Navigation

Inhaltsbereich

Dumonda Stieger concernent il congedi da paternitad tar il chantun

Sessiun: 16.06.2021

Per il 1. da schaner da quest onn è finalmain vegnì introducì er en Svizra in congedi da paternitad da 2 emnas. En la cumparegliaziun internaziunala è quel anc adina fitg modest. Differents manaschis van per part lunsch sur quest minimum or (p.ex. Allianz-Suisse: 8 emnas).

Sche quest element pitschen, ma impurtant per l'attractivitad sco patrun vegn realisà en moda exemplarica, profitan tut las persunas participadas.

Duvrar dovri pussaivladads unitaras, transparentas e flexiblas per retrair il congedi da paternitad, ch'èn accordadas cun ils basegns da las persunas pertutgadas.

Er sto la lavur vegnir fatga durant ch'il congedi da paternitad vegn retratg, per ch'i na resultian betg dischavantatgs per la clientella e per ils umens sezs che retiran il congedi da paternitad. Tenor basegn dovra quai soluziuns regladas per substituziuns.

Perquai vuless jau gugent tschentar al chantun las suandantas dumondas en chaussa:

  1. Quantas emnas congedi da paternitad porscha il chantun a ses emploiads? Po il congedi da paternitad vegnir repartì en moda flexibla entaifer ils 6 mais suenter la naschientscha e datti reglas en chaussa? Datti ina regulaziun unitara che vala per tut ils uffizis respectivamain tgi è cumpetent en chaussa?
  2. Exista ina regulaziun da substituziun, sco ch'ella vegn applitgada tar il congedi da maternitad? Co vegn organisada la substituziun durant la retratga dal congedi da paternitad, per che la lavur vegnia tuttina fatga e per che la retratga dal congedi da paternitad na chaschunia betg pli tard ina chargia supplementara per ils umens pertutgads?
  3. Co sa preschentan fin ussa las cifras en la pratica? Quants babs han retratg il congedi da paternitad en il fratemp (en cifras absolutas e procentualas da tut ils novs babs)? Èn vegnids retratgs mintgamai tut ils dis e co èn quels vegnids repartids? Èn enconuschents motivs per ils quals ils dis n'èn eventualmain betg vegnids retratgs?
  4. Datti actualmain ina retschertga davart la dumonda da la cuntentientscha dals umens pertutgads? Quinta il chantun da documentar quai en l'avegnir ed a lunga vista?

Tavau, ils 16 da zercladur 2021

Stieger, Schwärzel, Hofmann, Atanes, Baselgia-Brunner, Cantieni, Caviezel (Cuira), Degiacomi, Felix, Gartmann-Albin, Geisseler, Horrer, Müller (Favugn), Noi-Togni, Perl, Preisig, Rettich, Rutishauser, Wilhelm, Spadarotto, Tomaschett (Cuira)

Resposta da la regenza

Tar la dumonda 1: Tenor l'art. 56 al. 1 lit. c da l'Ordinaziun dal persunal (OP; DG 170.410) importa il congedi da paternitad 10 dis e po vegnir retratg entaifer 6 mais suenter la naschientscha. Il collavuratur ed il post da servetsch fixeschan sche pussaivel consensualmain, cura e co (en in bloc u repartì sin singulas emnas u sin singuls dis) ch'il congedi da paternitad vegn retratg. Sche necessari decida il post da servetsch. El sto dentant prender resguard adequatamain sin ils giavischs dal collavuratur, sche quai è cumpatibel cun ils basegns dal manaschi (cf. conclus da la Regenza dals 25 da november 2020 [prot. nr. 949/2020]). Questa regulaziun da l'Ordinaziun dal persunal è lianta per tut l'administraziun chantunala.

Tar la dumonda 2: En la Lescha davart la relaziun da lavur da las collavuraturas e dals collavuraturs dal chantun Grischun (Lescha dal persunal, LP; DG 170.400) sco er en l'Ordinaziun dal persunal na datti nagina regulaziun explicita davart la substi­tuziun. Ella è en la cumpetenza dals posts da servetsch. Quels decidan davart ina substituziun tut tenor ils basegns dal manaschi.

Tar la dumonda 3: Dapi che la revisiun parziala da l'Ordinaziun dal persunal è entra­da en vigur il 1. da schaner 2021 han diesch collavuraturs da l'administraziun chantu­nala retratg in congedi da paternitad fin ils 5 da fanadur 2021. La Regenza parta dal fatg ch'ils congedis da paternitad vegnian retratgs senza restricziuns. L'onn 2021 han tschintg dals diesch babs retratg lur congedi da paternitad repartì sin singuls dis, trais sin singulas emnas e dus han retratg el en in bloc.

Tar la dumonda 4: Actualmain na datti betg ina retschertga centrala davart la dumon­da da la cuntentientscha dals umens pertutgads? Ina tala retschertga n'è betg previ­sa per il mument. Las reacziuns en ils posts da servetsch èn dentant positivas.

13 d'avust 2021