Navigation

Inhaltsbereich

Dumonda Horrer concernent contracts da garanzia en connex cun la sentenzia dal Tribunal federal 2C_523/2020 dals 4 da november 2020

Sessiun: 16.06.2021

Ils ultims onns ha la dispita fiscala da l'investider Remo Stoffel, che abita en il fratemp a Dubai, cun il chantun Grischun procurà adina puspè per lingias grossas (guardar tranter auter en: «Wirtschaftskriminalität: Bedingte Freiheitsstrafe für den Unternehmer Remo Stoffel», NZZ dals 28-07-2020, online: https://www.nzz.ch/zuerich/zuerich-bedingte-freiheitsstrafe-fuer-unternehmer-remo-stoffel-ld.1568605?reduced=true). Il Tribunal federal è s'occupà da la fatschenta en pliras sentenzias. En la sentenzia 2C_523/2020 dals 4 da november 2020 ha il Tribunal federal tractà tranter auter la dumonda da la disposiziun da sequestraziun che l'Administraziun da taglia dal Grischun ha relaschà, perquai che l'investider numnà è partì per abitar a Dubai. La summa da sequestrar era 50 milliuns francs. Ina procedura penala da l'Administraziun federala da taglia pervia dal suspect da l'omissiun fiscala è stada la basa per la disposiziun da sequestraziun menziunada. En la sentenzia vegni scrit en chaussa:

«En quest connex han il pajataglia, l'Administraziun federala da taglia, l'Administraziun da taglia dal chantun Grischun, l'Administraziun da taglia da la vischnanca dad U.__/GR e l'Uffizi da taglia dal chantun Turitg sco credituras sco er l'advocat dr. B.__ sco depositur fatg ils 27 / 28 da mars 2013 in contract davart il deposit d'ina garanzia (en quai che suonda: contract da deposit).»

En il passà han la bonitad respectivamain la valur exacta da las activas da Remo Stoffel adina puspè chaschunà discussiuns publicas. Ultra da quai resorta d'in rapport da la Handelszeitung («Stoffel, die Steuerbehörden und ganz viele Akten», Handelszeitung dals 10-11-2016, online: https://www.handelszeitung.ch/unternehmen/stoffel-die-steuerbehoerden-und-ganz-viele-akten-1261033), ch'il «depositur» da las activas depositadas tenor la disposiziun da sequestraziun saja l'advocat dr. iur. e cusseglier dals chantuns Martin Schmid. Sin fundament da divers rapports en las medias (guardar tranter auter: «Ständerat Martin Schmid muss bei einer möglichen Bundesratskandidatur Vergangenes bereden», NZZaS dals 29-09-2018, online: https://nzzas.nzz.ch/schweiz/staenderat-martin-schmid-muss-bei-einer-moeglichen-bundesratskandidatur-vergangenes-bereden-ld.1424349?reduced=true) èsi enconuschent publicamain ch'il cusseglier dals chantuns Martin Schmid e l'investider Remo Stoffel enconuschan in l'auter persunalmain e ch'els han colliaziuns economicas. Sut quest aspect supplitgeschan las sutsegnadras ed ils sutsegnaders la Regenza da respunder las suandantas dumondas:

  1. Quant autas èn las pretensiuns avertas totalas dal chantun envers l'investider Remo Stoffel? E nua èn questas pretensiuns bilantschadas en il quint annual?
  2. Il chantun ha confiscà respectivamain sequestrà differentas activas dal construct da firmas da signur Stoffel (tranter auter Priora SA). Quant aut valitescha il chantun las activas confiscadas?
  3. Tge garanzias ha il chantun Grischun, sch'igl avess da sa mussar che las activas han ina valur bler pli pitschna che supponì?
  4. Tge rolla ha il cusseglier dals chantuns ed anteriur cusseglier guvernativ Martin Schmid en connex cun ils contracts da garanzia e cun la valitaziun da las activas confiscadas da Remo Stoffel?
  5. Ils cussegliers dals chantuns represchentan tenor la Constituziun federala ils interess dal chantun. Co ha il chantun Grischun garantì ch'il cusseglier dals chantuns Martin Schmid represchentia effectivamain ils interess dal chantun en quest cas – en vista a sia enconuschientscha persunala cun signur Remo Stoffel – e ch'el adempleschia sia incumbensa constituziunala sco cusseglier dals chantuns?

