuns, da las qualas ellas han il dretg tenor lescha, e da na conceder da l'autra vart naginas prestaziuns, da las qualas ellas n'han betg il dretg. Finamiras da quotas stattan en cuntradicziun cun quest princip. Perquai supplitgain nus en quest reguard la Regenza da respunder las suandantas dumondas:

1.     Ha il UFAS definì finamiras da prestaziun cun l'Uffizi da la AI dal Grischun? Sche gea, co sa cloman quellas?

2.     Co exactamain vegni mesirà e controllà, sche las quotas en mira vegnan cuntanschidas (pertschients, posiziuns decimalas e.u.v.)? Vegni examinà correspundentamain, sche finamiras na vegnan betg cuntanschidas?

3.     È la Cumissiun administrativa vegnida orientada davart las finamiras da prestaziun ed èn questas finamiras relevantas per la strategia da l'Uffizi da la AI dal Grischun?

4.     Vegnan las collavuraturas ed ils collavuraturs da l'Uffizi da la AI dal Grischun infurmads davart las finamiras da prestaziun? Sche gea, co vegnan ellas ed els infurmads e vegnan ellas ed els orientads cuntinuadamain davart il stadi da las cifras ch'èn actualmain relevantas?

5.     Tge capita en cas da conflicts d'interess? Èsi legal, sche collavuraturas e collavuraturs d'in uffizi da la AI refusan ina presta­ziun per cuntanscher la quota, malgrà ch'il dretg da la prestaziun è evident? Sche betg, a tge serva lura il sistem da quotas?

6.     Tge tenuta ha la Regenza envers la pratica dal UFAS da fixar finamiras da prestaziun cun l'Uffizi da la AI dal Grischun?

7.     Co giuditgescha la Regenza il conflict / dilemma per las collavuraturas ed ils collavuraturs da l'Uffizi da la AI dal Grischun tranter l'adempliment da las finamiras da prestaziun dal UFAS d'ina vart sco er il dretg da prestaziun ed il princip d'inquisiziun da l'autra vart?

Cuira, ils 11 da favrer 2020

Ruckstuhl, Hitz-Rusch, Alig, Atanes, Baselgia-Brunner, Bondolfi, Brunold, Caluori, Cantieni, Casutt-Derungs, Cavegn, Caviezel (Cuira), Crameri, Degiacomi, Deplazes (Cuira), Deplazes (Rabius), Derungs, Dürler, Epp, Fasani, Favre Accola, Florin-Caluori, Gartmann-Albin, Geisseler, Hofmann, Holzinger-Loretz, Horrer, Hug, Jochum, Kienz, Kohler, Kunfermann, Loepfe, Maissen, Märchy-Caduff, Müller (Favugn), Natter, Niggli-Mathis (Grüsch), Paterlini, Preisig, Rettich, Rüegg, Rutis­hauser, Sax, Schmid, Thomann-Frank, Tomaschett-Berther (Trun), Wellig, Widmer-Spreiter (Cuira), Wilhelm, Zanetti (Sent), Spadarotto, Stieger

Resposta da la regenza

Dapi che la nova concepziun da la gulivaziun da finanzas e da la repartiziun da las incumbensas tranter la Confederaziun ed ils chantuns è entrada en vigur l'onn 2008, è cumpetenta unicamain la Confederaziun per la surveglianza professiunala, admi­nistrativa e finanziala dals uffizis da la AI. Correspundentamain è la surveglianza vegnida reglada da nov en il rom da la 5. revisiun da l'assicuranza d'invaliditad. Il focus na vegn ussa betg pli mess sin ina controlla realisada en moda suverana, ma­bain sin ina gestiun orientada als resultats. En il rom da la nova orientaziun ad ina surveglianza constructiva che sa basa sin il dialog, è vegnì stgaffì tranter auter l'in­strument da la cunvegna da finamiras (art. 52 da l'Ordinaziun davart l'assicuranza d'invaliditad [OAI; CS 831.201] en cumbinaziun cun l'art. 64 al. 1 e cun l'art. 64a da la Lescha federala davart l'assicuranza d'invaliditad [LAI; CS 831.20]). Cun agid da cun­vegnas tranter l'Uffizi federal d'assicuranzas socialas (UFAS) ed ils uffizis chan­tunals da la AI duai vegnir garantì che las incumbensas dals uffizis da la AI vegnian realisadas en moda efficazia ed unitara sco er en in'auta qualitad (art. 57 ed art. 59 al. 2 LAI). Ademplind l'incumbensa legala fa il UFAS – en in ciclus annual – cun mintga uffizi da la AI ina cunvegna da finamiras. La cunvegna cuntegna d'ina vart finamiras generalas a maun d'indicaturs d'effects. Questas finamiras valan da me­dema maniera per tut ils uffizis da la AI. Da l'autra vart ston vegnir fixadas finamiras specificas en il dialog tranter il UFAS e mintga uffizi da la AI. Quellas sa basan per regla sin ils resultats dals audits dal UFAS che han lieu avant ils discurs per la fixa­ziun da las finamiras. Eventualmain pon ellas esser identicas cun las recumanda­ziuns dals rapports dals audits.

