Pervia da la transfurmaziun digitala en la tecnologia ed en la societad è l'impur­tanza d'implementar furmas ed instruments d'emprender digitals creschida ferma­main. Quest ed er ulteriurs svilups actuals da la societad èn vegnids resguardads tar l'elavuraziun dal Plan d'instrucziun 21. Cun la realisaziun dal Plan d'instruc­ziun 21 è uschia vegnì introducì in plan d'instrucziun dal modul Medias ed infor­matica per l'emprima giada gia sin il stgalim primar. Las scolas han adattà lur infrastructuras en moda differenta a las novas circumstanzas.

Tar la dumonda 1: La Regenza ha enconuschientscha dal fatg, che las expensas dals purtaders da scola per l'infrastructura da las tecnologias d'infurmaziun e communicaziun (ICT) èn s'augmentadas. Quai sin fundament da duas retscher­tgas che l'Uffizi per la scola populara ed il sport (USS) ha fatg ils onns 2019 e 2021 davart la realisaziun dal Plan d'instrucziun 21. Questas analisas da la situaziun han mussà, che l'equipament da hardware e da software sco er la connectivitad èn vegnids engrondids. Las infrastructuras dad ICT èn vegnidas extendidas en dependenza da las relaziuns localas, da la capacitad economica da la vischnanca respectiva sco er da l'organisaziun e da l'equipament gia existent da la scola. En connex cun l'introducziun dal plan d'instrucziun dal modul Medias ed informatica èn ils purtaders da scola vegnids infurmads dal Depar­tament d'educaziun, cultura e protecziun da l'ambient (DECA) cun in manual d'agid davart las premissas ch'els ston ademplir per pudair realisar quest plan d'instrucziun dal modul. En il manual d'agid menziunà èn vegnidas fatgas recu­mandaziuns areguard l'infrastructura dad ICT da las scolas. La Regenza parta dal fatg, che las recumandaziuns vegnan cuntinuadas en il senn, che las visch­nancas tiran a niz lur spazi d'agir e ch'ellas resguardan las relaziuns localas, lur capacitad economica sco er las organisaziuns e l'equipament existent da la scola.

Tar la dumonda 2: Cun la revisiun parziala da la Lescha davart las scolas popu­laras dal chantun Grischun (Lescha da scola; DG 421.000) èsi planisà d'aug­mentar la participaziun dal chantun als custs dals purtaders da scola, en spezial pervia dals custs pli auts per la ICT.

Tar la dumonda 3: Da far retroactivamain per 10 onns ina retschertga respectiva tar ils purtaders da scola, fiss collià cun fitg blera lavur, spezialmain per ils purta­ders da scola. L'experientscha da retschertgas passadas mussa, che bleras vischnancas han difficultads considerablas d'eruir las cifras tar ils singuls secturs e da las furnir a temp util (nagina cudeschaziun separada, midada da persunal e.u.v.). Quai vala en spezial per ina perioda talmain lunga. Independentamain da quai avessan las cifras – ord vista da la Regenza – mo ina pitschna expressivitad, perquai ch'il nivel dal basegn d'acquisiziun è stà fitg different, perquai ch'ils pur­taders da scola èn per gronda part libers d'eleger ils apparats, perquai ch'ils pretschs sa midan cuntinuadamain e plinavant perquai che betg tut ils purtaders da scola n'èn s'orientads als standards minimals, mabain han investì dapli.

Tar la dumonda 4: Tenor la Lescha da scola surpiglian las instituziuns ch'èn re­sponsablas per la scola ils custs per la scola populara publica, uschenavant che la lescha na prevesa betg in auter surpigliader dals custs (art. 69 al. 1 da la Lescha da scola). Da princip èsi l'incumbensa da las vischnancas da metter a disposiziun ils instruments per in manaschi da scola modern. I tutga er tar l'auto­nomia da las vischnancas da decider, tge infrastructura da scola che correspunda als basegns locals ed a la capacitad economica dal purtader da scola. Per il cas spezial da la ICT, che sto correspunder a tscherts standards minimals per l'in­strucziun, duai vegnir previsa – en la revisiun parziala da la Lescha da scola – ina participaziun pauschala adequata als custs menziunads. Questa participaziun s'orientescha a las recumandaziuns davart l'infrastructura dad ICT da las scolas sco er a las duradas d'amortisaziun usitadas per apparats dad IT (5 onns).

15 d'avust 2023