Tavau, ils 16 da zercladur 2021

Horrer, Müller (Favugn), Perl, Atanes, Baselgia-Brunner, Cantieni, Caviezel (Cuira), Gartmann-Albin, Preisig, Rettich, Rutishauser, von Ballmoos, Wilhelm, Spadarotto, Stieger, Tomaschett (Cuira)

Resposta da la regenza

En il chantun Grischun vala in secret fiscal sever (art. 122 da la Lescha da taglia per il chantun Grischun [Lescha da taglia, LT; DG 720.000]). Ultra da quai na vegn la Lescha davart il princip da transparenza (Lescha da transparenza, LCTrans; DG 171.000) – tenor la regulaziun expressiva da l'art. 122 al. 4 LT – betg applitgada en chaussas fiscalas. Dumondas davart pajataglias concrets na pon perquai betg vegnir respundidas.

Tar la dumonda 1: Pervia dal secret fiscal na poi betg vegnir prendì posiziun davart l'autezza da pretensiuns da taglia avertas. Questas pretensiuns (taglia sin las entra­das e sin la facultad) èn vegnidas bilantschadas en il quint annual 2020. Ultra da quai è vegnì furmà in delcredere (post collectiv), perquai ch'il mument dal pajament è avert.

Tar la dumonda 2: Differentas aczias èn vegnidas sequestradas. Pervia dal secret fiscal na poi betg vegnir communitgà, quant aut ch'il chantun valitescha questas aczias.

Tar la dumonda 3: Il chantun ha fatg diever da tut ils instruments ch'el ha per sur­vegnir ils daners da taglia debitads, ed el vegn a far quai er en l'avegnir.

Tar la dumonda 4: L'Administraziun federala da taglia, l'Administraziun da taglia dal chantun Grischun, l'Administraziun da taglia da la citad da Cuira e l'Uffizi da taglia dal chantun Turitg sco crediturs sco er Remo Stoffel sco pajataglia/depositur han incum­bensà il cusseglier dals chantuns Martin Schmid sco conservader da las aczias da trais societads che vegnan dominadas da Remo Stoffel. Plinavant han las partidas fixà ch'il contract constitueschia in dretg da pegn dals crediturs envers las aczias de­positadas. Sco cumplettaziun han duas da questas societads sco deposituras e l'Administraziun federala da taglia, l'Uffizi da taglia dal chantun Turitg e l'Admini­straziun da taglia dal Grischun sco crediturs sco er il cusseglier dals chantuns Schmid sco agent da sequestraziun fatg in contract da sequestraziun. Tuttina sco en il contract davart il deposit d'ina garanzia sa tracti en quest connex mo d'in deposit da las aczias da questas duas societads tar il cusseglier dals chantuns Schmid sco conservader.

La valitaziun da las aczias depositadas vegn fatga da l'Administraziun da taglia dal Grischun senza intervenziuns dal cusseglier dals chantuns Schmid.

Envers l'Administraziun da taglia dal Grischun e davant differentas instanzas da meds legals n'è betg sa preschentà il cusseglier dals chantuns Schmid, mabain èn cumparids tschintg represchentants fiscals extrachantunals da Remo Stoffel.

Tar la dumonda 5: Tenor il contract davart il deposit d'ina garanzia menziunà qua survart è il cusseglier dals chantuns Schmid conservader da las aczias da trais societads anonimas che vegnan dominadas da Remo Stoffel (cf. resposta a la dumonda 4). En questa funcziun na daventa el betg activ cunter il chantun Grischun. Anzi, el guarda da conservar las aczias per garantir las pretensiuns da taglia en l'interess da l'Administraziun federala da taglia sco er da las Administraziuns da taglia dals chantuns Turitg e Grischun sco er da la citad da Cuira.

1. da settember 2021