Navigation

Inhaltsbereich

Dumonda Fasani-Horath concernent la valitaziun da l'obligatori da vaccinar resguardond las malsegirezzas en connex cun la vaccinaziun

Sessiun: 09.12.2020

En la Lescha federala d'epidemias (LEp) stat en l'art. 22: Ils chantuns pon declerar per obligatoricas vaccinaziuns da gruppas da la populaziun periclitadas, da persunas spezialmain expostas e da persunas ch'exequeschan tschertas activitads, sch'igl exista in privel considerabel.

Il minister da sanadad Alain Berset po s'imaginar ch'i pudess daventar obligatoric per tschertas persunas da laschar sa vaccinar cunter COVID-19. En la «Rundschau» SRF dals 23-09-2020 ha el numnà p.ex. il persunal da chasas da persunas attempadas che dastga lavurar vinavant cun persunas pli veglias mo, sch'el è vaccinà cunter il coronavirus – uschespert ch'ina vaccinaziun è disponibla ed admessa. Durant quest temp stuessan persunas che na vulan betg laschar sa vaccinar, laschar sa dischlocar en in'autra partiziun, nua ch'i na sa chattan naginas persunas da ristga, perquai che tenor lescha na dastga nagin vegnir sfurzà fisicamain da laschar sa vaccinar.

Suenter l'inoltraziun da la dumonda per l'admissiun d'urgenza da la BioNTech/Pfizer ha dr. med. Wolfgang Wodarg (medi da pulmuns ed anteriur medi uffizial, anteriur deputà da la Cumissiun da sanadad dal parlament da la Republica Federala Tudestga) inoltrà il 1. da december 2020, avant bundant 1 emna, ensemen cun l'anteriur manader da perscrutaziun da Pfizer, dr. Michael Yeadon, ina petiziun a la European Medicine Agency (https://2020news.de/wp-content/uploads/2020/12/Wodarg_Yeadon_EMA_Petition_Pfizer_Trial_FINAL_01DEC2020_EN_unsigned_with_Exhibits.pdf).

Interessant è quai perquai ch'il Cussegl naziunal ha acceptà la fatschenta «admissiun simplifitgada da medicaments e da vaccins» en la sessiun da settember 2020 e perquai che l'Uffizi federal da sanadad publica (UFSP) vuless cumprar vaccinaziuns cun differentas tecnologias (mRNA, basà sin proteins, basà sin vecturs) (https://www.parlament.ch/de/ratsbetrieb/suche-curia-vista/geschaeft?AffairId=20203453). En quella èsi fixà che medicaments e vaccins ch'èn admess en in auter pajais, ils quals han in sistem d'admissiun equivalent, possian vegnir admess da Swissmedic en Svizra senza in'ulteriura examinaziun u cun in'examinaziun massivamain simplifitgada.

La petiziun è pia drizzada per uschè dir a la «Swissmedic» da l'Europa, da la quala la decisiun vegn ad esser decisiva er per nossa Swissmedic. Per proteger la vita e la sanadad da las probandas e dals probands vegni pretendì dals iniziants da la petiziun ch'ils studis davart il vaccin vegnian interruts immediatamain e cuntinuads pir, cur ch'in concept da studi è avant maun, il qual è adattà per tegnair quint da las resalvas da segirezza considerablas (substanzas dal vaccin e concepziun dal studi). Sin basa dals blers differents tests PCR da fitg differentas qualitads n'èn determinabels cun la tschertezza necessaria ni la ristga da daventar malsaun ni in eventual niz da la vaccinaziun. Gia pervia da quai èn tals tests da vaccins vi da l'uman sco tals betg etics. Ultra da quai vegni renvià a studis da pli baud cun ristgas enconuschentas che derivan per part da la natira dals coronavirus.

