Navigation

Inhaltsbereich

Dumonda da la fracziun da la PPS concernent la criminalitad liada a l'acquisiziun da drogas en la regiun da Cuira (emprima sutsegnadra Adank)

Sessiun: 15.02.2023

La Statistica criminala da la polizia (SCP) dal chantun Grischun da l'onn 2021 mussa, ch'ils delicts en il sectur da la Lescha da narcotics vegnan commess – guardà tenor regiuns – particularmain en la regiun da Cuira e conturns e ch'il dumber da quests delicts è s'augmentà fermamain. Sch'ins cumpareglia la frequenza, vegn commess a Cuira – guardà sur l'entir chantun – il dumber il pli grond da delicts cunter la Lescha da narcotics.

Areguard las gruppas da vegliadetgna èn remartgabels ils suandants puncts:

  • Particularmain persunas minorennas e persunas giuvnas creschidas (da 18 fin 24 onns) vegnan involvids pli e pli fitg en la criminalitad liada a l'acquisiziun da drogas.
  • 13,4 pertschient dals delicts vegnan commess da persunas minorennas.
  • Il possess respectivamain la sequestraziun en connex cun il consum da substanzas illegalas è per gronda part in delict da repetiziun registrà.
  • Il dumber da delicts pli pitschens registrads (enguladitschs, infracziuns en vehichels e.u.v.) è sa dublegià mintga onn.
  • Betg stimabel n'è il dumber zuppà.

Sch'ins cumpareglia l'onn 2020 cun l'onn 2021 èn er il commerzi, la cultivaziun u la producziun illegala da narcotics daventads bler pli frequents (19 pertschient dapli delicts, 25 pertschient dapli crims). Las substanzas sequestradas èn principalmain marihuana, cocain, haschisch e heroin. Tras l'augment dal commerzi cun drogas da freebase resultan ultra da quai dependenzas pli dramaticas. Las consequenzas fisicas e psichicas èn anc pli grondas ed ils donns consecutivs a lunga vista èn gravants.

A Cuira chaschuna particularmain la repartiziun da las cumpetenzas tranter la Polizia da la citad da Cuira e la Polizia chantunala ina gronda sfida. Mo la Polizia chantunala dastga arrestar persunas che han commess in delict cunter la Lescha da narcotics (determinà sin basa da la regulaziun da cumpetenzas da la polizia giudiziala).

Cun gronda preoccupaziun observain nus quest svilup, cunzunt perquai ch'il dumber da cas s'augmenta cumprovadamain fitg e perquai che la segirezza da la populaziun ed en spezial da nossa giuventetgna patescha da questa situaziun. Cunquai ch'il commerzi illegal s'augmenta d'in cuntin, vegnan ils lieus da commerzi cun drogas a Cuira pli e pli er transferids en ils quartiers ed en las regiuns perifericas da la citad. In motiv per quai è er quel, che l'effect da las drogas tschessa bler pli svelt.

Las sutsegnadras ed ils sutsegnaders tschentan en quest connex las suandantas dumondas a la Regenza:

  1. Co stima la Regenza la situaziun actuala ed il svilup da la criminalitad liada a l'acquisiziun da drogas e dal consum illegal da narcotics a Cuira?
  2. Tge mesiras ponderescha il chantun da prender per limitar l'augment permanent dal dumber da delicts en connex cun il commerzi illegal, la cultivaziun u la producziun illegala da drogas?
  3. Co po la Regenza optimar ils puncts da contact e la repartiziun da las cumpetenzas tranter la Polizia da la citad e la Polizia chantunala, per ch'ils process d'arrestaziun e da scleriment possian vegnir accelerads e simplifitgads?
  4. Actualmain vegn elavurà in concept chantunal per locals da dependenza. Tge mesiras supplementaras ponderescha il chantun da prender per sustegnair e per promover en moda pli activa ils programs da guariziun e d'accumpagnament, e resguarda il nov concept per locals da dependenza las midadas da cumportament che resultan en connex cun il consum da drogas da freebase?

