Navigation

Inhaltsbereich

  • Erste Mitteilung
  • Neuen Beitrag einfügen
Il cudesch da dretg grischun che stat a disposiziun en l'internet ha survegnì in nov concept e novas funcziuns. La purschida – ch'è facila d'utilisar – po vegnir consultada a partir d'immediat en tuttas trais linguas chantunalas sut www.gr-lex.gr.ch.

En il decurs da la realisaziun dal e-government l'onn passà èn las paginas d'internet da l'administraziun chantunala vegnidas concepidas da nov ed unifitgadas. Dapi il cumenzament da schaner stat er il cudesch da dretg grischun a disposiziun en l'internet cun in nov design e cun novas funcziuns.

Il cudesch da dretg en l'internet vegn actualisà mintga di da la chanzlia chantunala dal Grischun. El cuntegna – tenor urden sistematic – ils relaschs giuridics vertents dal chantun Grischun. Ils relaschs pon vegnir chargiads u stampads da nov en il format da PDF. I dat vastas pussaivladads da tschertgar (tschertga en il text integral, tschertga da titels, tschertga directa tenor il numer u tenor l'abreviaziun dal relasch sco er tschertga tras l'index u tras la sistematica). Partend da mintga relasch tschernì, po l'utilisadra u l'utilisader cliccar sin in'autra lingua chantunala ed arriva uschia al medem relasch en la lingua giavischada.

Ultra da quai administrescha la nova soluziun las versiuns da leschas. En il futur vegnan pia archivadas ed a star a disposiziun en l'internet – ultra da la versiun actuala vertenta – er las versiuns da las leschas ch'èn vegnidas abolidas.

Vus chattais il cudesch da dretg grischun en l'internet sut la suandanta adressa: www.gr-lex.gr.ch


Gremi: chanzlia chantunala dal Grischun
Funtauna: rg chanzlia chantunala dal Grischun
Neuer Artikel