Oz stattan a disposiziun a la populaziun grischuna in center da documents central a Cuira ed in center da documents regiunal a Zernez. Questa magra rait era eventualmain raschunaivla per il vast territori chantunal, uschè ditg ch'ins stueva mo laschar registrar las datas biometricas per survegnir documents d'identitad duraivels (passaports svizzers, cartas d'identitad, permissiuns da dimora «C» e «B»).
Dapi la primavaira 2021 ston las datas biometricas dentant vegnir registradas er per survegnir permissiuns da cunfinarias e cunfinaris «G» e permissiuns da dimora curta «L». Quai vul dir che mintga nova persuna spezialisada temporara en il chantun sto sa render ina giada a Cuira u a Zernez. E lura regularmain tut las persunas, tar las qualas la valaivladad da las datas biometricas scada.
Gist en las destinaziuns turisticas ch'èn lunsch davent dals dus centers actuals ha questa novaziun chaschunà reacziuns per part vehementas en las branschas ch'èn fermamain dependentas da persunal spezialisà stagiunal. Quai, perquai che l'organisaziun e l'indemnisaziun dals viadis respectivs chaschunan lavur administrativa supplementara, dovran bler temp ed effectueschan gronds custs a las lavurantas ed als lavurants pertutgads sco er a lur patrunas e patruns. Ed ultra da quai chaschunan quests viadis blera mobilitad nunnecessaria sin il territori chantunal. A questas circumstanzas pon ins far frunt tras ulteriuras purschidas decentralas.
La vischnanca da Tavau fiss pronta d'eruir – en collavuraziun cun il chantun – l'installaziun d'in ulteriur simpel center da documents d'identitad sin ses territori communal. In'evaluaziun da las dumondas per documents dals onns 2020 e 2021 sco er ina calculaziun approximativa da las dumondas ch'èn da spetgar ils proxims onns (renovaziuns e novas emissiuns da cartas d'identitad entaifer ed ordaifer la vischnanca, da passaports e da permissiuns da dimora «B», «C», «L» e «G») han mussà ch'igl exista in basegn da ca. 3500 registraziuns da datas per onn en la regiun da Tavau. Questa presumziun quinta cun il fatg ch'er la populaziun e las interpresas da las vischnancas da la regiun Alvra, da la destinaziun partenaria Claustra sco er d'ulteriuras vischnancas dal Partenz Davos vegnian a profitar da questa purschida.
Tras ina purschida pli decentrala po il chantun s'avischinar pli fitg a sias burgaisas e ses burgais, a las persunas spezialisadas ed a las interpresas, augmentar la cuntentientscha da la clientella en il senn d'in respargn da temp e da custs, evitar numerus viadis nunnecessaris sco er reducir ils custs administrativs e finanzials per l'economia. Per quest motiv suttamettan las sutsegnadras ed ils sutsegnaders la suandanta incumbensa a la Regenza:
En collavuraziun cun las vischnancas ch'èn situadas strategicamain bain per meglierar la cuvrida dal basegn eruescha il chantun las pussaivladads per garantir ina purschida pli decentrala per registrar datas biometricas en il Grischun.
Cuira, ils 16 da favrer 2022
Wilhelm, Crameri, Bettinaglio, Atanes, Baselgia-Brunner, Berther, Berweger, Cahenzli-Philipp, Caluori, Cantieni, Casty, Casutt-Derungs, Caviezel (Cuira), Censi, Clalüna, Degiacomi, Della Cà, Derungs, Engler, Epp, Favre Accola, Felix, Flütsch, Gartmann-Albin, Geisseler, Gort, Hardegger, Hofmann, Horrer, Kasper, Kohler, Lamprecht, Loi, Maissen, Märchy-Caduff, Michael (Castasegna), Müller (Favugn), Natter, Noi-Togni, Papa, Paterlini, Perl, Preisig, Rettich, Ruckstuhl, Rutishauser, Schmid, Schutz, Valär, von Ballmoos, Wellig, Pajic, Tomaschett (Cuira)