L'incumbensa Bondolfi pretenda che la diversitad linguistica da noss chantun stoppia vegnir resguardada obligatoricamain en la cumposiziun da las instituziuns e da las organisaziuns che adempleschan incumbensas publicas e ch'èn dumandadas da s'occupar da noss territori cun tut sias fassettas. Eventualmain stoppia er vegnir stgaffida la basa giuridica ch'è necessaria per quai. La Regenza è da l'avis che quest giavisch giustifitgà stoppia da princip vegnir ademplì.

Tenor l'art. 1 al. 2 da la Lescha da linguas dal chantun Grischun (LLing; DG 492.100) tegnan il chantun, las regiuns, las vischnancas, las corporaziuns da vischnancas sco er autras corporaziuns da dretg public quint – cun ademplir lur incumbensas – da la cumposiziun linguistica usitada dals territoris e prendan resguard da la communitad linguistica tradiziunala. Da questa disposiziun sa lascha deducir en general, ch'il prin­cip da la trilinguitad sco element caracteristic da noss chantun vala confurm al senn er per las gruppas prendidas en mira da l'intervenziun. En la pratica èsi dentant savens difficil da chattar in dumber suffizient e represchentativ (citad / champagna, vegliadetgna, partida politica, schlattaina, lingua e.u.v.) da commembras e com­mem­bers per occupar las instituziuns e las organisaziuns che adempleschan incumben­sas publicas. En quai che concerna l'Uniun GRdigital che vegn menziunada da las sutsegnadras e dals sutsegnaders, ha la Regenza explitgà gia durant l'ura da du­mondas da la sessiun da zercladur 2021 che la suprastanza vegnia elegida da la radunanza da las commembras e dals commembers. Ellas ed els, tranter auter er represchentanzas da las regiuns talianas, hajan pudì inoltrar propostas electoralas, quai che na saja dentant betg capità entaifer il termin previs. Adina è la finamira stada quella d'avair er represchentanzas dal Grischun talian en la suprastanza. Perquai che las candidatas ed ils candidats mancavan, n'han ins betg cuntanschì questa finamira.

Ils 2 da favrer 2021 (prot. nr. 85/2021) ha la Regenza concludì da domiciliar il Post spezialisà per la plurilinguitad – tenor il punct central da svilup 5.1 (Trair a niz e pro­mover la diversitad linguistica chantunala sco schanza) dal program da la Regenza 2021–2024 – sco post da stab tar il Departament d'educaziun, cultura e protecziun da l'ambient (DECA). En il fratemp è vegnida publitgada questa plazza (delegada u delegà dal Post spezialisà per la plurilinguitad) e proximamain èsi previs d'occupar tala. La persuna elegida duai sustegnair e sensibilisar en spezial ils departaments e lur posts da servetsch per realisar las prescripziuns dal dretg da linguas. Per tegnair quint dal giavisch giustifitgà da l'incumbensa, è la Regenza pronta da cumplettar l'Ordinaziun da linguas dal chantun Grischun (OLing; DG 492.110) cun ina dispo­siziun che prenda en mira che las trais regiuns linguisticas sajan represchentadas en moda adequata en ils gremis che adempleschan incumbensas publicas dal chantun.

Sa basond sin questas explicaziuns propona la Regenza al Cussegl grond da midar questa incumbensa sco suonda: L'Ordinaziun da linguas dal chantun Grischun sto vegnir cumplettada cun ina disposiziun che prenda en mira che las trais regiuns linguisticas sajan represchentadas en moda adequata en ils gremis che ademple­schan incumbensas publicas dal chantun.

27 d'october 2021