La regenza grischuna vul garantir il manaschi da la plazza aviatica regiunala da Samedan a vista uschè lunga sco pussaivel. Il chantun Grischun e l'Engadin Airport SA han suttascrit ina decleraziun d'intenziun correspundenta. Uschia duai vegnir fatg in contract da dretg da construcziun e da gestiun cumplessiv tranter il chantun e la gestiunaria da la plazza aviatica.

La plazza aviatica regiunala da Samedan sco plazza aviatica la pli auta da l'Europa è in indriz d'infrastructura impurtant per l'Engiadin'ota cun sia orientaziun fermamain turistica. Or d'interess regiunal sco er chantunal vali pia tenor l'avis da la regenza grischuna da mantegnair – ad ina vista uschè lunga sco pussaivel – quest avantatg dal lieu essenzial visavi autras destinaziuns d'enviern cumparegliablas.

Il chantun Grischun e l'Engadin Airport SA han suttascrit ina decleraziun d'intenziun correspundenta ch'è er resultat da l'integraziun da la vischnanca da staziunament e dal barat d'opiniuns cun ils presidents communals da l'Engiadin'ota. La decleraziun d'intenziun ch'è vegnida approvada da la regenza suttastritga il giavisch da mantegnair l'infrastructura aviatica en l'Engiadina a lunga vista. Perquai vegn suttascrit in contract da dretg da construcziun e da gestiun cumplessiv tranter las parts participadas. Quel sto alura vegnir approvà da la regenza. Sco supplement duai vegnir stgaffida en il contract nov la pussaivladad per il maun public da sa participar a la societad gestiunaria.

Garantir il manaschi aviatic a lunga vista
Il partenadi cun il chantun pussibilitescha a l'Engadin Airport SA da mantegnair en l'Engiadina ina infrastructura aviatica segira che correspunda a tut ils standards, e quai er senza in transferiment da la proprietad. Cun il contract da dretg da construcziun previs ed integrond il maun public po il manaschi aviatic – tenor il chantun – vegnir garantì durablamain sin questa plazza aviatica regiunala. Quest contract furma en spezial la basa necessaria per la gestiunaria per insumma pudair investir en la modernisaziun da la plazza aviatica regiunala en l'Engiadin'ota.

Tar las investiziuns che ston vegnir fatgas vi da la plazza aviatica tutga per exempel la sanaziun ed il mantegniment dals edifizis, la dischlocaziun planisada da la via u l'engrondiment da las surfatschas da parcadi per aviuns e per helicopters sco er il project d'engrondiment "Sungate". Uschespert ch'igl èn avant maun las ordinaziuns da l'uffizi federal d'aviatica civila (realisaziun da las disposiziuns da la ICAO sin la plazza aviatica da Samedan sco er la determinaziun dal sistem per la segirezza da sgol futur) ch'èn centralas per la segirezza da planisaziun e d'investiziun da l'Engadin Airport SA, duai vegnir decidì davart las proximas etappas d'amplificaziun.


Infurmaziuns:
- cusseglier guvernativ Stefan Engler, schef dal departament da construcziun, traffic e selvicultura, tel. 081 257 36 01
- Heinz Reber, CEO da l'Engadin Airport SA, tel. 081 851 08 22


Gremi: regenza
Funtauna: rg chanzlia chantunala dal Grischun