L'Atelier d'emprendissadi per la creaziun da vestgadira era oriundamain ina partiziun da la Scola da dunnas dal Grischun. Tras l'entrada en vigur da la Lescha davart lieus da scolaziun en ils fatgs da la sanadad e socials (LLSS; DG 432.000), èn la Scola professiunala da sanadad e tgira da malsauns (SPS&T), la Scola interconfessiunala da sanadad e tgira da malsauns dal Grischun (SIT), la Scola grischuna per la tgira en il sectur psicosocial e las partiziuns betg seminaristicas da la Scola da dunnas dal Grischun vegnidas transferidas en il Center da furmaziun per la sanadad ed ils fatgs socials (CSS) dad oz. Il lavuratori d'emprendissadi per cusunzas da dunnas – che tutgava quella giada er tar la Scola da dunnas dal Grischun – n'è betg vegnì integrà. Quai pervia da la critica exprimida en il rom da la procedura da consultaziun, perquai che la purschida da scolaziun n'è vegnida attribuida ni als fatgs da sanadad ni als fatgs socials. La proposta da la cumissiun e da la Regenza – en la missiva concernent la Lescha davart lieus da scolaziun en ils fatgs da la sanadad e socials (LLSS) (carnet nr. 2/2002–2003) – d'attribuir il lavuratori d'emprendissadi per cusunzas da dunnas a l'Uffizi per la furmaziun professiunala (UCFP), è vegnida acceptada dal Cussegl grond.

Tar la dumonda 1: Cun il conclus da la Regenza (CR) dals 22 da zercladur 2021 (prot. nr. 595/2021) èsi vegnì fixà che la purschida chantunala «Atelier d'emprendissadi per la creaziun da vestgadira» vegnia abolida per ils 31 d'avust 2024. Il medem di la saira èn las collavuraturas ed ils collavuraturs directamain pertutgads da l'Atelier d'emprendissadi per la creaziun da vestgadira vegnids infurmads a bucca dal UCFP. Il di suenter èn las persunas en scolaziun vegnidas infurmadas. Il conclus è suenter vegnì communitgà a tut las collavuraturas ed ils collavuraturs dal UCFP. L'Uffizi da persunal è vegnì integrà en las lavurs preparatoricas e suenter è el vegnì infurmà cun il CR davart la decisiun. L'Uniun grischuna d'artisanadi e mastergn, la Scola professiunala artisanala Cuira (SPC) sco er la Scola spezialisada superiura da la Svizra Sidorientala (ibW) èn medemamain vegnidas infurmadas davart la decisiun (guardar resposta tar la dumonda 3). Ina communicaziun correspundenta han ultra da quai er survegnì la Scola professiunala per moda e creaziun Turitg, la direcziun dals curs intermanaschials sco er la Cuminanza d'interess per la scolaziun professiunala per moda e creaziun. Plinavant èn vegnids infurmads las clientas ed ils clients da plirs onns davart la serrada. Sin ulteriuras dumondas ha l'uffizi cumpetent mintgamai dà las respostas correspundentas. Ina communicaziun correspundenta è ultra da quai da chattar sin la pagina d'internet dal UCFP. La publicaziun dals emprendissadis per il cumenzament da l'emprendissadi 2022 è immediatamain vegnida adattada.

Tar la dumonda 2: Sut l'aspect dals fatgs, che l'Atelier d'emprendissadi per la creaziun da vestgadira na po strusch pli ademplir sia incumbensa da furmaziun pervia dal svilup demografic e dal consum, che las persunas scoladas n'èn betg dumandadas sin il martgà da lavur, che la furmaziun da creaturas e creaturs da vestgadira pudess vegnir sustegnida en cas da basegn cun bler damain meds finanzials en scolas extrachantunalas e ch'il basegn da manar vinavant l'atelier d'emprendissadi n'è cumprovadamain betg pli avant maun (art. 21 lit. 2 da la Lescha davart la furmaziun professiunala e davart purschidas da furmaziun cuntinuanta, LFurm; DG 430.000), è la Regenza vegnida a la conclusiun d'abolir la purschida. Uschia è er vegnida ademplida l'incumbensa constituziunala. L'art. 78 da la Constituziun dal chantun Grischun (Constituziun chantunala, CC; DG 110.100) pretenda che las incumbensas stoppian vegnir examinadas periodicamain areguard lur necessitad, lur efficacitad e lur finanziabladad. Giuvenils interessads pon far la scolaziun professiunala da basa sco creatura u creatur da vestgadira AFQ en in atelier d'emprendissadi extrachantunal (Turitg, Son Gagl e.u.v.) ubain en in manaschi d'emprendissadi.

Tar la dumonda 3: En in emprim pass è vegnida consultada l'Uniun grischuna d'artisanadi e mastergn. Plinavant è vegnida discutada la pussaivladad da surpigliar e da manar vinavant la purschida cun la ibW e la SPC. Sin fundament da lur analisas han dentant omaduas instituziuns stuì constatar, ch'il potenzial da la professiun da creatura u creatur da vestgadira AFQ en la furma actuala è fitg pitschen, ch'i na dat strusch pli la pussaivladad da pratitgar la professiun en il chantun e che la cuntinuaziun chaschunass gronds custs. Per la ibW sco scola terziara fiss ina direcziun organisatorica da questa purschida mo stada pussaivla en collavuraziun cun ina scola dal stgalim secundar II u cun in'organisaziun correspundenta dal mund da lavur (OdML). Quests facturs han laschà parair la gestiun d'in atelier correspundent sco fitg difficil. Ina surpigliada resp. ina cuntinuaziun n'è pia betg vegnida en dumonda. Suenter che l'aboliziun da l'Atelier d'emprendissadi per la creaziun da vestgadira è vegnì enconuschent, hai dà il 1. d'october 2021 in discurs tranter il manader da l'Uffizi per la furmaziun professiunala ed il CEO da la BrockiGrischun concernent l'eventuala surpigliada da l'atelier. Suenter avair explitgà detagliadamain ils motivs per la serrada da l'atelier d'emprendissadi, n'ha l'Uniun BrockiGrischun medemamain betg pudì constatar in motiv respectivamain in basegn cumprovà per surpigliar l'atelier d'emprendissadi.

Tar la dumonda 4: Tut en tut han 28 emprendistas ed emprendists absolvì durant ils ultims 10 onns lur furmaziun fundamentala professiunala en l'Atelier d'emprendissadi per la creaziun da vestgadira, da quai 26 dunnas e 2 umens.

1 da december 2021