Navigation

Inhaltsbereich

Incumbensa Degiacomi concernent il rinforz da la tgira ed assistenza ambulanta

Sessiun: 07.12.2022

Per il provediment da la populaziun en la tgira da lunga durada èsi medemamain impurtant d'avair ina purschida che correspunda als basegns tant en il sectur ambulant (p.ex. Spitex) sco er en il sectur staziunar (p.ex. chasas da persunas attempadas e da tgira). Igl è savens tant en l'interess da las persunas pertutgadas sco er dal maun public, che la tgira e l'assistenza possian avair lieu a chasa uschè ditg sco pussaivel.

Betg mo l'augment dals custs per la tgira da lunga durada, mabain particularmain er la garanzia da las purschidas da tgira e d'assistenza chaschunan dentant grondas sfidas, perquai che la mancanza da persunas spezialisadas daventa spert pli e pli acuta. Sut quest aspect daventi svelt pli e pli impurtant da sustegnair e da rinforzar la tgira ed assistenza a chasa sco er las raits da sustegn.

En sia resposta a la «incumbensa concernent impuls en favur da la finanziaziun da la tgira ambulanta e staziunara» scriva la Regenza l'avrigl 2022, che l'indemnisaziun finanziala dals custs fixs per ils letgs da tgira da dimoras curtas en chasas da tgira e per las purschidas da sustegn per distgargiar persunas che tgiran lur confamigliars, pudessan esser mesiras cunvegnentas en quest senn. Or da l'optica da las incumbensadras e dals incumbensaders èsi impurtant, che las purschidas da tgira e las purschidas d'assistenza vegnian rinforzadas da medema maniera.

La Regenza vegn incumbensada da suttametter al Cussegl grond – en il rom d'ina revisiun parziala da la Lescha per promover la tgira da persunas malsaunas – ina regulaziun per indemnisar finanzialmain ils custs fixs per ils letgs da tgira da dimoras curtas en chasas da tgira, quai per distgargiar las persunas che assistan e che tgiran lur confamigliars.

Cuira, ils 7 da december 2022

Degiacomi, Holzinger-Loretz, Loepfe, Altmann, Atanes, Bachmann, Bardill, Baselgia, Biert, Bischof, Bisculm Jörg, Bleuler-Jenny, Bürgi-Büchel, Cahenzli-Philipp (Vaz Sut), Danuser (Cuira), Della Cà, Dietrich, Epp, Furger, Gansner, Gartmann-Albin, Gredig, Hofmann, Jochum, Kappeler, Kasper, Kienz, Kocher, Kohler, Kreiliger, Kuoni, Lamprecht, Luzio, Mani, Mazzetta, Michael (Castasegna), Mittner, Müller, Nicolay, Oesch, Pajic, Perl, Preisig, Rageth, Rettich, Righetti, Rodigari, Rüegg, Rusch Nigg, Rutishauser, Saratz Cazin, Sax, Spagnolatti, Stiffler, Thür-Suter, von Ballmoos, Walser, Walther, Widmer, Wieland, Wilhelm, Zindel

Resposta da la regenza

Las persunas che tgiran lur confamigliars èn ina pitga impurtanta per realisar il prin­cip «ambulant avant staziunar» da la politica da sanadad. La tgira da confamigliars è per regla ina chargia per il corp sco er per la psica, en spezial sch'ella vegn fatga sper l'activitad professiunala. Persunas che tgiran lur confamigliars pon ademplir questa incumbensa a lunga vista mo, sch'ellas han a disposiziun purschidas da distgargia per proteger lur sanadad. Talas purschidas da distgargia èn per exempel dimoras curtas per persunas che basegnan tgira en chasas da persunas attempadas e da tgira.

Las dimoras curtas da persunas che basegnan tgira en chasas da persunas attem­padas e da tgira han l'intent da distgargiar las persunas che tgiran ed assistan lur confamigliars. Uschia pon ellas per exempel far vacanzas senza quitads. Cun metter a disposiziun letgs da tgira per dimoras curtas en chasas da persunas attempadas e da tgira èsi pia pussaivel da retardar u schizunt d'evitar la collocaziun da persunas che basegnan tgira en ina chasa da persunas attempadas e da tgira. Las chasas da persunas attempadas e da tgira porschan gia oz letgs da tgira per dimoras curtas da persunas che basegnan tgira. Il problem principal per las chasas da persunas attem­padas e da tgira è en quest connex ch'ils custs per tegnair a disposiziun letgs da tgira per dimoras curtas na vegnan betg indemnisads dal maun public.

En sia resposta dals 8 d'avrigl 2022 a l'incumbensa Degiacomi concernent impuls en favur da la finanziaziun da la tgira ambulanta e staziunara ha la Regenza empermess da preschentar – en il rom da la proxima revisiun parziala da la Lescha per promover la tgira da persunas malsaunas – propostas per indemnisar finanzialmain ils custs per tegnair a disposiziun letgs da tgira per dimoras curtas en chasas da tgira sco er per ulteriuras purschidas da sustegn, quai per distgargiar las persunas che assistan e che tgiran lur confamigliars.

La distgargia da persunas che tgiran lur confamigliars tras purschidas da sustegn è cuntegnida sco mesira en il Program da la Regenza 2021 fin 2024. L'Uffizi da sana­dad ed il Departament da giustia, segirezza e sanadad elavuran actualmain in project da consultaziun correspundent.

Sa basond sin questas explicaziuns propona la Regenza al Cussegl grond d'acceptar questa incumbensa.

25 da schaner 2023