Las resalvas sa drizzan en quest connex oravant tut als suandants puncts:

  • La furmaziun d'uschenumnads «anticorpuls betg neutralisants» po chaschunar spezialmain, cur che probandas e probands vegnan en contact suenter la vaccinaziun cun il dretg, cun il virus «selvadi», ina reacziun dal sistem d'immunitad exagerada. Quest uschenumnà rinforzament dependent dals anticorpuls ADE (antibody-dependent enhancement) è p.ex. enconuschent gia ditg en experiments cun vaccins cunter corona tar giats. En il decurs da quests studis èn morts tut ils giats che han l'emprim cumportà bain la vaccinaziun, suenter ch'els èn vegnids infectads cun il dretg coronavirus. Cun rinforzaders da l'effect vegn questa surreacziun anc sustegnida.
  • Da las vaccinaziuns vegni spetgà ch'i vegnian producids anticorpuls cunter proteins spike da SARS-CoV-2. Proteins spike cuntegnan tranter auter er proteins omologs a sincitin ch'èn – tar mammals sco l'uman – ina premissa essenziala per il svilup da la placenta. En mintga cas stoi vegnir exclus ch'in vaccin cunter SARS-CoV-2 activeschia ina reacziun che renda immun cunter sincitin-1. Cas cuntrari pudessan dunnas vaccinadas patir d'ina nunfritgaivladad per in temp betg determinabel.
  • Ils vaccins mRNA da BioNTech/Pfizer cuntegnan poliethilenglikol (PEG). 70% dals umans sviluppan anticorpuls cunter questa substanza – quai vul dir che blers umans pon sviluppar reacziuns allergicas, eventualmain mortalas, sin il vaccin.
  • La durada bler memia curta dal studi na permetta betg da valitar realisticamain las consequenzas tardivas. Sco tar ils cas da narcolepsia suenter la vaccinaziun cunter la grippa da portgs pudessan las consequenzas tardivas vegnir observadas en cas d'ina admissiun urgenta pir, cur ch'igl è gia memia tard per milliuns d'umans vaccinads. Regenzas planiseschan d'exponer milliuns d'umans sauns a ristgas betg acceptablas e da sfurzar quels da sa laschar vaccinar prendend restricziuns discriminantas per persunas betg vaccinadas.

En vista ad in'eventuala ristga da segirezza dals vaccins vegnints è la dumonda a la Regenza la suandanta:

Co vegn il chantun a sa cumportar en il proxim futur envers persunas betg vaccinadas cunter COVID-19 en vista a la situaziun critica da la producziun da vaccins ed en vista ad in'eventuala admissiun dals vaccins che vegnan testads actualmain en la procedura da telescop e senza concept da studi segir, e co vegn el a sa cumportar damai ch'i n'èn avant maun nagins resultats da studis da lunga durada, schebain che novas tecnologias vegnan applitgadas e schebain ch'ils producents èn deliberads da la responsabladad:

  1. Poi vegnir exclus per persunas che vulan s'opponer a l'obligatori da sa vaccinar tenor l'art. 22 LEp ch'ellas perdian lur plazza da lavur u ch'ellas vegnian dischlocadas?
  2. Pudessi esser che persunas betg vaccinadas ston subir restricziuns en la vita da mintgadi (far cumissiuns, transport, cultura)?
  3. Tge criteris ston esser ademplids per declerar in privel sco considerabel tenor la LEp?