Tar la dumonda 1: Per l'onn 2020 èsi vegnì desistì da fixar finamiras quantitativas tranter il UFAS ed ils uffizis chantunals da la AI. Empè da quai è la cunvegna da finamiras 2020 vegnida reducida a las recumandaziuns qualitativas da l'audit dal UFAS dal november 2019. Actualmain n'existan pia naginas cunvegnas da finamiras quantitativas pli davart la quota da rentas novas e davart la quota da rentas existen­tas tranter ils UFAS e l'Uffizi da la AI dal Grischun. Fin l'onn 2019 èn vegnidas fixa­das tranter il UFAS e l'Uffizi da la AI dal Grischun – sco en tut ils chantuns – valurs da finamira per ils indicaturs d'effects. Questas valurs da finamira n'èn dentant betg vegnidas interpretadas sco finamiras da prestaziun liantas, mabain sco valurs d'orientaziun e da planisaziun.

Tar la dumonda 2: Ils indicaturs d'effects vegnan eruids dal UFAS e mess a dispo­siziun mintga quartal als uffizis da la AI. Là èn visiblas er las valurs dals auters chan­tuns. Las cifras na servan betg en emprima lingia a la controlla, mabain èn plitgunsch ina basa per il barat professiunal cun il UFAS, nua che las valurs vegnan messas en in context pli vast. Quest tractament qualitativ ha lieu d'ina vart en il rom dal discurs per la fixaziun da las finamiras, da l'autra vart a chaschun dals discurs d'audit durant ils audits annuals dal UFAS.

Tar la dumonda 3: Dapi l'onn 2019 survegn la cumissiun administrativa da l'Institut d'assicuranza sociala (IAS) dal Grischun mintgamai il management summary dal rapport da l'audit dal UFAS. En quel vegn commentà il stadi actual dals indicaturs d'effects. Ils indicaturs d'effects èn agids d'orientaziun e da planisaziun per la gestiun operativa da l'Uffizi da la AI. Da princip n'han els nagina impurtanza strategica. Per­quai vegn la direcziun da la IAS dal Grischun infurmada regularmain tras il manader da l'Uffizi da la AI mo davart il svilup da quests indicaturs.

Tar las dumondas 4, 5 e 7: La direcziun da l'Uffizi da la AI s'occupa regularmain cun il svilup dals indicaturs d'effects. A las collavuraturas ed als collavuraturs na vegnan questas cifras betg communitgadas activamain, perquai che quests indicaturs n'èn betg relevants per lur incumbensa, numnadamain per sclerir e per disponer presta­ziuns cun resultats averts, ch'èn neutralas e confurmas a las pretensiuns. Pervia da quai n'existan nagins conflicts d'interess tranter ils indicaturs d'effects e l'incumbensa legala. Ils indicaturs d'effects han ina funcziun da monitoring per la gestiun operativa da l'Uffizi da la AI. Els servan sco valurs d'orientaziun e pon esser utils sco basa da datas per far in'analisa ed ina reflexiun professiunala sco er per planisar las resursas.

Tar la dumonda 6: Il UFAS è obligà tras lescha da far cun mintga uffizi chantunal da la AI ina cunvegna da finamiras. En la cunvegna ston vegnir fixads en spezial l'effect e la qualitad che duain vegnir cuntanschids sco er la rapportaziun (art. 52 al. 1 OAI). Actualmain desista il UFAS da fixar finamiras da prestaziun en la furma veglia (guar­dar dumonda 1). La cunvegna da finamiras tenor la furma veglia vegn actualmain revedida.

23 d'avrigl 2020