Navigation

Inhaltsbereich

Incumbensa da la fracziun da la PBD concernent in program d'impuls per l'economia grischuna

Sessiun: 19.06.2020

La pandemia dal coronavirus ha tutgà l'economia grischuna sin il viv. Grazia ad emprimas intervenziuns da la Confederaziun e dal chantun (lavur reducida, credits COVID, fond per cas da direzza) è vegnida impedida ina reducziun massiva u schizunt in collaps da l'economia. Tuttina èn numerusas investiziuns vegnidas spustadas u suspendidas pervia dal coronavirus, e la vista malsegira sin noss turissem d'enviern talmain essenzial è vinavant ina ristga considerabla. La fracziun da la PBD dal Cussegl grond è perquai da l'avis ch'i dovria ussa svelt e sistematicamain mesiras che sustegnan l'economia grischuna, en spezial las interpresas pitschnas e mesaunas (IPM) ed il turissem. Mesiras che dattan a l'economia dal Grischun segirezza sco en la fasa 1 da la pandemia dal coronavirus, per ch'i vegnian debloccadas investiziuns ed innovaziuns privatas.

En il center na stattan per la fracziun da la PBD explicitamain betg contribuziuns finanzialas à fonds perdu, mabain plitost mesiras per promover projects gia planisads ed il sustegn tras la creaziun da cundiziuns generalas favuraivlas per IPM, eventualmain er da durada limitada (tras la sunset legislation). Quai po il chantun per exempel far cun fixar vinavant finamiras da pajament a fitg curt termin, cun focussar las directivas da surdada resguardond il meglier pussaivel e confurm al dretg interpresas dal Grischun u cun examinar las taxas en vista al princip da la cuvrida dals custs che vala tuttavia. Il punct decisiv è quel ch'il pachet da mesiras vegn elavurà e preschentà bainbaud en moda vasta sur l'entira administraziun.

La fracziun da la PBD pretenda perquai da la Regenza:

  1. Al Cussegl grond duai vegnir preschentà bainbaud in program d'impuls cumplessiv per promover l'economia grischuna.
  2. En connex cun l'elavuraziun duai vegnir resguardà primarmain in sustegn betg finanzial, e mo nua che quai è necessari e cumprovadamain efficazi duain vegnir proponidas contribuziuns finanzialas.
  3. Sco part dal program d'impuls duain vegnir elavuradas ensemen cun ils partenaris dal turissem mesiras per minimar la ristga d'ina gronda perdita per il turissem durant la proxima stagiun d'enviern.

Cuira, ils 19 da zercladur 2020

Hohl, Loi, Michael (Donat), Aebli, Bettinaglio, Buchli-Mannhart, Casty, Clalüna, Danuser, Ellemunter, Grass, Gugelmann, Hardegger, Hefti, Lamprecht, Müller (Susch), Niggli-Mathis (Grüsch), Papa, Tanner, Widmer (Favugn), Widmer-Spreiter (Cuira), Zanetti (Sent)

Resposta da la regenza

La pandemia dal coronavirus chaschuna grondas sfidas per l'economia grischuna. Las mesiras per franar la derasaziun dal virus sco er la malsegirezza ch'è colliada cun quai areguard l'ulteriur decurs han effects negativs sin l'export, sin la prontezza da far investiziuns e sin il clima da consum. Per l'onn 2020 quinta il Secretariat da stadi per l'economia SECO (stadi dal zercladur 2020) per la Svizra cun ina reducziun dal PIB da 6,2 % envers l'onn precedent. L'activitad economica internaziunala dastgass sa remetter mo plaunsieu. 

