Nova repartiziun dals mandats dal cussegl grond sin ils circuls per la proxima perioda d'uffizi
En vista a las elecziuns cirquitalas 2010 ha la regenza grischuna repartì da nov ils 120 mandats dal cussegl grond sin ils 39 circuls. En tut datti en sis circuls spustaments dals mandats.
Il circul da Razén, il circul da Schiers ed il circul da Trin survegnan en la perioda d'uffizi 2010 – 2014 mintgamai in mandat supplementar en il cussegl grond. Pia ha il circul da Razén en il futur set, il circul da Schiers trais ed il circul da Trin da nov tschintg commembras e commembers dal cussegl grond. Percunter ston il circul da la Cadi, il circul da la Lumnezia ed il circul da Rueun mintgamai renunziar ad in mandat. Il circul da la Cadi ha en il futur anc tschintg, il circul da la Lumnezia anc dus deputadas e deputads ed il circul da Rueun anc ina deputada u in deputà. Tut ils auters circuls vegnan a delegar a Cuira a partir dal 2010 il medem dumber da commembras e da commembers dal parlament.
Per la repartiziun dals mandats dal cussegl grond sin ils circuls è decisiva la statistica federala da l'effectiv annual da la populaziun (ESPOP) che vegn publitgada mintgamai l'onn avant las elecziuns cirquitalas. La basa per las elecziuns cirquitalas 2010 è la statistica che mussa il dumber da la populaziun svizra residenta da la fin da december 2008.
La procedura da repartiziun sa drizza tenor l'art. 2 da la lescha davart il cussegl grond. Ella garantescha als circuls pitschens almain in mandat e garantescha ultra da quai la repartiziun proporziunala dals mandats restants sin ils auters circuls. La nova repartiziun dals mandats dal cussegl grond sin ils singuls circuls vegn publitgada en il fegl uffizial dal chantun e po vegnir consultada qua en l'internet.
A Zernez vegn installà in center da registraziun per datas biometricas
En collavuraziun cun la vischnanca da Zernez installescha il chantun Grischun in center, nua che pon vegnir registradas en il futur las datas biometricas per ils novs documents d'identitad. La regenza grischuna ha approvà il contract correspundent tranter il chantun Grischun e la vischnanca da Zernez.
La confederaziun planisescha d'introducir per il 1. da mars 2010 en l'entira Svizra datas biometricas en ils differents geners d'attests d'identitad sco passaports, cartas d'identitad e legitimaziuns da persunas estras. Per registrar las datas ston ils chantuns metter a disposiziun ina infrastructura correspundenta.
La regenza grischuna aveva concludì gia il settember 2008 d'endrizzar maximalmain tschintg tals centers per registrar datas biometricas en il Grischun. En il territori dal Grischun dal sid ha il chantun chattà ussa cun la vischnanca da Zernez ina partenaria ch'è en cas da manar in center respectiv. Quel vegn integrà en l'administraziun communala. Profitond da sinergias persunalas e structuralas po uschia vegnir garantida ina gestiun favuraivla.
Resalvas vers la nova ordinaziun federala davart la tgira d'uffants
La regenza grischuna sustegna da princip la professiunalisaziun dals fatgs dals uffants confidads che la confederaziun vul cuntanscher. Cunter la ferma reglamentaziun previsa da la tgira d'uffants ordaifer la famiglia exprima ella dentant sias resalvas. Las novas regulaziuns cuntegnan numnadamain il privel ch'ellas n'èn betg realisablas e che la mancanza existenta da plazzas da tgira adattadas vegn a s'accentuar anc pli fitg.
Cun cleras obligaziuns tant da dumandar ina permissiun sco er da surveglianza vul la confederaziun garantir il bainesser dals uffants che vegnan tgirads en ina famiglia estra u en ina instituziun. En vista al basegn cumprovà d'ina tgira cumplementara a la famiglia duai da nov la tgira d'uffants durant il di tras mammas dal di u tras canortas d'uffants vegnir suttamessa ad in'obligaziun da dumandar ina permissiun.
Sco che la regenza scriva en sia resposta da consultaziun a la confederaziun, refusa ella ina surregulaziun da relaziuns da dretg privat. Uschia duai la tgira d'uffants durant il di tras geniturs dal di esser unicamain en il sectur da responsabladad dals geniturs. Pervia da quai pretenda la regenza che l'obligaziun da dumandar ina permissiun e che l'obligaziun d'annunzia per geniturs dal di, ch'èn previsas en il sboz preliminar, na vegnian betg realisadas. Er l'obligaziun da dumandar ina permissiun per la tgira regulara tras geniturs da padrinadi las fins d'emna u en las vacanzas duai vegnir stritgada. La finala duai l'obligatori per cunvegnas da tgira en scrit, ch'è previs per ina tgira pajada, vegnir restrenschì a relaziuns da tgira a temp cumplain en instituziuns.
Da vischnancas e da regiuns
Claustra-Serneus: La regenza approvescha la revisiun totala da la planisaziun locala da la vischnanca da Claustra-Serneus dals 21 da zercladur 2009.
Contribuziuns chantunalas a differentas instituziuns
Hotel La Val SA: Cun resalva da la finanziaziun totala vegn concedì – tenor la nova politica regiunala da la confederaziun (NPR) – in credit da 1'600'000 francs a la Hotel La Val SA (en il futur Breil Gastro SA) per construir in implant da wellness Hotel La Val Breil. Plinavant vegn garantida ina contribuziun chantunala da 269'343 francs.
Projects da vias
La regenza ha approvà totalmain 3'522'000 francs per construir e per sanar il suandant traject da via:
- via d'Engiadina: lavurs d'impressari tar l'access da Scuol ost
Gremi: regenza
Funtauna: rg chanzlia chantunala dal Grischun