Navigation

Inhaltsbereich

Sessiun: 15.02.2021

La pandemia dal tschientaner chaschuna grondas sfidas er per il Grischun. Pervia da las mesiras da sanadad èn numerusas branschas en il lockdown, q.v.d. tschertas interpresas na pon betg pli pratitgar lur activitad economica (p.ex. gastronomia, parts dal commerzi en detagl). Autras branschas n'èn bain betg serradas uffizialmain, èn dentant fitg restrenschidas areguard lur activitads (p.ex. hotellaria, telefericas). Uschia prestan las branschas pertutgadas ina contribuziun per cumbatter la pandemia da COVID-19.

La contribuziun da las interpresas per il cumbat cunter la pandemia chaschuna gronds custs economics. Il chantun Grischun ha tut ils interess d'impedir uschè bain sco pussaivel concurs e da proteger las plazzas da lavur. Las interpresas pertutgadas dal lockdown u da restricziuns ston perquai vegnir indemnisadas finanzialmain per lur contribuziun a favur dal cumbat cunter la pandemia.

La «Ordinaziun executiva chantunala davart mesiras per interpresas en cas da direzza en connex cun l'epidemia da COVID-19 (COVID-19-OECDir)», concludida da la Regenza, è ina buna basa operativa per indemnisar las interpresas. L'autezza da l'indemnisaziun previsa (50% da la part da custs fixs da la perdita da la svieuta) è percunter cleramain memia bassa. A medem temp èn ils obstachels memia auts per interpresas che n'èn betg directamain vegnidas serradas uffizialmain (perdita da la svieuta d'almain 40%).

En vista a quests fatgs supplitgescha il Cussegl grond la Regenza grischuna:

  1. d'auzar las indemnisaziuns finanzialas («mesiras per cas da direzza») en quel senn che fin 100% da la part da custs fixs da la perdita da la svieuta vegnan indemnisads e ch'il chantun metta a disposiziun ils meds finanzials necessaris. L'in­dem­ni­saziun vegn augmentada immediatamain.
  2. da sbassar l'obstachel tar il dretg d'ina indemnisaziun («mesiras per cas da direzza») per interpresas che n'èn betg vegnidas serradas uffizialmain. Tgi che subescha ina perdita da la svieuta da 30%, ha il dretg d'ina indemnisaziun.
  3. per intginas interpresas (p.ex. hotels, telefericas, gruppas gastronomicas e.u.v.) n'è la limita da l'indemnisaziun maximala da 750 000 francs tenor il dretg federal (art. 8 al. 2 da l'Ordinaziun COVID-19 cas da direzza) betg suffizienta. Per che las interpresas survegnian tuttina svelt la liquiditad necessaria, reintroducescha il chantun – en collavuraziun cun la Banca chantunala grischuna – il program chantunal da credit COVID-19-GR e surpiglia la rolla d'in garant solidaric.

Tavau, ils 15 da favrer 2021

Horrer, Caluori, Rüegg, Atanes, Baselgia-Brunner, Berweger, Bettinaglio, Bigliel, Brandenburger, Brunold, Cahenzli-Philipp, Casty, Caviezel (Cuira), Censi, Clalüna, Degiacomi, Della Cà, Dürler, Ellemunter, Engler, Epp, Favre Accola, Felix, Flütsch, Gartmann-Albin, Gort, Grass, Gugelmann, Hartmann-Conrad, Hefti, Hofmann, Hohl, Holzinger-Loretz, Kasper, Kienz, Koch, Kunz (Fläsch), Loi, Mittner, Müller (Favugn), Müller (Susch), Natter, Noi-Togni, Papa, Paterlini, Perl, Pfäffli, Preisig, Rettich, Rutishauser, Salis, Sax, Schneider, Schwärzel, Stiffler, Thomann-Frank, Thür-Suter, von Ballmoos, Weber, Weidmann, Wellig, Widmer (Favugn), Widmer-Spreiter (Cuira), Wilhelm, Zanetti (Landquart), Fontana, Pajic, Renkel, Spadarotto, Tomaschett (Cuira)