Tavau, ils 9 da december 2020

Fasani-Horath (Mesocco), Jenny, Weber

Resposta da la regenza

Tar la dumonda 1: Tenor l'art. 22 da la Lescha federala davart il cumbat cunter mal­sognas transmissiblas da l'uman (Lescha d'epidemias, LEp; CS 818.101) pon chan­tuns declerar vaccinaziuns sco obligatoricas tranter auter per persunas che pratitge­schan tschertas activitads, sch'igl exista in privel considerabel. Per quai valan d'ina vart pretensiuns fitg autas, da l'autra vart sto il circul da persunas pertutgadas vegnir definì precisamain e l'obligatori dastga vegnir decretà mo per in tschert temp (cf. art. 38 da l'Ordinaziun davart il cumbat cunter malsognas transmissiblas da l'uman [Ordinaziun d'epidemias, OEp; CS 818.101.1]). La Lescha d'epidemias na prevesa naginas sancziuns explicitas en cas d'ina cuntravenziun/omissiun. Tenor la scienza e la giurisdicziun vertenta dastgass gia il dretg da dar directivas sin basa dal contract da lavur furmar ina basa suffizienta per motivar – en ina situaziun da pandemia acuta – in'obligaziun da vaccinaziun per tschertas gruppas da lavurantas e lavurants (p.ex. medias e medis sco er tgirunzas e tgirunzs che han contact cun persunas spezial­main periclitadas). Er en tals cas sto vegnir fatga ina consideraziun conscienziusa dals interess ed in'examinaziun da la commensurabladad en il cas singul. In trans­feriment ad in'autra plazza u ina disditga d'ina lavuranta u d'in lavurant sin basa d'ina refusa da sa laschar vaccinar pudess vegnir considerà en questa situaziun sco admissibel dal punct da vista giuridic resp. sco betg abusiv (en il senn da l'art. 336 Dretg d'obligaziuns; CS 220). En quest connex sa tracti però da dumondas dal dretg da lavur, pia da dumondas dal dretg privat. Per tractar talas èn la finala cumpetentas las dretgiras civilas.

Tar la dumonda 2: I n'è betg d'excluder che persunas che n'èn betg vaccinadas, ston far quint cun restricziuns en l'avegnir. Sin restricziuns che vegnan decretadas dad auters stadis u da la Confederaziun, n'ha il chantun nagina u mo fitg pauca influenza. Sche restricziuns correspundentas ston er vegnir relaschadas da vart dal chantun, na po actualmain anc betg vegnir giuditgà. Restricziuns che vegnan relaschadas dal commerzi en detagl, d'interpresas da transport u d'organisaturs, suttastattan al dretg privat. Sche quellas èn adequatas u legalas, vegn a stuair vegnir sclerì en il rom d'in giudicament giudizial.

Tar la dumonda 3: La dumonda, sch'igl exista in "privel considerabel", ston las auto­ritads chantunalas giuditgar sa basond sin ils facturs numnads en l'art. 38 al. 1 OEp. Quai èn:

a.    grad da grevezza d'ina eventuala malsogna sco er ristga d'ina ulteriura derasaziun da la malsogna;

b.    periclitaziun da persunas spezialmain vulnerablas;

c.    situaziun epidemiologica sin plaun chantunal, naziunal ed internaziunal cun consultar l'Uffizi federal da sanadad publica;

d.    efficacitad che po vegnir spetgada d'in obligatori da vaccinaziun;

e.    qualificaziun ed efficacitad d'autras mesiras per limitar il privel per la sanadad.

Sch'i resulta dal giudicament da quests facturs ch'ina periclitaziun epidemiologica
da la sanadad publica è objectivamain avant maun en moda suffizienta (privel conside­rabel), pon ils chantuns declerar sco obligatoricas vaccinaziuns da gruppas da la populaziun periclitadas, da persunas spezialmain exponidas e da persunas
che pratitgeschan tschertas activitads. In obligatori da vaccinar sto vegnir limità areguard il temp, e la vaccinaziun na dastga betg vegnir fatga sin basa da sforz
fisic (art. 38 al. 3 OEp). Il giudicament sto vegnir fatg cun observar il princip da commensurabladad. Correspundentamain po in obligatori da vaccinar vegnir ordinà mo, sch'el è necessari (e sch'el ademplescha ultra da quai ils criteris da la qualifica­ziun e da la pretendibladad), q.v.d. sch'ina "finamira na po betg vegnir cuntanschida cun autras mesiras". Manegiads èn p.ex. mesiras d'igiena pli severas, il purtar mascrinas da protecziun e/u guants, ina infurmaziun constanta e transparenta da la publicitad (art. 9 LEp) per pussibilitar in agir en atgna responsabladad u vaccinaziuns facultativas. In obligatori da vaccinar è adina ina ultima ratio per far frunt ad in privel che smanatscha la sanadad e l'economia publica. Actualmain na vesa la Regenza nagin motiv che giustifitgass in tal obligatori.

3 da mars 2021