Navigation

Inhaltsbereich

Dumonda Caviezel (Cuira) concernent l'auta quota da vaccinaziun respectivamain l'ambiziun da daventar «champiun svizzer da vaccinaziun»

Sessiun: 16.06.2021

Igl è incontestà che la pandemia po vegnir dumagnada a lunga vista mo, sch'ina gronda part da la populaziun è vaccinada. Actualmain curra la campagna da vaccinaziun grischuna cun tutta forza. Gia var 40% da las Grischunas e dals Grischuns han survegnì almain l'emprima dosa dal vaccin (stadi da mez zercladur 2021). Actualmain è la dumonda anc adina pli gronda che la purschida. Ma i dat indizis en Svizra che las annunzias chalan plaunsieu, il pli tard suenter las vacanzas da stad vegnan a star a disposiziun dapli dosas dal vaccin che persunas che vulan sa laschar vaccinar.

En vista a las variantas fitg contagiusas ed immunevasivas (en spezial B.1.617.2 – delta) exista la ristga ch'erupziuns pli grondas sa mussian puspè il tard atun/l'enviern. Cun in sguard sin la sanadad da la populaziun e sin l'economia stoi vegnir fatg tut, per ch'ils dumbers da cas na s'augmentian mai pli fermamain. Experientschas d'auters pajais e calculaziuns da model mussan  che quai po vegnir cuntanschì mo cun ina quota da vaccinaziun fitg auta (>80%) da las persunas che pon vegnir vaccinadas (>12 onns).

Fitg legraivel èsi ch'il Grischun po cumprovar – cun ina quota da vaccinaziun da circa 85% da las persunas da la classa da vegliadetgna 70+ – ina da las quotas las pli autas da la Svizra. La prontezza da sa laschar vaccinar è però cleramain pli bassa tar la populaziun pli giuvna. Mo sch'igl ans gartegia d'immunisar er quella en moda cumplessiva, pudain nus tegnair ils dumbers da cas circa sin nulla. En il focus ston vegnir prendidas en quest connex en spezial quellas persunas ch'èn anc indecisas u malsegiras. En auters pajais èn vegnidas e vegnan empruvadas differentas soluziuns creativas per cuntanscher questas persunas.

Ord vista da las explicaziuns menziunadas tschentan las sutsegnadras ed ils sutsegnaders las suandantas dumondas:

  1. En tge gruppas da vegliadetgna ed en tge regiuns è la quota da persunas vaccinadas anc sut la media?
  2. Tge planisescha la Regenza – ultra da las mesiras da la Confederaziun – per auzar la quota da persunas vaccinadas l'atun sin in livel fitg aut (analogamain a la classa da vegliadetgna 70+) tar tut las gruppas da la populaziun?
  3. La Regenza grischuna e l'administraziun han demussà spiert da piunier cun lantschar ad ura ils tests da massa ed èn – sco «champiun svizzer da tests» – daventadas il model per auters chantuns en la pandemia dal coronavirus. L'effect da quest proceder innovativ ha pudì vegnir confermà pliras giadas scientificamain. È la Regenza puspè pronta d'augmentar a lunga vista la quota da persunas vaccinadas cun agid da metodas creativas che sa basan sin la scienza e da daventar «champiun svizzer da vaccinaziun»?

Tavau, ils 16 da zercladur 2021

Caviezel (Cuira), Hohl, Buchli-Mannhart, Atanes, Baselgia-Brunner, Berweger, Brunold, Cantieni, Casutt-Derungs, Degiacomi, Deplazes (Rabius), Dürler, Epp, Gartmann-Albin, Geisseler, Hardegger, Hartmann-Conrad, Hofmann, Horrer, Kohler, Loepfe, Michael (Donat), Müller (Felsberg), Noi-Togni, Papa, Perl, Preisig, Rettich, Ruckstuhl, Rutishauser, Salis, Schwärzel, Ulber, von Ballmoos, Widmer (Favugn), Widmer-Spreiter (Cuira), Wilhelm, Bürgi-Büchel, Spadarotto, Stieger, Tomaschett (Cuira)

Resposta da la regenza

Tar la dumonda 1: En la gruppa da vegliadetgna 12 fin 19 onns èn vaccinads cum­plettamain 18 % da las persunas, en la gruppa da vegliadetgna 20 fin 29 onns 43 % en la gruppa da vegliadetgna 30 fin 39 onns 50 %. Tranter 60 e 79 % da las persu­nas èn vaccinadas cumplettamain en las classas da vegliadetgna da 40 fin 69 onns. Tar las persunas sur 70 onns èn bundant 90 % vaccinadas cumplettamain. En quai che concerna las regiuns stoi vegnir constatà che la populaziun en las regiuns ruralas è anc vaccinada sut la media.

Tar la dumonda 2: La campagna da vaccinaziun è vegnida e vegn adattada perma­nentamain a las pretensiuns actualas da las recumandaziuns da vaccinar da la Confederaziun. La finamira è quella, da pussibilitar in access uschè simpel sco pussaivel a la vaccinaziun. Grazia a las experientschas positivas cun las purschidas walk-in duain talas vegnir offridas en tut las regiuns dal chantun. Dapi ils 23 d'avust 2021 circulescha – en las regiuns – il bus da vaccinaziun ch'è vegnì lantschà en collavuraziun cun AutoDaPosta Grischun. En il bus da vaccinaziun vegnan pur­schidas gratuitamain e senza preannunzia cussegliaziuns da vaccinaziun e vacci­naziuns cunter il coronavirus. Quai en spezial en quellas regiuns che n'èn betg en vischinanza directa d'in center da vaccinaziun. Grazia ad in team da vaccinaziun mobil vegn purschida a manaschis ed a scolas ultra da quai la pussaivladad da sa laschar vaccinar al lieu, premess ch'in dumber suffizient da persunas che vulan sa laschar vaccinar è avant maun. La finala duain er las persunas che appartegnan a gruppas marginalas vegnir cuntanschidas pli bain per las porscher la vaccinaziun.

Tar la dumonda 3: Schebain che la situaziun na po betg vegnir cumparegliada cun ils tests dal coronavirus (cundiziuns e coordinaziun da la Confederaziun per ir enturn cun il vaccin), persequitescha la Regenza la finamira da cuntanscher – cun mesiras creativas – las persunas ch'èn anc indecisas e da las motivar da sa laschar vaccinar. Sco explitgà tar la dumonda 2 è gia vegnì prendì in grond dumber da differentas mesiras per augmentar la quota da las persunas vaccinadas. Metodas basadas scientificamain per evaluar talas metodas n'existan dentant betg. Anzi, questas mesiras sa basan sin las experientschas da las emnas passadas e sin ils basegns annunziads da manaschis e da scolas. 

2 da settember 2021