Cuira, ils 15 da favrer 2023

Adank, Brandenburger, Butzerin, Candrian, Casutt, Cortesi, Della Cà, Dürler, Favre Accola, Gort, Grass, Heim, Hug, Koch, Krättli, Menghini-Inauen, Morf, Rauch, Roffler, Salis, Sgier, Städler, Stocker, Weber

Resposta da la regenza

Il consum da narcotics en la classa da vegliadetgna da las persunas minorennas e da las persunas giuvnas creschidas (da 18 fin 24 onns) è sa reducì durant ils onns 2017 fin 2022. Il commerzi cun narcotics è praticamain constant e correspunda a las valurs dals onns 2018/2019. Il dumber dals delicts tenor il Cudesch penal svizzer (CP; CS 311.0) ch'èn vegnids commess da persunas giuvnas creschidas è sut quels dals onns 2017–2019 e levamain sur quels dals onns 2020/2021. Tar ils engula­ditschs, tar ils enguladitschs da vehichels cun infracziun e.u.v. pon ins constatar ina reducziun cuntinuanta fin l'onn 2021. L'onn 2022 è il dumber da quests delicts puspè s'augmentà (da 669 a 946 cas). Las cifras actualas correspundan a las valurs dals onns 2015 e 2016.

Tar la dumonda 1: Il dumber da las cuntravenziuns cunter la Lescha da narcotics (LN; CS 812.121) sin il territori da la citad da Cuira è stabil e sa mova dapi l'onn 2016 tranter 389 e 542 cuntravenziuns. L'augment da 20 % da 389 (2021) a 461 (2022) cas registrads resulta da la valur da totalmain 389 cas l'onn 2021, ch'è stada uschè bassa pervia da corona. Cun reguard a la statistica resp. a ses svilup durant ils ultims onns ed en vista al fatg ch'il dumber dals delicts constatads en la criminalitad da nar­cotics s'augmenta cun las mesiras polizialas, ma er en consideraziun dal fatg che la polizia ha rinforzà las mesiras respectivas (prevenziun, repressiun), poi vegnir con­statà che la situaziun n'è betg sa pegiurada generalmain sin il territori da la citad da Cuira. La scena en il Stadtpark è dapi 2 onns stabila sin in aut nivel. Ins na scuntra strusch persunas d'ordaifer il chantun (nagin effect d'attracziun). Il potenzial da de­pendenza da la scena è fitg aut e la substanza illegala «cocain-freebase» che vegn consumada il pli savens, generescha in'activitad dinamica e hectica da la scena, che sa manifestescha er vers anora. Freebase vegn fimà ed arriva perquai fitg svelt en il sang. Entaifer mo paucas minutas han ins ina sborgna. L'effect tschessa dentant gia suenter 10 fin 15 minutas. Il desideri da puspè consumar la droga returna fitg svelt. Quai ha consequenzas directas per la criminalitad liada a l'acquisiziun da drogas.

Tar la dumonda 2: Ils ultims 2 onns ha la polizia intensivà las controllas e la lavur da retschertga. Perquai è er il dumber dals delicts ch'ella ha constatà en quest connex, puspè s'augmentà levamain envers l'onn 2021. Tuttina èsi d'ina vart impurtant da mantegnair il squitsch da controlla da la polizia. Da l'autra vart stoi dentant er vina­vant vegnir focussà pli fitg sin il cumbat dal commerzi cun narcotics sco er sin la lavur da retschertga cumplexa e sin la collavuraziun transcunfinala respectiva. En quest connex ston las stgarsas resursas persunalas existentas vegnir impundidas uschè bain sco pussaivel. Areguard ulteriuras mesiras poi vegnir renvià a l'incumbensa da la Regenza d'elavurar ina Strategia chantunala Dependenzas sco er a la resposta a la dumonda 4.

Tar la dumonda 3: La collavuraziun tranter la Polizia da la citad da Cuira e la Polizia chantunala funcziuna fitg bain. Ils puncts da contact ed ils process vegnan exami­nads regularmain ed adattads sche necessari. Ultra da quai vegnan actualmain discutadas tematicas sco dapli controllas cuminaivlas sco er ina collavuraziun pli in­tensiva en il rom d'acziuns, da patruglias e da stages. Las incumbensas da la polizia giudiziala, en spezial las retschertgas cumplexas en il sectur da la criminalitad da narcotics, ston dentant vegnir liquidadas en mintga cas tras la Polizia chantunala.

Tar la dumonda 4: La Regenza ha concludì da meglierar successivamain las pur­schidas d'agid simpel per persunas dependentas. Ella prevesa da cuntinuar cun la lavur sociala extra muros (streetwork), da constituir e d'evaluar in nov post da contact e da consultaziun pli grond en in lieu central sco er da meglierar las purschidas d'abi­tar (cun accumpagnament). Cun l'incarica da prestaziun «Streetwork» a l'Uniun per l'agid da survivenza dal Grischun per ils onns 2022–2025 vegn gia realisada la lavur sociala extra muros. Per eventualmain installar e manar in local da consum è responsabla la citad da Cuira.

2 da matg 2023