L'atun 2022 ha il Parlament federal concludì ina revisiun da la Lescha d'energia (LEn; CS 730.0) sut il titel «Mesiras urgentas per garantir a curta vista il provediment d'electricitad durant l'enviern», quai cun la finamira d'endrizzar svelt ina producziun da 2 terawatts (TWh) electricitad regenerabla or d'implants fotovoltaics gronds, cun ina gronda cumpart producida l'enviern. La revisiun è entrada en vigur il 1. d'october 2022 e vala fin ils 31 da december 2025. Per il temp a partir da l'onn 2026 pon ins partir dal fatg ch'i vegn decretada ina regulaziun consecutiva en il rom da las debattas dal Parlament federal.

En connex cun l'art. 71a al. 3 LEn ha la Confederaziun avert – il cumenzament da december 2022 – ina consultaziun curta tar las midadas da l'Ordinaziun d'energia (OEn; CS 730.01) sco er da l'Ordinaziun davart la promoziun da l'energia (OPEn; CS 730.03). Quai tranter auter per sclerir las dumondas da procedura sco er las premissas en il rom da la promoziun da durada limitada tras la Confederaziun. Tenor las enconuschientschas actualas duain las ordinaziuns federalas vegnir messas en vigur previsiblamain la fin da mars 2023. Er cun las basas giuridicas menziunadas ston ins partir dal fatg che divers aspects restan averts sin plaun federal. Perquai è vegnida furmada il december 2022 ina gruppa da lavur chantunala che duai sclerir las dumondas da procedura sco er las pretensiuns als documents da dumonda e.u.v. Las enconuschientschas vegnan integradas en in mussavia che vegn rendì enconu­schent, suenter che las dumondas èn scleridas. Questa gruppa da lavur inter­departamentala consista da represchentantas e represchentants dal Departament d'infrastructura, energia e mobilitad (DIEM), dal Departament d'economia publica e fatgs socials (DES) e dal Departament d'educaziun, cultura e protecziun da l'ambient (DECA) sco er dals uffizis chantunals ch'èn pertutgads principalmain en chaussa. Igl è previs che las proceduras da permissiun durant la perioda d'urgenza fin l'onn 2025 sa basian sin ils instruments e sin ils andaments da procedura cumprovads. Per la perioda suandanta vegnan examinadas regulaziuns giuridicas spezialas sco er proceduras adattadas.

Tar la dumonda 1: Tenor l'art. 71a al. 3 LEn dat il chantun la permissiun per implants fotovoltaics gronds. Però sto esser avant maun il consentiment da la vischnanca da staziunament sco er da las proprietarias e dals proprietaris dals bains immobigliars. Sco menziunà al cumenzament èn vegnidas iniziadas las lavurs correspundentas areguard la procedura chantunala da permissiun ed areguard l'autoritad directiva. Las disposiziuns giuridicas federalas, ch'èn vegnidas dadas en consultaziun, na pre­scrivan betg, tge organ da la vischnanca da staziunament che sto dar il consentiment correspundent. Tenor l'avis da la Regenza fissi raschunaivel da surdar questa incum­bensa a las votantas ed als votants, per che la decisiun haja ina vasta basa demo­cratica. Quest punct, sco er il scleriment da las libertads d'agir chantunalas (p.ex. eventuala applicaziun da la procedura da permissiun EOZ), ha la Regenza tranter auter exprimì envers la Confederaziun en il rom da la consultaziun tar las revisiuns da las ordinaziuns per la realisaziun da l'art. 71a LEn dals 15 da december 2022.

Tar la dumonda 2: La Strategia chantunala concernent la forza idraulica 2022–2050 prevesa tranter auter ina strategia da participaziun ad ovras idraulicas existentas. A la fin da la concessiun returna ina gronda part da talas gratuitamain a las visch­nancas concessiunaras ed al chantun. Per implants fotovoltaics gronds, ma er per implants eroelectrics gronds, manca actualmain ina legislaziun chantunala speziala che prevesa in dretg da participaziun dal chantun e da las vischnancas. Il chantun ha l'intenziun da stgaffir disposiziuns giuridicas correspundentas. Per quest intent ston l'emprim vegnir elavuradas las basas, che pon lura vegnir realisadas en il rom dal process legislativ. Schebain igl è pussaivel da persequitar ina strategia da participa­ziun cumparegliabla, vegn a sa mussar suenter la terminaziun da las lavurs.

Tar la dumonda 3: Guardar resposta a la dumonda 2.

1. da mars 2023