Navigation

Inhaltsbereich

Incumbensa da la fracziun da la PCD concernent ils scenaris da la politica da finanzas per la cassa chantunala

Sessiun: 18.02.2021

Anc adina essan nus en la fasa acuta da la pandemia dal coronavirus. Cun mesiras immediatas en il sectur da la sanadad e da l'economia vulain nus limitar ils donns. Per questas mesiras dovri meds finanzials publics considerabels. Pervia d'ina politica da finanzas moderada durant ils ultims onns en cumbinaziun cun in svilup economic positiv han tant la Confederaziun sco er il chantun Grischun ina basa finanziala solida per finanziar questas mesiras e per porscher in agid immediat a quellas e quels ch'èn en miseria.

A medem temp na dastgan en mintga cas er betg vegnir emblidads auters secturs e la vista sto s'orientar en emprima lingia vers l'avegnir. La pandemia dal coronavirus ha ina dinamica e consequenzas fitg eterogenas e cumplexas, gist en ina societad ed en in'economia publica uschè fermamain entretschada sco la nossa. Questa cumplexitad vegn er ad avair effects per las finanzas chantunalas, dals quals nus savain dentant anc pauc per il mument. En vista als daners ch'èn la finala tuttina limitads, a las sfidas ch'èn anc adina avant maun, a la responsabladad envers la proxima generaziun ed en relaziun cun las incumbensas en auters secturs politics èsi impurtant d'eruir tant pli svelt la libertad d'agir actuala, dentant cunzunt er futura da la politica da finanzas. Pervia da las probabilitads intschertas e pervia dal grond spectrum da svilups pussaivels vegni ad esser indispensabel da pensar en scenaris. Mo uschia poi vegnir impedì ch'i restia insacura mo pli l'opziun d'in dir program da spargn – eventualmain er – sco mesira acuta cun effects eterogens e cumplexs.

Las sutsegnadras ed ils sutsegnaders incumbenseschan perquai la Regenza da prender posiziun detagliadamain en in rapport separà u il pli tard en il rom da la missiva tar il preventiv 2022 en spezial davart las suandantas dumondas:

  1. Tge consequenzas finanzialas spetga la Regenza a curta vista da l'epidemia da COVID-19 per la cassa chantunala en quai che concerna ils effects epidemiologics, ils effects socials, ils effects per l'economia publica ed ils effects per l'economia regiunala?
  2. Tge consequenzas finanzialas spetga la Regenza a pli lunga vista en quest connex per la cassa chantunala?
  3. En tge scenaris pensa il chantun per impedir eventualas situaziuns problematicas per las finanzas publicas?

Tavau, ils 18 da favrer 2021

Maissen, Crameri, Schneider, Berther, Bondolfi, Brunold, Caluori, Cantieni, Casutt-Derungs, Deplazes (Rabius), Derungs, Epp, Florin-Caluori, Föhn, Kohler, Kunfermann, Loepfe, Ruckstuhl, Sax, Schmid, Tomaschett (Breil), Ulber, Zanetti (Landquart), Bürgi-Büchel, Collenberg, Decurtins-Jermann, Heini

Resposta da la regenza

Dapi il cumenzament da la pandemia da COVID-19 il mars 2020 ha il chantun Gri­schun prendì – per cumplettar las mesiras federalas voluminusas – cuntinuadamain mesiras sistematicas per mitigiar las consequenzas per l'economia e per la societad dal Grischun. En quest connex èn vegnids mess a disposiziun l'onn 2020 – ultra d'in credit general dad 80 milliuns francs per garanzias solidaricas – meds finanzials sup­plementars da netto passa 100 milliuns francs per sustegnair ils secturs sanadad, economia, traffic public, cultura e sport.

En il preventiv 2020 n'eran cuntegnids nagins meds finanzials per dumagnar la pan­demia da COVID-19. Els èn vegnids mess a disposiziun essenzialmain cun agid da credits posteriurs. Tschertas grevezzas supplementaras han ins pudì cumpensar. Ils credits mess a disposiziun èn vegnids duvrads per part mo en ina pitschna dimen­siun. Singulas dumondas per credits pli gronds eran colliadas en quest connex cun grondas intschertezzas. En il quint annual 2020 importan las grevezzas supplemen­taras directas e quantifitgablas netto 60,3 milliuns francs. Grazia a retgavs supple­mentars considerabels e grazia a clers sutpassaments da credits en intgins secturs da custs ha il quint annual 2020 tuttina serrà enconuschentamain cun in resultat fitg positiv.

En il preventiv 2021 n'èn – abstrahà dal credit d'impegn da 2,6 milliuns francs per manar la partiziun da COVID-19 en l'Uffizi da sanadad – medemamain cuntegnids nagins meds finanzials per dumagnar la pandemia. Las dumondas per credits poste­riurs vegnan examinadas e fatgas tut tenor la situaziun e cuntinuadamain tenor ils criteris da la necessitad e da l'urgenza. Er per l'onn 2021 gidan en emprima lingia retgavs supplementars considerabels da la Banca naziunala svizra cun ina distribu­ziun dal gudogn sextupla a finanziar las grevezzas supplementaras che resultan da la pandemia da COVID-19. Co che la situaziun sa preschenta il mument da la clusiun dal quint a la fin da l'onn 2021 dependa dentant fermamain da l'ulteriur svilup da la pandemia. Pervia da quai na pon ins betg far ina stimaziun fidada davart il resultat dal quint 2021. Sche las mesiras da protecziun avessan da durar pli ditg che spetgà, pudessan ellas engrevgiar supplementarmain en moda considerabla las finanzas chantunalas, e quai tant da la vart dals custs sco er da la vart dals retgavs. Actualmain è er anc averta la dumonda davart las mesiras necessarias ed adattadas a vista mesauna per accelerar il svilup economic en il chantun per il temp suenter la superaziun da la pandemia da COVID-19.

Per ils onns a partir da 2022 daventa il rom finanzial enconuschentamain pli e pli stretg. Resguardond il punct central da svilup «1.3 Garantir finanzas publicas soli­das» datti cunfins stretgs per surpigliar novas incumbensas che n'èn betg conside­radas en il plan da finanzas e che han consequenzas finanzialas e persunalas. La finamira è quella da tegnair en equiliber las finanzas chantunalas, e quai senza in pachet da distgargia rigurus. Il proceder per quest intent ha la Regenza fixà en il concept per garantir a lunga vista l'equiliber da las finanzas.

Ils scenaris da la Regenza cumpiglian eventualas vias da svilup a curta ed a lunga vista en las posiziuns da custs e da retgav da las finanzas chantunalas. Els resguar­dan d'ina vart las cundiziuns generalas intschertas e da l'autra vart mesiras pussai­vlas da tegnair en equiliber las finanzas publicas. La Regenza è gugent pronta d'als preschentar al Cussegl grond. Il focus a curta vista duai vegnir mess – sco giavischà en l'incumbensa da la fracziun – primarmain sin las consequenzas dals effects ch'èn relevants per las finanzas or da la pandemia da COVID-19 per la cassa chantunala. A vista mesauna ed a vista pli lunga stoi vegnir resguardà che las intschertezzas davart il svilup futur da las entradas e da las expensas vegnan ad esser grondas er suenter che la pandemia è dumagnada. I vegn a dar adina puspè novas sfidas. Ils scenaris giavischads da la politica da finanzas duain vegnir suttamess al Cussegl grond en la sessiun da december 2021.

Sa basond sin questas explicaziuns propona la Regenza al Cussegl grond d'acceptar questa incumbensa.

3 da matg 2021