En il rom da concepts d'entretschament èn gia vegnids fatgs en bleras vischnancas da noss chantun contracts da cultivaziun tranter l'uffizi per la natira e l'ambient (UNA) e cultivaturas e cultivaturs , e quai per grondas surfatschas, en spezial per prads da muntogna. Cun quests contracts vegnan fixadas tranter auter las datas da tagl. La cunvegna contractuala tranter il UNA e las cultivaturas ed ils cultivaturs è in bun instrument per pussibilitar a las plantas da far sem ed uschia da mantegnair la varietad da las spezias da noss prads da muntogna bels ch'èn segiramain degns da vegnir protegids.
En connex cun meglieraziuns vegni ussa empruvà da transfurmar las datas da tagl, ch'èn fixadas en contracts, en servituts ch'èn liantas per las proprietarias per ils proprietaris. Igl è schizunt previs da zavrar ordavant parcellas ch'èn suttamessas ad ina tala restricziun da la cultivaziun e da las attribuir mo a proprietarias ed a proprietaris ch'èn pronts d'acceptar talas servituts. En in cas concret sa tracti tuttina d'ina surfatscha da 125 ha terren.
Tals models èn oravant tut attractivs, perquai ch'ins po cuntanscher uschia blers puncts substitutivs. Surprendent èsi però ch'i vegnan generads puncts substitutivs cun installar talas servituts, puncts substitutivs ch'èn bain gia garantids tras ils contracts da cultivaziun.
Servituts vegnan fixadas per adina e vegnan inscrittas en il register funsil. Quai èn oravant tut dretgs da passar cun conducts, dretgs da passadi, dretgs da funtauna e.u.v. En connex cun meglieraziuns stuessan, sche insumma, vegnir protegids mo objects archeologics en questa furma. La finamira d'ina meglieraziun è tranter auter quella da rectifitgar e da reducir las servituts.
Dumondas:
1. Tge è la basa legala per installar talas servituts?
2. Sustegna la regenza l'intenziun d'engrevgiar parcellas e surfatschas (125 ha) cun talas servituts avant ina nova repartiziun en connex cun ina meglieraziun generala?
3. Èsi correct che contribuziuns annualas per las datas da tagl tenor l'ordinaziun davart la qualitad ecologica (OQE) vegnan pajadas mo a cultivaturas ed a cultivaturs che han tenor l'ordinaziun davart ils pajaments directs (OPD) in dretg da survegnir pajaments directs?
4. Fin oz vegnan fixadas las datas da tagl sin basa da l'autezza sur mar e dal stadi da la vegetaziun. Na fiss ina cunvegna contractuala voluntara en furma d'in mosaic betg pli raschunaivla per la flora e per la fauna?
5. Co vul il UNA garantir che las servituts inscrittas vegnian stizzadas, sch'i dat ina midada substanziala da la politica da subvenziuns actuala?
Cuira, ils 28 d'avust 2009
Peer, Hartmann (Küblis), Darms-Landolt, Augustin, Barandun, Bezzola (Zernez), Bleiker, Brandenburger, Brüesch, Buchli, Bühler-Flury, Bundi, Butzerin, Caduff, Campell, Candinas (Rabius), Casparis-Nigg, Castelberg-Fleischhauer, Casty, Casutt, Caviezel (Pitasch), Caviezel-Sutter (Tusaun), Cavigelli, Claus, Clavadetscher, Conrad, Dermont, Donatsch, Fallet, Farrér, Feltscher, Giovanoli, Hardegger, Hartmann (Cuira), Hartmann (Champfèr), Heinz, Jeker, Jenny, Kessler, Koch, Kollegger, Kunz (Cuira), Mani-Heldstab, Märchy-Michel, Marti, Mengotti, Meyer-Grass (Claustra Vitg), Michel, Möhr, Montalta, Nick, Parolini, Perl, Portner, Ragettli, Ratti, Rizzi, Sax, Stiffler, Stoffel, Thomann, Thurner-Steier, Troncana-Sauer, Tscholl, Valär, Vetsch (Pragg-Jenaz), Wettstein, Bürkli, Candinas (Mustér), Furrer-Cabalzar, Grendelmeier-Bannwart, Gunzinger, Jecklin-Jegen, Kunz (Fläsch), Mainetti
Resposta da la regenza
La dumonda tracta differents tips da contracts che n'han betg da far directamain insatge l'in cun l'auter. Sur contracts da cultivaziun che cumpiglian l'entir manaschi vegnan promovidas per mintga cuntrada las spezias specificas da plantas e d'animals ch'èn tipics e ch'èn giavischadas per in tschert territori. Quests contracts vegnan fatgs cun las cultivaturas e cun ils cultivaturs. La conclusiun da tals contracts è voluntara e deliberescha indemnisaziuns supplementaras a norma da l'ordinaziun davart la promoziun regiunala da la qualitad e da la colliaziun da surfatschas da cumpensaziun ecologica en l'agricultura (ordinaziun davart la qualitad ecologica, OQE, CS 910.14). In concept da colliaziun ed ils contracts che sa basan sin tal valan sis onns e pon alura vegnir prolungads anc ina giada per sis onns.
