La mancanza da persunas spezialisadas sa mussa er tar l'administraziun chantunala. La recrutaziun da forzas da lavur sin tut ils stgalims è gia oz difficila e dastgass daventar en il futur anc bler pli difficila. Ultra da quai chaschunan il «nov mund da lavur» respectivamain ils «millenials» grondas sfidas per las patrunas ed ils patruns ed uschia er per il chantun. Nus stuain far frunt activamain a la transfurmaziun e prender per mauns a temp las midadas necessarias. Cunzunt il management dal persunal vegn a daventar pli e pli impurtant.
En las sessiuns da zercladur e d'avust 2003 ha il Cussegl grond tractà la missiva tar l'examinaziun da las structuras e da las prestaziuns per sanar las finanzas dal chantun. En il rom da las mesiras da spargn èn vegnidas stritgadas var 100 plazzas durant l'onn 2004, uschia er tar l'anteriur Uffizi da persunal e d'organisaziun (UPO). Particularmain è vegnida stritgada quella giada la plazza dal manader dal Svilup da l'organisaziun tar il UPO. Pli tard ha il UPO survegnì il nov num Uffizi da persunal. Ultra da quai ha il Cussegl grond concludì avant intgins onns in stop d'engaschar ulteriur persunal. Quai vul dir che novas plazzas ston vegnir occupadas tras restructuraziuns internas. A media vista na dastgass quai betg pli esser pussaivel, perquai ch'il chantun respectivamain la Regenza survegn adina dapli incumbensas supplementaras. En il Cussegl grond vegn adina puspè exprimida la pretensiun d'optimar ils process e da redimensiunar l'administraziun. Las sutsegnadras ed ils sutsegnaders èn da l'avis ch'i po vegnir fatg frunt cun in svilup qualifitgà da l'organisaziun a las differentas sfidas e ch'i po vegnir generà da quai in vair niz. Quest post duai ultra da quai examinar ils process da lavur en l'entira administraziun e sondar ensemen cun ils posts responsabels il potenzial d'optimaziun sco er cussegliar e sustegnair la realisaziun da las optimaziuns. Ils ulteriurs posts da servetsch da l'administraziun chantunala duain pudair duvrar la cumpetenza organisatorica da quest post entaifer l'administraziun sco sustegn per organisar e per controllar projects. Uschia pon vegnir reducids ils custs per prestaziuns da terzas persunas, che s'augmentan permanentamain.
Las sutsegnadras ed ils sutsegnaders supplitgeschan la Regenza d'explitgar sia posiziun envers l'extensiun da l'Uffizi da persunal cun ina partiziun supplementara Svilup da l'organisaziun. Co vesa la Regenza ils avantatgs ed ils dischavantatgs d'ina tala extensiun ed en tge decurs dal temp pudess quest post vegnir incumbensà cun tge incumbensas?
Cuira, ils 16 da zercladur 2022
Hardegger, Holzinger-Loretz, Michael (Donat), Baselgia-Brunner, Brunold, Bürgi-Büchel, Cahenzli (Sagogn), Cahenzli-Philipp (Vaz Sut), Casutt-Derungs, Caviezel (Cuira), Danuser, Degiacomi, Derungs, Ellemunter, Fasani, Föhn, Gugelmann, Hartmann-Conrad, Kohler, Kunfermann, Lamprecht, Loepfe, Märchy-Caduff, Natter, Niggli-Mathis (Grüsch), Padrun-Valentin, Pajic, Preisig, Rettich, Ruckstuhl, Rutishauser, Sax, Schmid, Schneider, Thomann-Frank, Tomaschett-Berther (Trun), Ulber, von Ballmoos, Zanetti (Landquart)