Il dretg da recurs da las organisaziuns da l'ambient è francà en ils artitgels 55 e 55a–f da la Lescha federala davart la protecziun da l'ambient (LPAmb), en ils artitgels 12 e 12a–g da la Lescha federala davart la protecziun da la natira e da la patria (LPNP) sco er en l'artitgel 28 da la Lescha davart la tecnica genetica (LTG).
Il dretg da recurs da las associaziuns tenor la legislaziun federala sco er il dretg da recurs da las organisaziuns, ch'è entrà en vigur sin plaun federal il fanadur 2007, mettan pli e pli pals en las rodas a l'economia. Il passà ha mussà che las associaziuns e las organisaziuns n'èn stadas ni objectivas, ni orientadas a soluziuns u a finamiras, e ch'ina buna collavuraziun n'è insumma betg stada pussaivla. Il cuntrari, il cumportament da las associaziuns e da las organisaziuns è polemic e chaschuna impediments. Dals spierts ch'ins ha clamà, na vegn ins ussa displaschaivlamain betg pli liber.
Plinavant è la fracziun da la PPS da l'avis ch'i saja fitg cuntradictoric che talas organisaziuns vegnan finanziadas cun daners publics e ch'ellas fan alura process cunter il stadi, che vegnan finanziads cun daners da taglia.
Il tema luf è il meglier exempel. Malgrà ch'igl è cler en il fratemp, che la derasaziun nuncontrollada dal luf periclitescha l'existenza da tut il territori da muntogna. Il cumportament en il passà ha mussà e mussa, ch'ina collavuraziun cun las federaziuns da l'ambient n'è betg pussaivla.
Perquai suttametta la fracziun da la PPS al Cussegl grond la suandanta proposta da prender in conclus direct concernent l'inoltraziun d'ina iniziativa dal chantun.
Sa basond sin l'artitgel 160 alinea 1 da la Constituziun federala inoltrescha il chantun Grischun tras ses Cussegl grond la suandanta iniziativa dal chantun:
- Lescha davart la protecziun da l'ambient (LPAmb):
Las organisaziuns da l'ambient na duain avair pli nagina pussaivladad da far protesta cunter decisiuns democraticas. L'interess public duai esser pli impurtant ch'il dretg da recurs da las associaziuns.
- Lescha davart la protecziun da la natira e da la patria (LPNP):
Las organisaziuns na duain avair pli nagina pussaivladad da far protesta cunter decisiuns democraticas. L'interess public duai esser pli impurtant ch'il dretg da recurs da las associaziuns.
Cuira, ils 8 da december 2021
Gort, Dürler, Favre Accola, Brandenburger, Della Cà, Grass, Hefti, Kienz, Koch, Weber, Renkel, Stocker