Navigation

Inhaltsbereich

Incumbensa Degiacomi concernent contribuziuns unitaras per las scolas bilinguas

Sessiun: 27.08.2021

Cun raschun è il chantun Grischun superbi da sia diversitad linguistica. Las scolas bilinguas a Malögia, Samedan, Glion, Domat, Cuira ed en differentas autras vischnancas èn in ferm signal per l'engaschament da blers purtaders da scola en il senn da la promoziun da questa diversitad linguistica.

Tenor l'art. 16 da l'Ordinaziun da linguas dal chantun Grischun (DG 492.110) paja il chantun contribuziuns pauschalas per scolara u scolar als custs per installar (max. 500 francs) e per manar (max. 400 francs) classas u scolas bilinguas.

En vardad èn questas contribuziuns limitadas en il preventiv ad in import maximal da 330 000 francs. Quai vul dir: pli blers uffants che nizzegian las purschidas, e pli fitg che las contribuziuns per scolara u scolar sa reduceschan. Las contribuziuns importan perquai facticamain mo var 250 francs, pia cleramain damain ch'ils 400 francs per scolara u scolar.

Per la promoziun da linguas è quai in signal dubitaivel, sch'i vegnan concedidas contribuziuns chantunalas da promoziun che sa reduceschan, pli fitg ch'ellas vegnan nizzegiadas. Per ils purtaders da scola èsi difficil d'installar e da manar classas bilinguas, sche la cofinanziaziun dal chantun n'è betg clera.

Pervia da quai vegn la Regenza incumbensada d'adattar las basas legalas e la budgetaziun uschia, ch'ils purtaders da scola pon quintar cun contribuziuns cleramain definidas per scolara u scolar per installar (500 francs) e per manar (400 francs) scolas u classas bilinguas.

Cuira, ils 27 d'avust 2021

Degiacomi, Maissen, Michael (Castasegna), Alig, Atanes, Baselgia-Brunner, Bondolfi, Brunold, Cahenzli-Philipp, Caluori, Cantieni, Casutt-Derungs, Caviezel (Cuira), Censi, Clalüna, Crameri, Della Cà, Della Vedova, Deplazes (Rabius), Ellemunter, Epp, Fasani, Felix, Florin-Caluori, Gartmann-Albin, Giacomelli, Gugelmann, Hardegger, Hartmann-Conrad, Hofmann, Holzinger-Loretz, Horrer, Jochum, Kappeler, Kasper, Kienz, Kohler, Lamprecht, Loepfe, Märchy-Caduff, Marti, Müller (Favugn), Noi-Togni, Papa, Perl, Pfäffli, Preisig, Ruckstuhl, Rutishauser, Salis, Schneider, Schwärzel, Thomann-Frank, Tomaschett-Berther (Trun), Ulber, Widmer (Favugn), Widmer-Spreiter (Cuira), Wieland, Wilhelm, Zanetti (Landquart), Bürgi-Büchel, Costa, Spadarotto, Tomaschett (Cuira)

Resposta da la regenza

Per promover las linguas chantunalas rumantsch e talian po la Regenza permetter – tenor l'art. 33 da la Lescha davart las scolas popularas dal chantun Grischun (Lescha da scola; DG 421.000) – che duas linguas chantunalas vegnian duvradas il medem mument sco linguas da scola. Tenor l'art. 28 da l'Ordinaziun tar la Lescha da scola (Ordinaziun da scola; DG 421.010) permetta la Regenza las scolas e las classas bilinguas sin basa d'ina dumonda e sin basa d'in concept.

Tenor l'art. 16 da l'Ordinaziun da linguas dal chantun Grischun (OLing; DG 492.110) paja il chantun contribuziuns pauschalas da maximalmain 500 francs per scolara e scolar (SeS) als custs per installar scolas u classas bilinguas e da maximalmain 400 francs per SeS per manar talas scolas u classas. A chaschun d'ina revisiun par­ziala da la OLing ha la Regenza limità – cun il conclus dals 14 da schaner 2014 (prot. nr. 1/2014) – las contribuziuns chantunalas a 330 000 francs per onn a partir da l'onn da scola 2014/15. La revisiun parziala è stada necessaria per realisar l'in­cumbensa Tenchio concernent il pajament da contribuziuns da gestiun chantunalas a tut las vischnancas che mainan classas bilinguas en las linguas chantunalas. Fin a quest mument eran vegnidas pajadas mintgamai las contribuziuns maximalas da 400 resp. 500 francs per SeS. Damai ch'il dumber da SeS è s'augmentà en il decurs dal temp e damai ch'i èn vegnidas permessas ulteriuras scolas e classas bilinguas, è la contribuziun per SeS sa reducida da 400 francs per l'onn da scola 2013/14 sin 296 francs per l'onn da scola 2014/15 ed importa actualmain 262 francs per SeS (onn da scola 2020/21).

L'incumbensa Degiacomi constatescha che la cofinanziaziun dal chantun na saja betg clera. Pervia da quai saja difficil per ils purtaders da scola d'installar e da manar classas bilinguas. En quest connex èsi da menziunar che la contribuziun pauschala n'è strusch sa midada dapi intgins onns da scola, perquai ch'il dumber da scolaras e scolars è relativamain stabil. Uschia na chapescha la Regenza betg, pertge che las pitschnas differenzas duain chaschunar difficultads per ils purtaders da scola pertutgads.

tabitCun il conclus dals 2 da favrer 2021 (prot. nr. 85/2021) concernent las propostas da mesiras per promover las linguas en il chantun Grischun ha la Regenza prendì enco­nuschientscha dal catalog da mesiras correspundent da l'october 2020. En quest connex è l'Uffizi per la scola populara ed il sport vegnì incumbensà da realisar la me­sira «Promover scolas bilinguas e trilinguas sin il stgalim da la scola populara entaifer vischnancas plurilinguas e germanofonas (mesira 2.10)». Per quests motivs prevesa la Regenza, cun la resalva ch'il Cussegl grond approveschia il preventiv, da budgetar e da pajar a partir da l'onn 2023 puspè las contribuziuns pauschalas maximalas da 400 francs respectivamain da 500 francs als purtaders da scola cun scolas e classas bilinguas. Quai chaschuna custs supplementars da var 200 000 francs per onn en­vers il preventiv 2022 ed envers il plan da finanzas 2023–2025. Cun quest proceder na dovri naginas adattaziuns da las prescripziuns tenor la OLing.

Sin basa da questas explicaziuns propona la Regenza al Cussegl grond d'approvar l'incumbensa qua avant maun concernent l'adattaziun da la budgetaziun per aug­mentar sco dumandà las contribuziuns pauschalas a favur da las scolas bilinguas e da la refusar concernent l'adattaziun da las basas legalas.

15 d'october 201