Gia il mars e l'avrigl 2020 ha la Regenza – sco cumplettaziun da las mesiras federalas – concludì mesiras immediatas sistematicas per mitigiar las consequenzas economicas da la pandemia da COVID-19. Ultra da mesiras da sustegn finanzialas (garanzias solidaricas, differents credits posteriurs) cumpiglia il pachet da mesiras er facilitaziuns betg finanzialas per las interpresas e per la populaziun. Per exempel vegnan ils quints che entran tar l'administraziun chantunala, examinads immediata­main e pajads uschè svelt sco pussaivel. Plinavant vegn er la pussaivladad da pro­lungar il termin da pajament per quints dal chantun che n'èn anc betg pajads u da permetter in pajament en ratas, applitgada en moda generusa. Questas mesiras mitigeschan stretgas da liquiditad da las interpresas senza engrevgiar las finanzas chantunalas.

L'examinaziun periodica da las taxas tenor il princip da la cuvrida dals custs è ina incumbensa obligatorica da l'administraziun chantunala. Areguard las taxas ha la Regenza concludì da desister fin la fin da l'onn 2020 da tschains da retard sco er d'incassar taxas d'admoniziun per quints dal chantun, sco taglias, taxas e multas. Ultra da quai ha la Regenza concludì d'applitgar en moda culanta las modalitads da restituziun per emprests NPR u per emprests chantunals. 

La Regenza è ordvart conscienta da la rolla dal chantun sco incumbensader impur­tant, ed ella persequitescha attentamain quest fatg. Nua che quai è giuridicamain pussaivel e raschunaivel tira l'administraziun chantunala perquai a niz en general gia oz la libertad d'agir tenor la legislaziun da submissiun a favur da l'economia indigena. Plinavant sa stentan ils posts chantunals dapi il cumenzament da la crisa da corona da realisar las surdadas, las proceduras ed ils programs da construcziun senza retar­daments ed uschia da sustegnair la mastergnanza indigena. En il sectur da l'avertura dal guaud e da las ovras da protecziun cunter privels da la natira duain vegnir suste­gnidas pli intensivamain las vischnancas, per che quellas possian realisar pli svelt projects planisads.

L'ulteriur decurs da la pandemia e pia er da la conjunctura è collià cun grondas malsegirezzas. Per definir en moda cunvegnenta mesiras en il senn d'in program d'impuls a media fin a lunga vista per l'economia grischuna èsi perquai impurtant da pensar en scenaris. Resguardond ulteriuras lavurs da basa ha il Forum economic dal Grischun fatg ina valitaziun correspundenta ed identifitgà champs d'acziun pussai­vels. Sa basond sin quai ha il chantun lantschà il zercladur 2020 dus projects par­zials ch'èn accordads in cun l'auter e che pon vegnir chapids sco program d'impuls per l'economia grischuna.

  • Economia: Incumbensa a las organisaziuns da tetg da l'economia grischuna (incl. Societad grischuna dals impressaris constructurs) d'elavurar ensemen cun il Forum economic dal Grischun basas strategicas per mauns dal chantun.
  • Turissem: Incumbensa a la Cuminanza d'interess per il turissem en il Grischun d'examinar propostas da mesiras cun il focus sin l'enviern 2020 sco er d'elavurar basas per in program da structura a lunga vista per il turissem en il Grischun. L'elavuraziun da mesiras a curta vista per mitigiar las consequenzas da la pande­mia dal coronavirus durant la proxima stagiun d'enviern fa part da l'incumbensa a la Cuminanza d'interess per il turissem che represchenta ils acturs ils pli impur­tants dal turissem grischun.

Sin fundament da questas lavurs duain vegnir deducids fin la fin da l'onn champs d'acziun e mesiras pussaivlas.

Sa basond sin questas explicaziuns propona la Regenza al Cussegl grond da midar questa incumbensa sco suonda:

  • La Regenza cuntinuescha cun las incumbensas e cun las lavurs skizzadas en furma da mesiras d'impuls sistematicas per l'economia e per il turissem.
  • La Regenza cuntinuescha cun la realisaziun da las mesiras da sustegn betg finanzialas gia concludidas.

26 d'avust 2020