Ina da las finamiras da meglieraziuns è quella da mantegnair ils spazis da viver ch'èn degns da vegnir protegids (biotops) e las spezias ch'èn avant maun en il territori cumpiglià. Lur protecziun vegn garantida tras servituts (p.ex. scumond da far midadas, scumond da ladar en palids e.u.v.). Il medem vala, sche la confederaziun duai pajar – en il rom da meglieraziuns – contribuziuns supplementaras per mesiras ecologicas (ordinaziun davart las meglieraziuns da structura en l'agricultura, ordinaziun davart las meglieraziuns da structura, OMSt, CS 913.1). En tals cas pretenda la confederaziun che las prestaziuns supplementaras en il sectur da la protecziun dals biotops vegnian garantidas a lunga vista tras servituts. Sche spazis da viver ch'èn degns da vegnir protegids (biotops) vegnan donnegiads u destruids tras mesiras tecnicas sco p.ex. construcziuns da vias en il rom da meglieraziuns, ston vegnir prestadas mesiras substitutivas.
Las mesiras substitutivas previsas (p.ex. la fixaziun d'in termin tard per segar) ston vegnir garantidas a lunga vista. En cas da meglieraziuns vegn quai per regla fatg tras servituts.
Respostas a las dumondas:
1. Las basas legalas èn l'art. 18 al. 1 ed 1bis da la lescha federala davart la protecziun da la natira e da la patria (LNP; CS 451) e l'art. 14 al. 2 da l'ordinaziun davart la protecziun da la natira e da la patria (ONP; CS 451.1) per la definiziun dals objects che suttastattan a la protecziun sco er l'art. 18 al. 1ter LNP e l'art. 14 al. 7 ONP per las mesiras substitutivas sco er l'art. 17 OMSt per contribuziuns supplementaras tar meglieraziuns.
2. I n'existan naginas intenziuns da midar tut las cunvegnas en il sectur da la LNP en servituts. Sch'i sa tracta da definir la cultivaziun adattada, vegn quai reglà en contracts da cultivaziun normals. Sch'i sa tracta percunter da proteger objects che suttastattan a la protecziun da la natira en in territori cumpiglià u da garantir che mesiras substitutivas tenor la LNP vegnian realisadas a lunga vista, quai che vegn pretendì da la lescha, vegn quai fatg – en cas da meglieraziuns – per regla tras servituts. Las cunvegnas contractualas tenor la OQE e tenor l'ordinaziun davart ils pajaments directs a l'agricultura (ordinaziun davart ils pajaments directs, OPD; CS 910.13) tranter las cultivaturas u ils cultivaturs ed il UNA sin basa d'in concept da colliaziun n'han nagin connex direct cun las servituts.
3. Ils dretgs da survegnir contribuziuns èn reglads definitivamain en il dretg federal. Sco premissa per tut ils pajaments directs, q.v.d. tant per quels tenor l'ordinaziun davart ils pajaments directs (OPD) sco er per quels tenor l'ordinaziun davart la qualitad ecologica (OQE), sto il manaschi avair il dretg da survegnir pajaments directs resp. insumma avair il dretg da survegnir contribuziuns. (cf. l'art. 2 OQE). Sche surfatschas da la protecziun da la natira vegnan cultivadas en moda adattada da puras e da purs che n'han betg il dretg da survegnir pajaments directs e/u sche quellas sa chattan ordaifer las surfatschas utilisadas da l'agricultura, vegnan questas prestaziuns indemnisadas or dal preventiv da la protecziun da la natira (art. 18c al. 2 LNP).
4. La OPD fixescha il termin il pli baud pussaivel per segar la prada che vegn cultivada en moda extensiva, e quai tenor las zonas d'agricultura (territori da la val, zona da muntogna I fin IV). Il chantun po spustar vers enavant quest termin tut tenor il svilup da la vegetaziun per maximalmain 2 emnas. Da quai profita il Grischun savens. Igl è pussaivel da far voluntarmain cunvegnas contractualas che van plinavant. En il rom da concepts da colliaziun vegnan quellas er sustegnidas cun contribuziuns sin basa da la OQE.
5. En ils contracts da servitut dal UNA statti explicitamain che la servitut extingua, sche las contribuziuns da cultivaziun na pon betg pli vegnir finanziadas.
2 da november 2009